ខេត្តពោធិ៍សាត់៖ រថយន្តមួយគ្រឿង បានបើកបោះពួយយ៉ាងលឿន រេចង្កូតខុសផ្លូវ ក្រឡាប់ជាច្រើនត្រឡប់ បណ្ដាលឲ្យមនុស្សម្នាក់ស្លាប់យ៉ាងអណោចអធ័ម កាលពីវេលាម៉ោង២ និង១៤នាទីរំលងអធ្រាត្រ ឈានចូលថ្ងៃទី២២ ខែមករា ឆ្នាំ២០១៨ នៅលើកំណាត់ផ្លូវជាតិលេខ៥៥ នៅលើចំណុចភ្នំចិនយំ ស្ថិតក្នុងភូមិស្ទឹងថ្មី ឃុំប្រមោយ ស្រុកវាលវែង។
មន្ត្រីប៉ុស្ដិ៍នគរបាលរដ្ឋបាលប្រមោយ បានឲ្យដឹងថា ជនរងគ្រោះ ទី១-ឈ្មោះ ផល ភេទប្រុស អាយុ២៣ឆ្នាំ មុខរបរជាអ្នកបើកបរ (ស្លាប់) ទី២-ឈ្មោះ ជួន ជឿន ភេទប្រុស អាយុ៥៥ឆ្នាំ ទី៣-ឈ្មោះ ជឿន វិសិដ្ឋ ភេទប្រុស អាយុ២៨ឆ្នាំ និងទី៤-ឈ្មោះ អាត់ ពៅ ភេទស្រី អាយុ៥២ឆ្នាំ ពួកគេទាំង៣ រងរបួសធ្ងនស្រាល។ ជនរងគ្រោះទាំងអស់គឺជាគ្រួសារតែមួយ រស់នៅភូមិទេពអរជូន ឃុំកោះខែល ស្រុកស្អាង ខេត្តកណ្ដាល។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញរថយន្តមួយគ្រឿង ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ចាម 3A-0098 ដឹកអំពៅ ក្នុងទិសដៅពីស្រុកវាលវែងឆ្ពោះទៅកាន់ទីរួមខេត្តពោធិ៍សាត់។ លុះពេលរថយន្តបើកមកដល់កន្លែងកើតហេតុ ដែលចជាទីចុះចំណោត ក៏ជាន់ហ្វ្រាំងមិនស៊ី ធ្វើឲ្យរថយន្តក្រឡាប់៤-៥ត្រឡប់ ធ្លាក់ពីលើផ្លូវកម្ពស់ប្រមាណជាង១០ម៉ែត្រ បណ្ដាលឲ្យសង្កត់អ្នកជិះក្នុងរថយន្ដស្លាប់ម្នាក់ របួសធ្ងន់ស្រាលចំនួន៣នាក់។
ក្រោយពេលកើតហតុ សមត្ថកិច្ចបានចុះទៅពិនិត្យ និងបញ្ជូនជនរងគ្រោះទាំង៣នាក់ទៅព្យាបាលនៅមន្ទីរពេទ្យបង្អែកខេត្តពោធិ៍សាត់ ហើយធ្វើកំណត់ហេតុ ប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី៕
