បុរសម្នាក់ បើករថយន្តមួយគ្រឿង ក្នុងស្ថានភាពស្រវឹងស្រារេ ចង្កូតពេញផ្លូវជ្រុលទៅបុក នឹងក្បាលនាគពុះចែកទ្រូងផ្លូវ ហើយជ្រុលចង្កូតទៅមុខ៤០ម៉ែត្រ ឡើងសួនច្បារបុកដើមគរ ទៅមុខលែងរួច អ្នកបើករងរបួសធ្ងន់។ ហេតុការគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១១និង២០នាទីយប់ ថ្ងៃទី២០ ខែមករា ឆ្នាំ២០១៨ ស្ថិតតាមបណ្តោយផ្លូវលេខ៥៩៨ ត្រង់ចំនុចមុខបណ្ណាល័យហ៊ុនសែន សង្កាត់ទឹកល្អក់ទី១ ខណ្ឌទួលគោក។
រថយន្តបង្កម៉ាកឆែរ៉ូលែត ពណ៌កណ្តុរប្រម៉េះ ពាក់ស្លាកលេខភ្នំពេញ 2AT-1718 រងការខូចខាតយ៉ាងដំណំ អ្នកបើកបរមិនត្រូវបាន គេស្គាល់អត្តសញ្ញាណនោះទេ រងរបួសធ្ងន់ធ្ងរ បែកក្បាលហូរឈាមស្រោចពេញខ្លួន ក្រោយកើតហេតុ ត្រូវបានក្រុមគ្រួសារ យករថយន្តមួយគ្រឿងទៀត មកដឹកទៅបាត់។
ប្រភពពត៌មាន ពីកន្លែងកើតហេតុ បានឲ្យដឹងថា នៅពេលកើតហេតុ គេឃើញរថយន្តបង្កបើកបរ តាមផ្លូវលេខ៥៩៨ ក្នុងទិសដៅពីត្បូងទៅជើង ក្នុងស្ថានភាពស្រវឹងស្រា បើករេពេញផ្លូវ
ខណៈមកដល់ ចំណុចកើតហេតុ ក៏ជ្រុលចង្កូតទៅបុកនឹងក្បាលនាគ ពុះចែកទ្រូងផ្លូវ គ្រាន់តែរលាត់ថ្នាំតិចតួច ហើយរថយន្តបង្ក បានជ្រុលចង្កូតទៅមុខប្រមាណ៤០ម៉ែត្រ ឡើងសួនច្បារទៅបុកដើមគរ ទៅមុខលែងរួច ធ្វើឲ្យរថយន្តខ្ទេចមួយកំណាត់មុខ យ៉ាងដំណំ រីឯបើកបររងរបួសបែកក្បាល ហូរឈាមស្រោចពេញខ្លួន ក្រោយកើតហេតុត្រូវបានក្រុមគ្រួសារ យករថយន្តមួយគ្រឿងទៀត មកដឹកយកទៅបាត់។
បើតាមអ្នកបើកបររថយន្តបង្ក បាននិយាយទាំងវង្វេងវង្វាន់ថា មូលហេតុដែលរូបគាត់ បើកទៅបុកដើមគរនោះ ដោយសារតែមានម៉ូតូមួយគ្រឿង មិនចាំម៉ាក បើកបរជ្រែពីមុខរថយន្តរបស់គាត់ ហើយរូបគាត់បានបើកគេចពីម៉ូតូ ទើបធ្វើឲ្យគាត់បួងចង្កូត គេចមកខាងស្តាំដៃជ្រុលចង្កូត ឡើងសួនច្បារបុកដើមគរ នឹងរងរបួសបែបនេះតែម្តង។
បច្ចុប្បន្នរថយន្តបង្ក ត្រូវបានសមត្ថកិច្ចជំនាញ ចុះមកធ្វើការវាស់វែង យកទៅរក្សាទុកនៅការយាល័យ ចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំម្ចាស់រថយន្តបង្កចូលខ្លួនដោះស្រាយ ៕
