ភ្នំពេញ៖ សភាស៊ើបសួរ នៃសាលាឧទ្ធរណ៍ គ្រោងនឹងបើកសវនាការលើសំណុំរឿងរបស់លោក កឹម សុខា អតីតប្រធាននៃអតីតគណបក្សសង្គ្រោះជាតិ ជាអសាធារណៈ លើបណ្តឹងសុំនៅក្រៅឃុំបណ្តោះអាសន្ន ប្រឆាំងនឹងការសម្រេច មិនដោះលែងរបស់ចៅក្រមស៊ើបសួរ នៃសាលាដំបូងរាជធានីភ្នំពេញ នៅព្រឹកថ្ងៃទី១ ខែកុម្ភៈ ឆ្នាំ២០១៨ ខាងមុខនេះ។
ប្រភពព័ត៌មានពីសភាស៊ើបសួរ បានឲ្យដឹងថា ប្រសិនមិនមានការកែប្រែនោះទេ សវនាការលើសំណុំរឿងក្ដីរបស់លោក កឹម សុខា អតីតប្រធានគណបក្សសង្គ្រោះជាតិ នឹងលើកយកមកជំនុំជម្រះ នៅថ្ងៃទី១ ខែកុម្ភៈខាងមុខនេះ។ សវនាការនេះ ដឹកនាំដោយលោក លោក ផូ ពៅស៊ុន ប្រធានក្រុមប្រឹក្សាជំនុំជម្រះ នៃសភាស៊ើបសួរ និងលោកព្រះរាជអាជ្ញា ហ៊ឹង ប៊ុនជា ជាតំណាងមហាអយ្យការ។
ដោយឡែក ក្រុមមេធាវីរបស់លោក កឹម សុខា បានដាក់សំណើសុំឲ្យចៅក្រមស៊ើបសួរ នៃសាលាដំបូងរាជធានីភ្នំពេញ កោះហៅតំណាងរដ្ឋាភិបាលអាមេរិកាំងមកបំភ្លឺ ក្នុងសំណុំរឿងអតីតមេបក្សប្រឆាំង។ ប៉ុន្តែគិតមកដល់ថ្ងៃនេះ មានរយៈពេលជិត២សប្ដាហ៍ហើយ តុលាការនៅមិនទាន់មានឆ្លើយតបយ៉ាងណាមួយនៅឡើយ។ ករណីនេះធ្វើឲ្យក្រុមមេធាវីរបស់់លោក កឹម សុខា មិនសប្បាយចិត្ត ហើយព្រមានថា ប្រសិនបើចៅក្រមនៅតែពន្យារពេលធ្វើកិច្ចការនេះបន្តទៀត ពួកគេនឹងប្តឹងទៅសភាស៊ើបសួរ នៃសាលាឧទ្ធរណ៍ ដើម្បីសម្រេចជំនួសតែម្តង។
ក្រុមមេធាវីរបស់លោក កឹម សុខា នឹងទុកពេលយ៉ាងយូរបំផុត១ខែ ដើម្បីឲ្យចៅក្រមស៊ើបសួរ នៃសាលាដំបូងរាជធានីភ្នំពេញ គឺលោក គី ឫទ្ធី ដំណើរការបំពេញកិច្ចកោះហៅតំណាងរដ្ឋាភិបាលអាមេរិកាំងមកបំភ្លឺ ក្នុងសំណុំរឿងក្បត់ជាតិរបស់អតីតមេបក្សរូបនេះ តាមសំណើរបស់ខ្លួន។ នេះបើតាមការអះអាងរបស់លោក សំ សុគង់ ជាសហមេធាវីម្នាក់របស់លោកកឹម សុខា។
លោក សំ សុគង់ បានអះអាងទៀតថា ដោយសារតែសំណើបំពេញកិច្ចនេះ មិនបានកំណត់រយៈពេលដល់ចៅក្រម ក្នុងការឆ្លើយតប ដូច្នេះហើយក្រុមមេធាវីគ្មានជម្រើសណាផ្សេង ក្រៅតែពីរង់ចាំសិននោះទេ។ ទោះជាយ៉ាងណា KBN មិនអាចទាក់ទងសុំការបំភ្លឺពីលោក គី ឫទ្ធី ចៅក្រមស៊ើបសួរ នៃសាលាដំបូងរាជធានីភ្នំពេញដែលកាន់សំណុំរឿងរបស់លោក កឹម សុខា បានឡើយ។ ដោយឡែកលោក លី សុផាណា ជាអ្នកនាំពាក្យ នៃសាលាដំបូងរាជធានីភ្នំពេញ ក៏មិនបានផ្តល់ព័ត៌មានជុំវិញរឿងក្ដីនេះដែរ។
