ភ្នំពេញ៖ សាលាដំបូងរាជធានីភ្នំពេញ នៅព្រឹក ថ្ងៃទី២៩ ខែធ្នូ ឆ្នាំ២០១៧នេះ បានកាត់ក្ដីលើសំណុំរឿងបរិហារកេរ្តិ៍ប្រមុខរដ្ឋាភិបាល តាមបណ្ដាញហ្វេសប៊ុក ដោយសម្រេចឲ្យលោក សម រង្ស៊ី អតីតប្រធានគណបក្សសង្គ្រោះជាតិ ចាញ់ និងសងជំងឺចិត្តសម្ដេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំនួន៤ពាន់លានរៀល (១លានដុល្លារ) និងបង់ពិន័យចូលក្នុងថវិការដ្ឋ ចំនួន១០លានរៀល។
សេចក្តីសម្រេចនេះ ចេញដោយលោក ហេង សុខណា ចៅក្រមជំនុំជម្រះ នៃសាលាដំបូងរាជធានីភ្នំពេញ។ លោក សម រង្ស៊ី អតីតប្រធានគណបក្សសង្គ្រោះជាតិ បានចាញ់ក្តីសម្ដេចនាយករដ្ឋមន្ត្រី ហ៊ុន សែន ជាថ្មីម្តងទៀត នៅក្នុងសំណុំរឿងបរិហាកេរ្តិ៍ កាលពីមួយឆ្នាំមុន។ តាមរយៈសេចក្តីសម្រេច នៅថ្ងៃនេះ តុលាការបានបង្គាប់ឲ្យលោក សម រង្ស៊ី សងប្រាក់ជំងឺចិត្តដល់ដើមបណ្តឹង ចំនួន៤ពាន់លានរៀល និងបង់ប្រាក់ពិន័យចូលក្នុងថវិការដ្ឋ ចំនួន១០លានរៀល។
លោក គី តិច មេធាវីសម្ដេចនាយករដ្ឋមន្ត្រី ហ៊ុន សែន បានដាក់ពាក្យបណ្ដឹង ប្រឆាំងនឹងលោក សម រង្ស៊ី ពីបទបរិហារកេរ្តិ៍ជាសាធារណៈ តាមមាត្រា៣០៥ នៃក្រមព្រហ្មទណ្ឌ កាលពីថ្ងៃទី១៨ ខែមករា ឆ្នាំ២០១៧។
ពាក្យបណ្តឹងទាមទារសំណងជាទឹកប្រាក់ ចំនួន១លានដុល្លារអាមេរិកនោះ បានកើតឡើង ក្រោយពីលោក សម រង្ស៊ី បានថ្លែងតាមបណ្តាញសង្គមហ្វេសបុក ដោយចោទប្រកាន់សម្ដេចនាយករដ្ឋមន្ត្រី ហ៊ុន សែន ថា បានសូកប៉ាន់កញ្ញា ធី សុវណ្ណថា ១លានដុល្លារអាមេរិក ដើម្បីឲ្យអតីតអ្នកគាំទ្រគណបក្សប្រឆាំងដ៏សកម្មរូបនេះ វាយប្រហារទៅលើអតីតគណបក្សសង្គ្រោះជាតិ ដែលខ្លួនធ្លាប់គាំទ្រវិញ។ ជាលទ្ធផល នៅក្នុងសវនាការ នាព្រឹក ថ្ងៃទី២៩ ខែធ្នូ ឆ្នាំ២០១៧នេះ លោក ហេង សុខណា ចៅក្រមជំនុំជម្រះ នៃសាលាដំបូងរាជធានីភ្នំពេញ បានបង្គាប់ឲ្យលោក សម រង្ស៊ី ដែលបច្ចុប្បន្នកំពុងនិរទេសខ្លួន នៅក្រៅប្រទេស ត្រូវសងជំងឺចិត្តទៅដើមបណ្តឹង គឺសម្ដេចនាយករដ្ឋមន្ត្រី ហ៊ុន សែន នូវទឹកប្រាក់ចំនួន៤ពាន់លានរៀល និងពិន័យជាប្រាក់ ដាក់ចូលទៅក្នុងថវិការដ្ឋ ចំនួន១០លានរៀល។
លោក សំ សុខគង់ មេធាវីលោក សម រង្ស៊ី បានសម្ដែងនូវការមិនពេញចិត្ត ចំពោះការសម្រេចរបស់តុលាការនោះឡើយ។ លោកបានថ្លែងប្រាប់សារព័ត៌មានថា ការសម្រេចបែបនេះ មិនផ្ដល់នូវយុត្តិធម៌ដល់កូនក្តីលោកនោះឡើយ។ ដូច្នេះលោកនឹងពិភាក្សាជាមួយលោក សម រង្ស៊ី ដើម្បីបន្តប្ដឹងទៅសាលាឧទ្ធរណ៍ ជំទាស់នឹងសេចក្តីសម្រេចរបស់សាលាដំបូងនេះ។
យ៉ាងណាក៏ដោយ លោក សម រង្ស៊ី អតីតប្រធានគណបក្សសង្គ្រោះជាតិ ធ្លាប់បានអះអាងថា លោកមិនខ្វល់ខ្វាយពីពាក្យបណ្តឹងទាំងនោះឡើយ។
គួរបញ្ជាក់ថា នេះមិនមែនជាបណ្តឹងទី១ ដែលកំពុងរុំព័ទ្ធទៅលើអតីតប្រធានគណបក្សប្រឆាំងលោក សម រង្ស៊ី នោះទេ។ មានពាក្យបណ្តឹងយ៉ាងតិចចំនួន៩ឯណោះ ដែលកំពុងចាក់ស្រេះ លើខ្លួនប្រាណរបស់អតីតប្រធានគណបក្សសង្គ្រោះជាតិរូបនេះ ក្នុងនោះ៥បណ្តឹងត្រូវបានតុលាការកាត់ក្តីរួចរាល់ហើយ។ រីឯ៤បណ្តឹងទៀតកំពុងស្ថិតនៅក្នុងដៃរបស់តុលាការនៅឡើយ។ ពាក្យបណ្តឹងភាគច្រើន គឺប្តឹងដោយមន្ត្រីជាន់ខ្ពស់របស់រដ្ឋាភិបាល និងមេដឹកនាំគណបក្សប្រជាជនកម្ពុជា។ ចុងក្រោយនេះ លោក សម រង្ស៊ី កំពុងរងនូវពាក្យបណ្តឹងជាថ្មីមួយទៀត មកពីក្រុមមេដឹកនាំយោធាកម្ពុជា ពីបទញុះញង់ កុំឲ្យកងទ័ពស្តាប់បញ្ជាមេបញ្ជាការ និងធ្វើឲ្យខូចទឹកចិត្តកងទ័ព។ ពាក្យបណ្តឹងនេះ បានទៅដល់ដៃតុលាការក្រុងភ្នំពេញ កាលពីអំឡុងដើមខែធ្នូ ឆ្នាំ២០១៧នេះ៕
