ខេត្តបាត់ដំបង៖ ភ្លៀងកក់ខែមួយមេលាយឡំនឹងខ្យលព្យុះបានវាយប្រហារទៅលើភូមិឋានរបស់ប្រជាពលរដ្ឋ រស់នៅស្រុកភ្នំព្រឹក និងស្រុកគាស់ក្រឡ បណ្ដាលឲ្យរលំផ្ទះចំនួន៥ខ្នង កាលពីរសៀល ថ្ងៃចន្ទ ៣កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨។
មន្ត្រីនគរបាលខេត្តបាត់ដំបង បានឲ្យដឹងថា កាលពីរសៀលម្សិលមិញនេះ ភ្លៀងកក់ខែបានបង្អុរចុះមកយ៉ាងខ្លាំងលាយឡំនឹងខ្យល់កន្រ្ដាក់បានបោកបក់ទៅលើស្រុកចំនួន២ នៃខេត្តបាត់ដំបង គឺស្រុកភ្នំព្រឹក និងស្រុកគាស់ក្រឡ។ គ្រោះធម្មជាតិដ៏សាហាវនេះ បានបណ្ដាលឲ្យផ្ទះប្រជាពលរដ្ឋចំនួន៥ខ្នងបានរងនូវការខូចខាត ក្នុងនោះស្រុកភ្នំព្រឹកមានខូចខាតចំនួន៣ខ្នង និងនៅស្រុកគាស់ក្រឡ ខូចខាត២ខ្នង។
ទោះជាយ៉ាងណា នៅក្នុងហេតុការណ៍គ្រោះធម្មជាតិនោះ មិនបានបង្កឲ្យមានគ្រោះថ្នាក់ដល់មនុស្សណាម្នាក់នោះឡើយ។ ដោយឡែកទំហ នៃការខូចខាតដោយសារខ្យល់កន្រ្ដាក់នេះ ទាំងអាជ្ញាធរ និងសមត្ថកិច្ចពាក់ព័ន្ធក៏មិនបានបញ្ជាក់ទេ។ ស្របគ្នានេះដែរ លោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង ក៏បានណែនាំជាបន្ទាន់ដល់គ្រប់អធិការនគរបាលក្រុង.ស្រុក និងមេបញ្ជាការវរសេនាតូចនគរបាលការពារព្រំដែនគោកចំណុះឲ្យស្នងការដ្ឋាន ត្រូវធ្វើសកម្មភាពជួយសង្រ្គោះប្រជាពលរដ្ឋ រួមទាំងទ្រព្យសម្បត្តិ និងសត្វពាហនៈនាំទៅរកទីកន្លែងមានសុវត្ថិភាព ក្នុងករណីមានគ្រោះធម្មជាតិកើតឡើង និងបន្តជួយជួសជុលលំនៅឋានពួកគាត់ឡើងវិញ៕
