ខេត្តពោធិ៍សាត់៖ ស្រ្ដីចំណាស់ម្នាក់បានចូលងូតទឹក នៅក្នុងបន្ទប់ទឹក លុះពេលបើកទ្វារចេញមកវិញ ក៏ត្រូវចរន្តអគ្គិសនីឆក់ស្លាប់ចោលកូន៤នាក់ កាលពីវេលាម៉ោង៧យប់ ថ្ងៃទី៧ ខែធ្នូ ឆ្នាំ២០១៧ នៅភូមិពោធិ៍ដំណាក់ ឃុំវាល ស្រុកកណ្តៀង។
មន្រ្ដីនគរបាមូលដ្ឋាន បានឲ្យដឹងថា ស្រ្ដីរងគ្រោះ ឈ្មោះ ពៅ ហាង អាយុ៥៦ឆ្នាំ រស់នៅភូមិពោធិ៍ដំណាក់ ឃុំវាល ស្រុកកណ្តៀង ខេត្តពោធិ៍សាត់ ហើយគាត់មានកូនប្រុសចំនួន៤នាក់។ ជនរងគ្រោះ បានស្លាប់ដោយសារចរន្តអគ្គិសនីឆក់។
ប្រភពព័ត៌មានពីអ្នកភូមិ បានឲ្យដឹងថា មុនពេលកើតមាននូវគ្រោះអកុសលនោះ ជនរងគ្រោះ បានចូលទៅងូតទឹក នៅក្នុងបន្ទប់ទឹក ជាប់នឹងផ្ទះរបស់គាត់។ លុះពេលគាត់ងូតទឹករួចហើយ ក៏បើកទ្វារបម្រុងចេញមកខាងក្រៅវិញ ស្រាប់តែត្រូវចរន្តភ្លើងឆក់ បង្កឲ្យភ្ញាក់ផ្អើលដល់ក្រុមគ្រួសារ ស្រែកហៅអ្នកស្រុកឲ្យជួយដឹកជនរងគ្រោះបញ្ជូនទៅសង្គ្រោះនៅក្នុងមន្ទីរពេទ្យបង្អែកខេត្តពោធិ៍សាត់។ ប៉ុន្តែជាអកុសល នៅពេលបញ្ជូនទៅដល់មន្ទីរពេទ្យ ជនរងគ្រោះបានដាច់ខ្យល់ស្លាប់បាត់ទៅហើយ។
មន្ត្រីនគរបាលស្រុកកណ្ដៀង បានឲ្យដឹងថ បន្ទាប់ពីទទួលបាននូវព័ត៌មានបែបនេះភ្លាម សមត្ថកិច្ចមូលដ្ឋាន និងនគរបាលជំនាញក៏បានចុះពិនិត្យកន្លែងកើតហេតុ ឃើញថា មានខ្សែភ្លើងមួយខ្សែតភ្ជាប់ពីផ្ទះជនរងគ្រោះចូលមកក្នុងបន្ទប់ទឹក ហើយខ្សែភ្លើងនោះគងពីលើទ្វារសង្គ័សី និងមានស្នាមដាច់រលាត់។ ដូច្នេះសមត្ថកិច្ចបានសន្និដ្ឋានថា ករណីនេះ គឺបណ្តាលមកពីឆ្លងចរន្តភ្លើង ពីខ្សែទៅនឹងទ្វារសង័្កសី ទើបបណ្តាលឱ្យឆក់ជនរងគ្រោះស្លាប់បែបនេះ។
ក្រោយពេលពិនិត្យរួច សមត្ថកិច្ចបានប្រគល់សាកសពរបស់ជនរងគ្រោះ ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី៕