ភ្នំពេញ៖ បុរស ៣នាក់ បានបបួលនាំគ្នាចូលច្រៀងខារ៉ាអូខេសែនរីករាយថ្មី ប៉ះចំកន្លែងកាប់ស៊ី ដោយគ្រាន់តែផឹកស្រាបៀរដបចំនួន ១កេះ គិតលុយអស់ចំនួន ១៩៣ដុល្លារ បង្កឱ្យមានការភ្ញាក់ផ្អើល កាលពីវេលាម៉ោង១១និង៤៥នាទីយប់ ថ្ងៃទី២២ខែមករា ឆ្នាំ២០១៨ ស្ថិតនៅភូមិត្រពាំងល្វាចំណុចនៅក្នងភោជនីយដ្ឋាន និងខារ៉ាអូខេ សែនរីករាយថ្មី តាមបណ្តោយផ្លូវ២០០៤ ក្នុងសង្កាត់កាកាបទី១ ខណ្ឌពោធិ៍សែនជយ័ ។
តាមការបញ្ជាក់ពីបុរសជាភ្ញៀវម្នាក់ ក្នុងចំណោម ៣នាក់បានប្រាប់ឱ្យដឹងថា មុនពេលកើតហេតុ ពួកគាត់ទាំង៣នាក់បានបបួលគ្នាចូលច្រៀងខារ៉ាអូខេសែនរីករាយថ្មី តាំងពីម៉ោង ១០យប់ ។ ពេលចូលទៅដល់ក្នុងហាង បានកុំម្មង់ស្រាបៀរដបចំនួន១កេះតម្លៃ ៣៥ដុល្លារមិនបាន កុំម្មង់ម្ហូបទេ ព្រោះមានម្ហូប Free បន្ទាប់មក បុរសម្នាក់ក្នុងចំណោម ៣នាក់បានប្រាប់ទៅមេការខារ៉ាអូខេនោះថា ត្រូវការនារីអង្គុយកំដរម្នាក់មួយ ។
លុះពេលនារីកំដមកដល់ បានសុំហៅម្ហូបមួយចានហើយ បានបន្តិចស្រាប់តែមានបុក្គលិកលើកម្ហូបមកចាននហើយមួយចានទៀត ធ្វើឱ្យពួកគេមានការសង្ស័យបានសួរនាំទៅមិត្តភក្តិចូលរួមជាមួយគ្នាតើម្ហូបនេះអ្នកណាកុំម្មង់ មិត្តភក្តិ ៣នាក់ទៀតឆ្លើយថាមិនបានកុំម្មង់នោះទេ ។
ពេលនោះ ពួកគាត់ក៏មិនបានសួរវែងឆ្ងាយដែរ គិតតែពីនាំគ្នាផឹកស៊ីសប្បាយជាធម្មតា រហូតមកដល់ម៉ោងកើតហេតុខាងលើ បានហៅបុក្គលិកម្នាក់មកគិតលុយ ស្រាប់តែគិតអស់ប្រាក់ចំនួន ១៩៣ដុល្លារ ធ្វើឱ្យពួកគាត់ងឿងឆ្ងល់ ក៏បានសួរនាំទៅបុក្គលិកហាងនោះថា អស់ថ្លៃអីច្រើនម្ល៉េះ សូមគិតម្តងទៀតទៅ ទើបបុគ្គលិកអ្នកគិតលុយប្រាប់ថា ក្នុងនោះបានកុំម្មង់ម្ហូបអស់ ១៧ចាន ក្នុងមួយ ចានមានតម្លៃចាប់ពី ៥ដុល្លារដល់ ១០ដុល្លារ សរុបទាំងអស់ ១៩៣ដុល្លារ ក៏ធ្វើឱ្យមានការផ្អើលឆោឡោពេញខារ៉ាអូខេ និងមានស្រ្តីម្នាក់មិនដឹងថាជាបុគ្គលិក ឬក៏ថៅកែស្រីទេ បានយកទូរស័ព្ទមកថតឡាយ ដោយនិយាយថា មានភ្ញៀវចូលផឹកស៊ីច្រៀងខារ៉ាអូខេអត់ឱ្យលុយ ។
ក្រោយពេលកើតហេតុ ផ្អើលដល់សមត្ថកិច្ចមូលដ្ឋានចុះទៅដល់កន្លែងកើតហេតុបាន និយាយថា ជារឿងដដែលៗកើតមានស្ទើររាល់យប់ ធ្វើឱ្យសមត្ថកិច្ចរកពេលដេកពួនមិនបានទេ ។ បន្ទាប់ពីកើតហេតុ ថៅកែហាងបានចេញមុខសម្របសម្រួលជាមួយភ្ញៀវ ចំណែកភ្ញៀវទាំង ៣នាក់មិនចង់មានរឿងវែងឆ្ងាយសុខចិត្តសងសំណង ១៩៣ដុល្លារបញ្ចប់រឿង ៕
