ខេត្តកណ្ដាល៖ បុរសម្នាក់ជិះម៉ូតូទៅរាយបង្កៃត្រី ក៏ត្រូវជនសង្ស័យមួយក្រុមវាយឲ្យរងរបួសធ្ងន់ កាលពីវេលាម៉ោង២រសៀល ថ្ងៃទី៧ ហើយនាំគ្នាគេចខ្លួនបាត់ តែត្រូវសមត្ថកិច្ចឃាត់ខ្លួនបានម្នាក់ កាលពីថ្ងៃទី៨ ខែធ្នូ ឆ្នាំ២០១៧ ស្ថិតក្នុងភូមិព្រែកតាដុល ឃុំពោធិ៍បាន ស្រុកកោះធំ។
មន្ត្រីនគរបាលស្រុកោះធំ បានឲ្យដឹងថា ជនសង្ស័យជាប់ពាក់ព័ន្ធ នឹងអំពើហិង្សានោះ ទី១-ឈ្មោះ ជា បូរ៉ា ភេទស្រី អាយុ ៣០ឆ្នាំ ជនជាតិខ្មែរ មុខរបរជាកម្មការិនីរោងចក្រ (ឃាត់ខ្លួន) មានលំនៅ នៅភូមិព្រែកតាដុល ឃុំពោធិ៍បាន ស្រុកកោះធំ ខេត្តកណ្ដាល ទី២-ឈ្មោះ ឃុល បូរា ភេទប្រុស អាយុ ២៥ឆ្នាំ មុខរបរជាកសិករ (គេចខ្លួន) មានលំនៅក្នុងភូមិព្រែកតាដុល ឃុំពោធិ៍បាន ស្រុកកោះធំ ខេត្តកណ្ដាល និងទី៣-ឈ្មោះ ស្រឿង ក្រត ភេទប្រុស អាយុ២៣ឆ្នាំ មុខរបរជាកសិករ (គេចខ្លួន) រស់នៅភូមិព្រែកតាដុល ឃុំពោធិ៍បាន ស្រុកកោះធំ ខេត្តកណ្ដាល។ រីឯជនរងគ្រោះ ឈ្មោះ ទក ធី ភេទប្រុស អាយុ២៨ឆ្នាំ មុខរបរកសិករ រស់នៅភូមិព្រែកតាដុល ឃុំពោធិ៍បាន ស្រុកកោះធំ ខេត្តកណ្ដាល។
ប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានទៅបង់សំណាញ់ នៅក្នុងប្រឡាយ៣៨ ក៏បានជួបនឹងជនសង្ស័យ ឈ្មោះ ជុល បូរ៉ា និងឈ្មោះ ស្រឿង ក្រត ។ បន្ទាប់មកពួកគេបានទាក់ពាក្យគ្នាជាមួយនឹងជនសង្ស័យទាំងពីរ ពីបញ្ហារឿងដាក់មងបីជាន់ និងដើរឆក់ត្រី។
ភ្លាមៗនោះ ជនរងគ្រោះបាននិយាយទៅកាន់ឈ្មោះឃុល បូ រា និងស្រឿង ថាបងឯងរកអីរកទៅ កុំមកក្បែរកន្លែងបង់ត្រីរបស់ខ្ញុំ។ ឮបែបនេះ ជនសង្ស័យក៏បានឆ្លើយថា អញចង់រក អញចង់កូរ អីស្រេចតែអញ។ លុះរំលងបានចំនួន៥ថ្ងៃ ពោលគឺនៅថ្ងៃកើតហេតុ ជនរងគ្រោះបានជិះម៉ូតូទៅបង្កៃសន្ទូច ក៏ជួបនឹងជនសង្ស័យ ឈ្មោះ ស្រឿង ក្រត ស្រាប់តែឈ្មោះ ស្រឿង ក្រត បានកៀរម៉ូតូជនរងគ្រោះ និងបានហៅឈ្មោះ ឃុល បូរា និងប្រពន្ធឈ្មោះ ជា បូរ៉ា ឲ្យមកព្រួតវាយជនរងគ្រោះ។ ភ្លាមនោះ ឃុល បូរ៉ា និងជា បូរ៉ាបាននាំគ្នាទៅដល់ រួចបានចូល វាយជនរងគ្រោះ ទក ធី នឹងដុំឈើ បណ្ដាលឲ្យរងរបួសរយះចិញ្ចើមខាងឆ្វេង ដេរចំនួន៣ធ្នេរ និងរបួសធ្ងន់ត្រង់ក្បាលផ្នែកខាងក្រោយ រួចបានរត់គេចខ្លួនបាត់។
ក្រោយពេលកើតហេតុ ជនរងគ្រោះបានមកដាក់ពាក្យបណ្ដឹងនៅប៉ុស្ដិ៍រដ្ឋបាលពោធិ៍បាន ទើបសមត្ថកិច្ចមូលដ្ឋាន និងស្រុកកោះធំ ចុះទៅឃាត់ខ្លួនជនសង្ស័យបានម្នាក់ និងរត់គេចខ្លួនបាត់២នាក់៕
