បុរសម្នាក់ ជាអ្នកលក់ទូរស័ព្ទ តាមអនឡាញ ពេលចូលកំសាន្តនៅក្នុងមជ្ឃមណ្ឌលរ៉ក់ ហើយស្រវឹងស្រាខ្លាំងពេក ចូលដេកក្នុងរថយន្ត ម៉ាកតូយ៉ូតាព្រូសមួយគ្រឿង រហូតដេកស្លាប់គ្មាននរណាដឹង បង្កឲ្យមានការភ្ញាក់ផ្អើល កាលពីវេលាម៉ោង៤ទៀបភ្លឺ ថ្ងៃទី០៩ ខែធ្នូ ឆ្នាំ២០១៧ នៅមុខមជ្ឈមណ្ឌលរ៉ក តាមផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន ។
សមត្ថកិច្ចបានប្រាប់ថា សពបុរសដែលស្លាប់ ក្នុងរថយន្តមានឈ្មោះ ហេង សីហា អាយុ៣៣ឆ្នាំ មុខរបរលក់ទូរស័ព្ទ តាមអនឡាញ ស្នាក់នៅផ្លូវបេតុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ ដេកស្លាប់ក្នុងរថយន្ត របស់មិត្តភក្តិម៉ាក តូយ៉ូតាព្រូស ពណ៌ស ពាក់ស្លាកលេខភ្នំពេញ ២AM ២១៨៦ ។
ស្រ្តីជាម្ដាយបង្កើតសព មានឈ្មោះ អួន មុំ អាយុ៦៥ឆ្នាំ មុខរបរលក់ដូរ ស្នាក់នៅផ្ទះលេខ០៤ ផ្លូវជាតិលេខ១ ភូមិព្រែក សង្កាត់ច្បារអំពៅទី១ ខណ្ឌច្បារអំពៅ បានប្រាប់អ្នកយកព័ត៌មានថា មុនកើតហេតុ នៅវេលាទៀបភ្លឺ មានមិត្តភក្តិប្រុស របស់កូនប្រុសគាត់ បានមកគោះទ្វារផ្ទះ គាត់បានបើកទ្វារសួរថា មានរឿងអី ក៏ត្រូវមិត្តភក្តិនោះប្រាប់ថា កូនប្រុសរបស់គាត់ ដេកស្លាប់ក្នុងរថយន្ត បន្ទាប់ពីផឹកស្រវឹង ហើយរត់ចូលទៅដេក ក្នុងរថយន្តព្រូស ចតនៅក្នុងបរិវេណមជ្ឃមណ្ឌលរ៉ក ពេលលឺសំដីរបស់ មិត្តភ័ក្រ្តកូនគាត់ហើយ គាត់សឹងតែមិនជឿ ព្រោះកូនរបស់គាត់ មិនដែលមានជំងឺអ្វីទាល់តែសោះ ។ ក្រោយមក គាត់បានចុះទៅដល់កន្លែងកើតហេតុ បានស្នើអោយសមត្ថកិច្ច ធ្វើកោសល្យវិច្ច័យ អោយបានច្បាស់លាស់ពីមូលហេតុ។
ស្រ្តីជាម្ដាយសព បានបន្តទៀតថា សព្វថ្ងៃគាត់មានកូនចំនួន៤នាក់ ប្រុស៣ស្រី១ កូនដែលស្លាប់ជាកូនទី៤ បានរៀបការនិងមានចំណងដៃ កូនប្រុសអាយុ៤ឆ្នាំហើយ ប៉ុន្តែប្រពន្ធរបស់គេ បានស្លាប់ពេលកូនប្រុស អាយុ១ឆ្នាំ ដោយសារមានជំងឺ ឈាមសស៊ីឈាមក្រហម សព្វថ្ងៃចៅប្រុសគាត់ បានរស់នៅនិងការគ្រប់គ្រង នៅខាងម្តាយក្មេករបស់គេ។
