កីឡាករប្រដាល់ ជាកូនសិស្សលោកអេភូថង ផឹកស៊ីស្រវឹងជិះកង់ទៅទិញបារីជក់ ត្រូវក្មេងទំនើង៦នាក់ ប្រដាប់ដោយកាំបិតបុ័ងតោ កាប់បណ្តាលឲ្យរងរបួសធ្ងន់ កាលពីវេលាម៉ោង៣ និង១៥នាទីទៀបភ្លឺ ថ្ងៃទី១៧ ខែកុម្ភៈ ឆ្នាំ២០១៨ តាមបណ្តោយផ្លូវផ្សារដឺម៉ិច នៅចំណុចផ្សារដឺម៉ិច ស្ថិតក្នុងសង្កាត់មិត្តភាព ខណ្ឌ៧មករា ។
ជនរងគ្រោះមានឈ្មោះសូ សិន ភេទប្រុស អាយុ២៦ឆ្នាំ ជាកីឡាប្រដាល់នៅក្លឹបអេភូថង ស្នាក់នៅទល់មុខ ភោជនីយដ្ឋាន៣៣៣៣ ស្ថិតនៅក្នុងសង្កាត់អូរឫស្សី៣ ខណ្ឌ៧មករា ។
តាមប្រភពព័ត៌មានពីជនរងគ្រោះ បានអោយដឹងថា មុនពេលកើតហេតុ គាត់កំពុងតែផឹកស៊ី ក្នុងឱកាសបុណ្យចូលឆ្នាំប្រពៃណីចិន ជាមួយមិត្តភក្តិនៅម្តុំក្បែរផ្សារឌុចម៉ិច កែងច្រមុះជ្រូក កន្លែងផ្ញើរកង់ម៉ូតូ លុះពេលដែលគាត់ ស្រវឹងស្រាស្រឿងៗ បានជិះកង់ទៅទិញបារីជក់ នៅផ្សារឌុចមិច ក៏ស្រាប់តែមានក្មេងទំនើងមួយក្រុម មានគ្នា៦នាក់ ប្រដាប់ដោយកាំបិតបុ័ងតោ២ទៅ៣ ដើរសំដៅមកកាប់ទៅលើគាត់ បណ្តាលអោយរងរយះក្បាល២កន្លែង ហូរឈាមស្រោចពេញខ្លួន ចំណែកជនបង្ក រត់គេចខ្លួនបាត់ស្រមោល ភ្លាមៗនោះដែរ សមត្ថកិច្ចបានមកជួយអន្តរាគមន៍ ដល់កន្លែងកើតហេតុ ដើម្បីស្រាវជ្រាវតាមចាប់ជនសង្ស័យ យកមកផ្តន្ទាទោស តាមច្បាប់ ។
ក្រោយពេលកើតហេតុ សមត្ថកិច្ចក៏បានអោយជនរងគ្រោះ ទៅព្យាបាលនៅមន្ទីរពេទ្យសម្តេចឪ រួចចាំមកដាក់ពាក្យបណ្តឹង ដើម្បីស្រាវជ្រាវចាប់ជនសង្ស័យ មកផ្តន្ទាទោសទៅតាមផ្លូវច្បាប់ ៕
