ខេត្តរតនគិរី៖ បុរសល្មោភកាមម្នាក់ មានប្រពន្ធ និងកូនរួចទៅហើយ បែរជាខ្វះសីលធម៌ ទុកបណ្ដោយឲ្យកាមតណ្ហាដឹកច្រមុះ លបលួច ចាប់រំលោភប្អូនថ្លៃស្រី ទើបតែមានអាយុ១៤ឆ្នាំ បានសម្រេចជាច្រើនដង ហើយចុងក្រោយក៏អស់លក្ខណ៍ បែកការដឹងដល់ប្រពន្ធ ប្ដឹងទៅសមត្ថកិច្ចឲ្យចុះទៅឃាត់ខ្លួន កាលពីថ្ងៃទី២២ ខែមករា ឆ្នាំ២០១៨ នៅក្នុងភូមិ៣ ឃុំត្រពាំងក្រហម ស្រុកកូនមុំ។
មន្ត្រីនគរបាលស្រុកកូនមុំ បានឲ្យដឹងថា ជនសង្ស័យជាប់ពាក់ព័ន្ធនឹងករណីចាប់រំលោភប្អូនថ្លៃជាអនីតិជន ហើយត្រូវសមត្ថកិច្ចឃាត់ខ្លួននោះ ឈ្មោះ សែម សារ៉ូ អាយុ៣២ឆ្នាំ។ រីឯក្មេងស្រីរងគ្រោះ ឈ្មោះ ក រ អាយុ១៤ឆ្នាំ។ ពួកគេទាំង២នាក់ (ជនល្មើស និងសង្ស័យ) មានលំនៅក្នុងភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។
ប្រភពព័ត៌មានពីអ្នកភូមិ បានឲ្យដឹងថា ជនសង្ស័យខាងលើនេះ មានប្រពន្ធ និងកូនរួចទៅហើយ ប៉ុន្តែគេនៅតែមានចិត្តព្រើល ខ្វះគុណធម៌ជាបង ហើយនៅពេលប្រពន្ធមិននៅផ្ទះ គេតែងតែលបលួចចាប់រំលោភប្អូនថ្លៃ បានសម្រេចជាច្រើនលើកច្រើនសា និងថែមទាំងគំរាមដល់នាងថែមទៀត។ រីឯក្មេងរីរងគ្រោះ ដោយតែខ្លាចនូវការគំរាមកំហែងពីបងថ្លៃផង ខ្លាចខ្មាសអ្នកជិតខាង និងខ្លាចបងស្រីបង្កើតរបស់នាងពិបាកចិត្ត ហើយនាំឲ្យគ្រួសាររបស់ពួកគេបែកបាក់គ្នាផង ទើបនាងសុខចិត្តលាក់ទុកនូវរឿងអាស្រូវទាំងនេះ ដោយស៊ូទ្រាំបៀមទុក្ខនៅក្នុងចិត្តរបស់នាងអស់រយៈពេលយ៉ាង។
ប្រភពព័ត៌មានដដែល បានបន្តថា ថ្វីបើនាងសុខចិត្តនៅស្ងៀមបែបនេះក្ដី ប៉ុន្តែបងថ្លៃមានចិត្តគម្រក់នេះ នៅតែបន្តចាប់រំលោភនាងឥតឈប់ឈរ ហើយចុងក្រោយ បងស្រីបង្កើតរបស់នាង មានការសង្ស័យ ក៏តាមដានដឹង ទើបនាំប្អូនស្រីរបស់ខ្លួនទៅដាក់ពាក្យបណ្ដឹង សុំឲ្យសមត្ថកិច្ចឃាត់ខ្លួនប្ដីគម្រក់នោះ។
មន្ត្រីនគរបាលដដែល បានបន្តថា បន្ទាប់ពីមានពាក្យបណ្ដឹងពីអាណាព្យាបាលរបស់ជនរងគ្រោះ សមត្ថកិច្ចក៏បានចុះទៅឃាត់ខ្លួនជនសង្ស័យ នាំមកសាកសួរ។ នៅពេលនោះ ជនសង្ស័យបានសារភាពប្រាប់សមត្ថកិច្ចថា រូបគេពិតជាបានចាប់រំលោភប្អូនថ្លៃបានសម្រេចជាច្រើនលើកច្រើនសា ដូចការចោទប្រកាន់ប្រាកដមែន។
ក្រោយពេលទទួលបាននូវចម្លើយសារភាពបែបនេះ សមត្ថកិច្ចក៏បានកសាងសំណុំរឿង បញ្ជូនជនសង្ស័យទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕
