ខេត្តស្វាយរៀង៖ និស្សិតស្រីវ័យក្មេងម្នាក់តូចចិត្តនឹងការប្រឡងធ្លាក់ពេទ្យថ្នាក់ជាតិ ធ្វើឲ្យនាងកើតទុក្ខមួម៉ៅក្ដៅក្រហាយក្នុងចិត្ត បែរជាមានគំនិតគិតខ្លី ដើរទៅលោតទឹកសម្លាប់ខ្លួន កាលពីថ្ងៃទី១៨ ខែមេសា ឆ្នាំ២០១៨ នៅក្នងរណ្ដៅដីមួយកន្លែង នៅខាងជើងអគារបុគ្គលិក Las Vegas Sun ស្ថិតក្នុងក្រុងបាវិត។
យោងតាមគណនីហ្វេសប៊ុក Sothy Bavet បានសរសេរសារយ៉ាងក្រៀមក្រំមួយថា ប្អូនស្រីរបស់គាត់បានប្រឡងពេទ្យថ្នាក់ជាតិ តែនាងមិនភ័ព្វសំណាង បានប្រឡងជាប់នឹងគេ ទើបធ្វើឲ្យនាងកើតទុក្ខនៅក្នុងចិត្ត ហើយគិតខ្លី ដើរទៅលោតទឹកសម្លាប់ខ្លួន ទាំងនាងទើបមានអាយុនៅក្មេងខ្ចីបែបនេះទៅវិញ។
គណនីដដែល បានបន្តថា “ខ្ញុំមានទុក្ខជាទម្ងន់ ដោយសារប្អូនស្រីបានគិតខ្លី ដាច់ចិត្តលោតទឹកសម្លាប់ខ្លួន នៅក្នុងរណ្ដៅដី នាខាងជើងអគារបុគ្គលិក Las VeGas Sun បាវិត នារសៀលល្ងាច ថ្ងៃទី១៨ ខែមេសា ឆ្នាំ២០១៨នេះ។ រហូតមកដល់ម៉ោងនេះ មានបងប្អូនជួយបង់សំណាញ់៥ទៅ៦ដងហើយ តែនៅតែរកមិនឃើញ ពីព្រោះទឹកជ្រៅពេក។
គណនីដដែល បានសរសេរបន្តថា “មហាសែនសោកស្តាយណាស់ប្អូនស្រី បើរៀនពេទ្យ៨ទៅ៩ឆ្នាំហើយ ប្អូនប្រឡងពេទ្យថ្នាក់ជាតិមិនជាប់ នៅឆ្នាំនេះ ប្អូនស្រីអាចប្រឡង នៅឆ្នាំក្រោយទៀតបានតើ? ម្តេចក៏ប្អូនគិតខ្លីយ៉ាងនេះ? ប្អូនលាក់សញ្ញាបត្រពីប៉ាទៀត ប្អូនប្រាប់ម៉ាក់ថា រៀនពេទ្យ ឥឡូវធ្លាក់អ៊ីចឹង។ តែម៉ាក់ប្រាប់ថា ចង់ឲ្យប្អូនមានអនាគតល្អ ឲ្យស្រណុកខ្លួនទៅថ្ងៃមុខ ដឹងទេ? ក្នុងចំណោមកូនទាំងអស់ ម៉ាក់ប៉ាស្រលាញ់ប្អូនឯងជាងគេ”។
នៅលើគណនីដដែលនោះ បានសរសេរសារដ៏ក្រៀមក្រំបន្តទៀតថា ប្អូនស្រីជាទីស្រលាញ់! មិនយូរ តែប៉ុន្មានម៉ោងទៀតនេះ សពប្អូននឹងត្រូវបូជាហើយ។ បងខំសុំច្បាប់ពីក្រុមហ៊ុន១ថ្ងៃថា នឹងទៅឆ្លងថ្ងៃចូលឆ្នាំចុងក្រោយ តែមិននឹកស្មានថា ថ្ងៃសម្រាកនេះ បែរជាថ្ងៃមកបីត្រកងសពប្អូនឯងចេញពីទឹកសោះ! តើឲ្យបងទទួលយកម្តេចនឹងបាន? ប្អូនឯងទៅមែន តែប៉ាម៉ាក់ និងបងៗ ព្រមទាំងក្មួយរបស់ប្អូនឯងយំសោកបោកខ្លួន តាំងពីកន្លែងកើតហេតុ រហូតដល់ផ្ទះពុំស្រាកស្រាន្តសោះឡើយ។ គ្រប់យ៉ាងឯងមានទាំងអស់ ព្រោះប៉ាម៉ាក់បានរៀបចំទុកឲ្យយ៉ាងស្អាត រហូតដល់បងៗរបស់ប្អូនឯងលួចច្រណែន។
សារដដែលបានបន្តថា រាល់កាយវិការ សើចក្អាកក្អាយរាល់ថ្ងៃជាមួយគ្នា រាល់ពាក្យសម្ដីដែលណែនាំរបស់បងប្អូន គឺចង់ដាស់តឿនឲ្យប្អូនឯងល្អ។ ប៉ុន្តែឥឡូវកាយវិការ និងពាក្យសម្ដីទាំងនោះ គឺលែងមានតទៅទៀតហើយ ពីព្រោះប្អូនឯងលាពីពួកយើងហើយ ហើយការលានេះ គឺគ្មានថ្ងៃវិិលត្រឡប់វិញឡើយ។ បើប្អូនឯងដឹងថា មានសម្ពាធធ្ងន់ ក្នុងការរៀនសូត្រ ម្តេចប្អូនឯងមិនដាក់ចុះ? ម្តេចក៏ប្អូនមិនព្រមនិយាយអ្វីមួយម៉ាត់សោះអ៊ីចឹង? ប្អូនឯងលាក់ទុក តែក្នុងចិត្តរហូត ហើយដាច់ចិត្តទៅចោលពួកយើងទាំងគ្មានក្តីអាល័យបែបនសោះ? ពួកយើងពិតជាសោកស្តាយប្អូនឯងខ្លាំងណាស់! ទឹកភ្នែកបងស្រក់ទៀតហើយ! បងស្រក់ទឹកភ្នែក មកជួនដំណើរប្អូនទៅឲ្យបានសុខណាប្អូនសម្លាញ់។
ក្រោយពេលស្រងស់សាកសពរួច សាច់ញាតិបានរាយការណ៍ទៅសមត្ថកិច្ចឲ្យចុះមកពិនិត្យ និងរៀបចំធ្វើបុណ្យតាមប្រពៃណី ហើយនឹងបូជាសពរបស់នារីរងគ្រោះ នៅថ្ងៃទី២០ ខែមេសា ឆ្នាំ២០១៨ នៅឯស្រុុកកំណើតរបស់នាង៕