សមត្ថកិច្ចបានសួរនាំមិត្តភក្កិ របស់ជនរងគ្រោះ មានឈ្មោះ សិរី នរិន្ទ ភេទប្រុស អាយុ៣៣ឆ្នាំ មុខរបរមន្រ្តីព្រឹទ្ឋសភា ស្នាក់នៅផ្ទះលេខ១៦១ ផ្លូវបេតុង សង្កាត់ព្រែកឯង ខណ្ឌច្បារអំពៅ បានបំភ្លឺជាមួយ និងសមត្ថកិច្ចឲ្យដឹងថា ជនរងគ្រោះបានបបួលមិត្តភ័ក្រ្ត ប្រុស៣នាក់ រួមនិងគាត់មកផឹកស៊ី តាំងពីថ្ងៃត្រង់ គឺផឹកនៅកែបថ្មី យីហោ៥៥៥ នៅសង្កាត់ព្រែកឯង ខណ្ឌច្បារអំពៅ ។ លុះពេលផឹកដល់យប់បន្តិច ក៏នាំគ្នាជិះរថយន្តព្រូស ទៅផឹកបន្តនៅហាងខាងក្រោយ ក្រសួងរៀបចំដែនដីនគរូបនីយ៍កម្ម សុរិយោដី និងសំណង់ រហូតដល់យប់ជ្រៅ ក៏បន្តមកផឹកនៅមជ្ឃមណ្ឌលរ៉ក បន្ទប់ខោរ៉ាអូខេ ខណៈពេលចូលបានមួយសន្ទុះ បុរសរងគ្រោះជាមិត្តភក្តិប្រាប់ថា សុំខ្ចីសោរថយន្ត ព្រោះរូបគេស្រវឹង ផឹកលែងបានទៀតហើយ ទៅដេកចាំក្នុងរថយន្តមុន ចំណែករូបគាត់នៅផឹកបន្ត រហូតដល់ម៉ោង៣និង៣០នាទីទៀបភ្លឺ បានគិតលុយបន្ទប់ អោយគេរួច រៀបចំចេញទៅផ្ទះវិញ ស្រាប់តែឃើញបុរសជាមិត្តភក្តិ ដេកក្នុងរថយន្ត មិនមានពាក់អាវ ហើយគោះទ្វារយ៉ាងម៉េច ក៏មិនព្រមឆ្លើយតបវិញសោះ ក្រោយមកក៏ហៅសន្តិសុខ នៅរ៉ក់ អោយមកជួយរហូតដល់ ក្រោយមកសមត្ថកិច្ច ចុះមកពិនិត្យបុរសជាមិត្តភ័ក្រ្តខ្លួន សង្ស័យខ្យល់គរស្លាប់ក្នុងរថយន្ត។
សមត្ថកិច្ចនគរបាល បច្ចេកទេសកោសល្យវិច្ឆ័យ ស្នងការរាជធានីភ្នំពេញ និងមានពេទ្យអមសាលាដំបូង រាជធានីភ្នំពេញបានប្រាប់ថា ក្រោយពីត្រួតពិនិត្យ ជុំវិញបរិវេណ រថយន្តព្រូសរួចហើយ រថយន្តជាប់សោ ក៏បានអោយជាងសោ មកធ្វើសោបើកមើលខាងក្នុង ខាងក្រៅ មិនមានអ្វីស្លាកស្នាម ទើបសន្និដ្ឋានថា ខ្យល់គស្លាប់ ឬដេកថប់ដង្ហើម ដោយសាររថយន្តបានពន្លត់ម៉ាស៊ីនផងដែរ ។
ការសន្និដ្ឋានជំហានដំបូង ដោយបូមឈាម និងទឹកនោមយកទៅធ្វើតេស្ត ដើម្បីចង់ដឹងថា សពមានប្រើប្រាស់ សារធាតុញៀនដែរឬទេ ។ សពបានប្រគល់អោយក្រុមគ្រួសារ ដឹកសពតាមរថយន្តរបស់ នគរបាលបច្ចេកទេស យកទៅវត្តនិរោធ ដើម្បីយកទៅធ្វើបុណ្យតាមប្រពៃណី ចំណែករថយន្តដែល បុរសរងគ្រោះដេកស្លាប់នោះ ត្រូវយករក្សាទុក នៅនគរបាលប៉ុស្តិ៍ ជាបណ្ដោះអាសន្នសិនរងចាំត្រួតពិនិត្យ រួចរាល់និងអោយយក ត្រលប់ទៅវិញ ៕