ភ្នំពេញ៖ ក្រោយពេលគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ បដិសេធនូវការទទួលយកអាសនៈរបស់ខ្លួនទាំង១១កៅអី ដែលបានមកពីការំលាយគណបក្សសង្គ្រោះជាតិនោះមក អតីតតំណាងរាស្រ្ដ២នាក់ ដែលបានជាប់ឆ្នោត ក្នុងកូតាគណបក្សសង្គ្រោះជាតិ មានឱកាសអង្គុយកៅអីតំណាងរាស្ត្ររបស់ខ្លួនឡើងវិញ ក្នុងកូតាគណបក្សប្រជាជនកម្ពុជា។
លោក វ៉ាន សំអឿន និងលោក ឡុង ប៊ុន្នី ជាអតីតមន្ត្រីបក្សប្រឆាំង បានចូលរួមជាបន្តបន្ទាប់ ក្នុងជីវភាពនយោបាយជាមួយគណបក្សកាន់អំណាច ស្ថិតក្នុងចំណោមតំណាងរាស្ត្រថ្មីចំនួន១១នាក់ តាមរយៈការបែងចែកអាសនៈ ដោយគណៈកម្មាធិការជាតិរៀបចំបោះឆ្នោត(គជប) ក្រោយការរំលាយគណបក្សសង្គ្រោះជាតិ និងការបដិសេធនូវការទទួលយកអាសនៈរបស់គណបក្សសម្ព័ន្ធដើម្បីប្រជាធិបតេយ្យ ដឹកនាំដោយលោក ខឹម វាសនា និងគណបក្សខ្មែរឈប់ក្រ ដឹកនាំដោយលោក ក្រវាញ ដារ៉ន។
លោក វ៉ាន សំអឿន បានជាប់ឆ្នោតជាតំណាងរាស្ត្រមណ្ឌលកំពត ក្នុងកូតាគណបក្សសង្គ្រោះជាតិ (CNRP) តែក្រោយមកលោកបានសម្រេចចិត្តទៅចូលរួមជាមួយគណបក្សប្រជាជនកម្ពុជា( CPP)វិញ កាលថ្ងៃទី១៣ ខែកុម្ភៈ ឆ្នាំ២០១៥។ ចំណែកលោក ឡុង ប៊ុន្នី អតីតតំណាងរាស្ត្រព្រៃវែង បានប្តូរជីវភាពនយោបាយរបស់ខ្លួន កាលពីអំឡុង ខែតុលា ឆ្នាំ២០១៧នេះ។ ចំពោះការជ្រើសតាំងថ្មីនេះ លោក ឡុង ប៊ុន្នី បានក្លាយជាតំណាងរាស្ត្រព្រៃវែងវិញ ខណៈលោក វ៉ាន សំអឿន ប្តូរទៅខេត្តកណ្តាល។
ដោយឡែកតំណាងរាស្ត្រថ្មី៩រូបផ្សេងទៀតរបស់គណបក្សដែលកំពុងតែគ្រប់គ្រងអំណាច( CPP)នោះ រួមមាន លោក សៀង ស៊ុតថង (តំណាងរាស្រមណ្ឌលខេត្តបាត់ដំបង) លោក អ៊ី សំអុល លោក ម៉ា ឈឿន និងលោកស្រី ខុន ស៊ុនអេង (តំណាងរាស្រ្ដមណ្ឌលខេត្តកំពង់ចាម) លោក គោស៊ុំ សារឿត (តំណាងរាស្រ្ដមណ្ឌលខេត្តកណ្តាល) លោក ជៀប ស៊ីវន លោក ពេជ្រ គឹមស្រ៊ាង និងលោក លី ឆេង (តំណាងរាស្រ្ដមណ្ឌលភ្នំពេញ) លោក ម៉ុម ស៊ីបុន (តំណាងរាស្រ្ដមណ្ឌលខេត្តព្រៃវែង)។
