ខេត្តកណ្ដាល៖ បុរសម្នាក់ឃើញប្រពន្ធផឹកស្រាខ្លាំងពេក ក៏ដើរទៅហាម ប៉ុន្តែប្រពន្ធនៅតែចចេស ធ្វើឲ្យគេទ្រាំមិនបាន ក៏ផ្ទុះកំហឹងយ៉ាងក្រេវក្រោធឡើង ទាញដំបងសំពងក្បាលបែកហូរឈាម ហើយរត់គេចខ្លួនបាត់ស្រមោល កាលពីវេលាម៉ោង៩ និង១៥នាទីយប់ ថ្ងៃទី១៨ ខែមីនា ឆ្នាំ២០១៨ នៅក្នុងភូមិសំប៉ានក្រោម ឃុំព្រែកអំបិល ស្រុកស្អាង។
មន្ដ្រីនគរបាលស្រុកស្អាង បានឲ្យដឹងថា ជនសង្ស័យជាប់ពាក់ព័ន្ធនឹងអំពើហិង្សាវាយធ្វើប្រពន្ធបែកក្បាលហើយកំពុងរត់គេចខ្លួនពីសមត្ថកិច្ចនោះ ឈ្មោះ សួន តុងម៉េង អាយុ៤៤ឆ្នាំ ជនជាតិខ្មែរ មុខរបរជាកសិករ។ រីឯស្ដ្រីរងគ្រោះ ឈ្មោះ បឹង គួយ អាយុ៤៤ឆ្នាំ ជនជាតិខ្មែរ មុខរបរជាកសិករ (របួសត្រង់ចង្កា និងក្បាលមានស្ថានភាពធ្ងន់)។ ពួកគេទាំង២នាក់ប្ដីប្រពន្ធមានលំនៅក្នុងភូមិសំប៉ានក្រោម ឃុំព្រែកអំបិល ស្រុកស្អាង ខេត្តកណ្តាល។
ប្រភពព័ត៌មានពីកន្លែងកើតហេតុ បានឲ្យដឹងថា កន្លងមក ស្ដ្រីរងគ្រោះតែងតែដើរផឹកស្រាជាប្រចាំ ហើយប្ដីរបស់គាត់ចេះតែហាមកុំឲ្យផឹក។ លុះមកដល់ថ្ងៃកើតហេតុ ជនសង្ស័យបានឃើញប្រពន្ធរបស់ខ្លួនទៅបន្ដដើរផឹកស្រាទៀត ធ្វើឲ្យគេផ្ទុះកំហឹងយ៉ាងក្រេវក្រោធឡើងទាញដំបងវាយក្បាលប្រពន្ធ បណ្ដាលឲ្យបែកហូរឈាម រងរបួសធ្ងន់ ហើយរត់គេចខ្លួនបាត់។
ក្រោយពេលកើតហេតុ សាច់ញាតិបានបញ្ជូនជនរងគ្រោះទៅសង្គ្រោះ នៅក្នុងមន្ទីរពេទ្យកាល់ម៉ែត រាជធានីភ្នំពេញ។ ដោយឡែកជនសង្ស័យជាប្ដីកំពុងស្ថិតក្រោមការស្រាវជ្រាវចាប់ខ្លួនរបស់សមត្ថកិច្ច៕