ក្រុមមេធាវីរបស់លោក កឹម សុខា បានដាក់សំណើរសុំទៅលោកចៅក្រម គី ឫទ្ធី កោះហៅតំណាងរដ្ឋាភិបាលអាមេរិកាំងមកបំភ្លឺ នៅក្នុងរឿងកូនក្តីរបស់លោក តាំងតែដើមសប្តាហ៍មុនមកម្ល៉េះ។ ការដាក់សំណើនេះ ក៏ព្រោះតែក្រុមមេធាវីយល់ថា ដោយសារតែមានការចោទប្រកាន់លោកកឹម សុខា ថាមានអាមេរិកនៅពីក្រោយខ្នង ក្នុងសំណុំរឿងក្បត់ជាតិរបស់លោក។ ដូច្នេះហើយ ដើម្បីឲ្យកាន់តែច្បាស់លាស់ ក្រុមមេធាវី ចង់ឲ្យចៅក្រមកោះហៅតំណាងរដ្ឋាភិបាលអាមេរិកាំងមកបំភ្លឺរឿងនេះ នៅក្នុងតុលាការកម្ពុជាតែម្តង។ បើតាមលោកមេធាវី សំ សុគង់ បានអះអាងថា ដំណើរការនេះ គឺអាចធ្វើទៅបាន ប្រសិនបើចៅក្រមមានចេតនាចង់ធ្វើនោះ។
សូមជម្រាបថា លោក កឹម សុខា ត្រូវបានសមត្ថកិច្ចចាប់ខ្លួន កាលពីវេលារំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ បន្ទាប់ពីមានការបែកធ្លាយវីដេអូមួយ ជាប់ពាក់ព័ន្ធនឹងបង្គាប់បញ្ជារបស់សហរដ្ឋអាមេរិក ក្នុងគោលបំណងផ្តួលរំលំរាជរដ្ឋាភិបាលកម្ពុជា ហើយត្រូវប្រមុខរដ្ឋាភិបាល ចោទប្រកាន់ពីអំពើក្បត់ជាតិ។
លោក កឹម សុខា ត្រូវបានតុលាការរាជធានីភ្នំពេញសម្រេចឃុំខ្លួន នៅក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ កាលពីថ្ងៃទី៦ ខែកញ្ញា ឆ្នាំ២០១៧ ដោយចោទប្រកាន់ពីបទល្មើស «ក្បត់ជាតិ» ដែលអាចប្រឈមមុខនឹងការជាប់ពន្ធនាគារ រយៈពេលពី១៥ឆ្នាំ ទៅ៣០ឆ្នាំ។ អយ្យការអមសាលាដំបូងរាជធានីភ្នំពេញ បានបង្ហាញថា លោក កឹម សុខា ជាប់ចោទប្រកាន់ពីបទ « សន្និដ្ឋិភាពជាមួយបរទេស» តាមមាត្រា៤៤៣ នៃក្រមព្រហ្មទណ្ឌ។
គិតមកដល់ពេលនេះ មានរយៈពេលជិត៥ខែមកហើយ ដែលលោក កឹម សុខា ត្រូវឃុំខ្លួន ក្រោមបទចោទក្បត់ជាតិ ហើយក្រុមមេធាវីរបស់លោក កឹម សុខា បានខិតខំតវ៉ាជំទាស់នឹងការឃុំខ្លួននោះដែរ។ ប៉ុន្តែទាំងតុលាការជាន់ទាប ជាន់កណ្តាល និងជាន់ខ្ពស់ សុទ្ធតែទាត់ចោលនូវការខិតខំប្រឹងប្រែងរបស់ក្រុមមេធាវីទាំងនេះ។ បន្ទាប់ពីការការជំទាស់តវ៉ាទាំងនេះមិនបានសម្រេច ទើបក្រុមមេធាវីបានស្នើទៅកាន់សាលាដំបូងរាជធានីភ្នំពេញ ដើម្បីសុំឲ្យលោក កឹម សុខា បាននៅក្រៅឃុំតាមនីតិវិធី។
សំណើរបស់ក្រុមមេធាវីទាំងនេះ ត្រូវបានតុលាការទាត់ចោល កាលថ្ងៃទី១៥ ឆ្នាំមករាកន្លងទៅ ទើបក្រុមមេធាវីបានប្តឹងទៅកាន់សាលាឧទ្ធរណ៍ទៀត។ នៅពេលនេះ សាលាឧទ្ធរណ៍គ្រោងនឹងសម្រេចបើកសវនាការ នៅថ្ងៃទី០១ ខែកុម្ភៈ ឆ្នាំ២០១៨ សប្តាហ៍ក្រោយនេះ។ ទោះជាយ៉ាងណា ក្រុមមេធាវីរបស់លោក កឹម សុខា ហាក់មិនសង្ឃឹមថា តុលាការសាលាឧទ្ធរណ៍នឹងផ្តល់យុត្តិធម៌ដល់កូនក្តីរបស់ពួកគេនោះទេ ដោយហេតុថា សំណុំរឿងនេះ ជារឿងធំ ហើយមានលក្ខណៈនយោបាយទៀតផង៕