ជាមួយនឹងការបែងចែកអាសនៈរបស់អតីតគណបក្សសង្រ្គោះជាតិនោះ មន្ត្រីជាន់ខ្ពស់ នៃគណបក្សនេះ ក៏បានសើចចំអកឲ្យគណបក្ស ដែលទទួលយកអាសនៈពីការបែងចែកអាសនៈរបស់ខ្លួន ដោយបានវាយប្រហារ តាមបណ្តាញសង្គមហ្វេសប៊ុក ក្នុងន័យរិះគន់ និងសើចចំអកឲ្យគណបក្ស ដែលស្ម័គ្រចិត្តទទួលយកអាសនៈទាំងនោះ។ ការវាយប្រហារយ៉ាងធ្ងន់បំផុត តាមរយៈវោហារសាស្ត្រ បានធ្វើឡើងព្រមៗគ្នា ដោយសំដៅទៅលើគណបក្សទាំង៣ នៅពេលពួកគេបានចូលអង្គុយក្នុងរដ្ឋសភា ជាលើកដំបូង នៅថ្ងៃទី២៧ ខែវិច្ឆិកា ឆ្នាំ២០១៧។ ក្នុងចំណោមគណបក្សទាំងនោះ រួមមាន គណបក្សហ្វ៊ុនស៊ិនប៉ិច ដឹកនាំដោយសម្តេចក្រុមព្រះ នរោត្តម រណឫទ្ធិ គណបក្សសញ្ជាតិកម្ពុជា ដឹកនាំដោយ លោក សេង សុខេង និងគណបក្សខ្មែរអភិវឌ្ឍសេដ្ឋកិច្ច ដឹកនាំ ដោយលោក ហួន រាជចំរើន។
ជាមួយគ្នានេះ លោក សម រង្ស៊ី អតីតប្រធានគណបក្សសង្គ្រោះជាតិ ក៏បានស្នើឲ្យសហគមន៍អន្តរជាតិ មិនទទួលស្គាល់តំណាងរាស្ត្រក្លែងក្លាយ ដែលទើបតែទទួលបានតំណែង ដែលតាមអ្វីដែលលោក សម រង្ស៊ី ចោទថា សម្ដេច ហ៊ុន សែន បានប្លន់ពីគណបក្សសង្គ្រោះជាតិ យកទៅចែកឲ្យអ្នកទាំងនោះ»។ រីឯលោក អេង ឆៃអ៊ាង អតីតអនុប្រធានគណបក្សសង្គ្រោះជាតិ ក៏បានថ្លែងថា ពួកនេះហៅថាតំណាងអត់រាស្ត្រ»។
លោក អ៊ូ ច័ន្ទឫទ្ធិ អតីតប្រធានគណៈកម្មាធិការនាយក នៃគណបក្សសង្គ្រោះជាតិ ក៏បានបន្ទរថា «ក្រុមនេះ ជាតំណាងខ្យល់ គ្មានកិត្តិយសជាតំណាងរាស្ត្រទេ ព្រោះរាស្ត្រមិនបានបោះឆ្នោតឲ្យ»។
ស្របគ្នានេះ លោក យ៉ែម បុញ្ញឫទ្ធិ អតីតតំណាងរាស្ត្រ និងជាអតីតអ្នកនាំពាក្យគណបក្សសង្គ្រោះជាតិបានចាត់ទុកមន្ត្រីមកពីគណបក្សទាំង៣ ដែលទទួលយកអាសនៈរបស់បក្សខ្លួនថា «តំណាងបន្តុប ដែលពុំមានការគាំទ្រ ជាសន្លឹកឆ្នោតរបស់ប្រជាពលរដ្ឋគ្រប់គ្រាន់ សូម្បីតែមួយអាសនៈ ក៏គ្មានដែរ ស្រាប់តែពេលនេះ ពួកគេមិនញញើត និងឃុបឃិតគ្នាជាន់ឈ្លីឆន្ទៈរាស្ត្រ ព្រោះតែមហិច្ឆតាផ្ទាល់ខ្លួន»។
