ខេត្តកំពង់ធំ៖ ស្រ្ដីម្នាក់គ្រាន់តែប្ដីយកទូរស័ព្ទរបស់នាងទៅប្រើ ស្រាប់តែផ្ទុះកំហឹងយ៉ាងខ្លាំង យកស្រាមកផឹកស្រវឹង ហើយចងកសម្លាប់ខ្លួន បង្កឲ្យភ្ញាក់ផ្អើលឡើង កាលពីវេលាម៉ោង៧ និង២០នាទីយប់ ថ្ងៃទី២០ ខែធ្នូ ឆ្នាំ២០១៨ នៅក្នុងផ្ទះរបស់ស្ត្រីរងគ្រោះ ស្ថិតក្នុងភូមិស្រយូវត្បូង សង្កាត់ស្រយូវ ក្រុងស្ទឹងសែន។
លោកអនុសេនីយ៍ត្រី ស៊ឹម ពិសិទ្ធ នាយរងប៉ុស្តិ៍ស្រយូវ បានឲ្យដឹងថា ជនរងគ្រោះ ឈ្មោះ ជុក សុភី អាយុ៣៤ឆ្នាំ មុខរបរជាមេផ្ទះ មានប្ដីឈ្មោះ ឃិន សារី អាយុ៤៤ឆ្នាំ។ គ្រួសារនេះរស់នៅភូមិ-សង្កាត់កើតហេតុខាងលើ ហើយជនរងគ្រោះបានស្លាប់ ដោយសារយកស្បង់ព្រះសង្ឃមកចងកនឹងធ្នឹមផ្ទះសម្លាប់ខ្លួន។
លោកនាយរងប៉ុស្តិ៍ស្រយូវ បានតាមការសាកសួរព័ត៌មានពីសាច់ញាតិ បានឲ្យដឹងថា មុនពេលកើតមាននូវគ្រោះអកុសលនោះ ប្ដីរបស់ជនរងគ្រោះ បានយកទូរស័ព្ទរបស់នាងមកប្រើ ពីព្រោះទូរស័ព្ទរបស់គេខូច។ នៅពេលនោះ ស្រាប់តែពួកគេទាំង២នាក់ មានការឈ្លោះប្រកែកគ្នាមួយប្រាវ ក៏បាត់ទៅវិញ ហើយប្ដីរបស់នាងបានយកទូរស័ព្ទនោះមកឲ្យវិញ រួចហើយគេបានចុះពីលើផ្ទះដើរទៅបាត់ទៅ។ លុះមួយស្របក់ក្រោយមក បុរសជាប្ដីបានត្រឡប់មកផ្ទះវិញ ស្រាប់តែឃើញប្រពន្ធរបស់ខ្លួនបានចងកសម្លាប់ខ្លួន ស្លាប់បាត់ទៅហើយ។
ក្រោយពេលកើតហេតុ សមត្ថកិច្ចបានចុះទៅពិនិត្យ និងធ្វើកោសល្យវិច័យ ហើយនៅលើខ្លួនសាកសពរបស់ជនរងគ្រោះ មានធុំក្លិនស្រាទៀតផង ដូច្នេះសមត្ថកិច្ចបានសន្និដ្ឋានថា ជនរងគ្រោះ ប្រហែលជាផឹកស្រា មុននឹងសម្រេចចិត្តចងកសម្លាប់ខ្លួន។ បន្ទាប់មក សមត្ថកិច្ចបានប្រគល់សាកសពឲ្យសាច់ញាតិ និងបងប្អូន ចាត់ចែងធ្វើបុណ្យតាមប្រពៃណី៕