លោកស្រី ម៉េង សុភារី អតីតសមាជិកគណៈកម្មាធិការនាយកនៃគណបក្សសង្គ្រោះជាតិ និងមានអាជីពជាមេធាវី បាននិយាយាថា «តំណាងរាស្ត្រជាប់ឆ្នោត ដោយសាររាស្ត្រ។ តំណាងអត់រាស្ត្រ ជាប់ឆ្នោត ដោយសារកែច្បាប់»។
ក្រៅពីអតីតក្រុមអ្នកនយោបាយខាងលើនោះទេ អ្នកដែលមាននិន្នាការ និងបានបោះឆ្នោតឲ្យគណបក្សសង្គ្រោះជាតិកន្លងមក ក៏នាំគ្នាសម្រុកបោះពាក្យសម្តីបែបឌឺដងស្ទើររាល់ថ្ងៃ ទៅឲ្យគណបក្សទាំង៣ថែមទៀតផង។
ទោះជាយ៉ាង គណបក្សទាំង៣ ដែលទទួលយកអាសនៈទាំង៤៤ ដែលបានមកពីការរំលាយគណបក្សសង្រ្គោះជាតិ នៅតែអះអាងថា ទង្វើរបស់ពួកគេ គឺត្រឹមត្រូវទៅតាមច្បាប់ ហើយពួកគេ ក៏បង្ហាញពីការពេញចិត្ត ក្នុងការទទួលយកអាសនៈទាំងនោះដែរ។
នៅថ្ងៃចូលអង្គុយក្នុងរដ្ឋសភា ជំនួសគណបក្សសង្គ្រោះជាតិជាលើកដំបូង សម្តេចក្រុមព្រះ នរោត្តម រណឫទ្ធិ អតីតនាយករដ្ឋមន្ត្រីទី១ បានមានបន្ទូលទៅកាន់ក្រុមអ្នកកាសែតយ៉ាងដូច្នេះថា៖ «ខ្ញុំទទួលយក ដោយរីករាយជាទីបំផុត»។
អាសនៈទាំង៥៥របស់គណបក្សសង្គ្រោះជាតិ នៅក្នុងរដ្ឋសភា ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) បែងចែកទៅឲ្យគណបក្សនានា ក្រោយពេលតុលាការកំពូលបានសម្រេចរំលាយ តាមបណ្ដឹងរបស់ក្រសួងមហាផ្ទៃនោះ រួមមាន គណបក្សហ្វ៊ុនស៊ិនប៉ិច ទទួលបាន៤១អាសនៈ គណបក្សសញ្ជាតិកម្ពុជា ទទួលបាន២អាសនៈ និងគណបក្សខ្មែរអភិវឌ្ឍសេដ្ឋកិច្ច ទទួលបាន១អាសនៈ។ ដោយឡែកអាសនៈ១១ទៀតរបស់គណបក្សសង្គ្រោះជាតិ ត្រូវបានទៅលើគណបក្សប្រជាជនកម្ពុជា ទាំងអស់ ដោយសារគណបក្សតូចៗទាំង៣ខាងលើ មិនសំឡេងគ្រប់គ្រាន់។ ដូច្នេះនៅពេលនេះ គណបក្សដែលកំពុងតែកាន់អំណាច នាពេលបច្ចុប្បន្ន មានអាសនៈចំនួន៧៩។
ក្រោយពេលបែងចែកអាសនៈតំណាងរាស្រ្ដរបស់គណបក្សសង្រ្គោះជាតិរួចហើយនោះ គណៈកម្មាធិការជាតិរៀបចំការបោះឆ្នោត នឹងយកអាសនៈក្រុមប្រឹក្សាឃុំ-សង្កាត់របស់គណបក្សសង្រ្គោះជាតិ ទៅបែងចែកឲ្យគណបក្សនានាដែលបានចូលរូមការបោះឆ្នោត នាពេលកន្លងមក បន្តទៀត៕
