ភ្នំពេញ៖ បន្ទាប់ពីតុលាការកំពូលបានសម្រេចរំលាយគណបក្សសង្គ្រោះជាតិ និងដាក់បម្រាមដល់មន្ត្រីជាន់ខ្ពស់របស់បក្សនេះ មិនឲ្យធ្វើនយោបាយ រយៈពេល៥នោះមក មន្រ្ដីជាន់ខ្ពស់របស់គណៈកម្មាធិការជាតិរៀបចំការបោះឆ្នោត ហៅកាត់ គជប ចំនួន៣រូប បានលាឈប់ពីតំណែងរបស់ខ្លួន កាលពីថ្ងៃទី២០ ខែវិច្ឆិកាម្សិលមិញនេះ។ ការលែងតំណែងរបស់មន្ត្រីជាន់ខ្ពស់ទាំងបីនេះ ធ្វើឲ្យគេសង័្សយថា ពួកគាត់អាចនឹងទៅបង្កើតគណបក្សនយោបាយណាមួយក៏ថាបាន ពីព្រោះពួកគាត់មានសិទ្ធិធ្វើនយោបាយ ស្របតាមច្បាប់រដ្ឋធម្មនុញ្ញបានកំណត់។
ប្រភពព័ត៌មានពីគណៈកម្មាធិការជាតិរៀបចំការបោះឆ្នោត បានឲ្យដឹងថា មន្រ្ដីជាន់ខ្ពស់របស់គជប ដែលលាលែងពីតំណែងនោះ រួមមាន លោក គួយ ប៊ុនរឿន អនុប្រធានគណៈកម្មាធិការជាតិរៀបចំការបោះឆ្នោត លោក រ៉ុង ឈុន និងលោកស្រី តែ ម៉ានីរ៉ុង សមាជិកគជប។ ដោយឡែកសមាជិកម្នាក់ទៀត គឺលោក ហ៊ីង ធីរិទ្ធ បានចុះចូលជាមួយនឹងគណបក្សប្រជាជនកម្ពុជា ដឹកនាំដោយសម្ដេចតេជោ ហ៊ុន សែន។
យោងតាមពាក្យស្នើសុំលាលែងពីតំណែងរបស់មន្ត្រីជាន់ខ្ពស់គជបទាំង៣រូបខាងលើនេះ បានបញ្ជាក់ពី
មូលហេតុ នៅក្នុងការដាក់ពាក្យស្នើសុំលាលែងពីតំណែងនោះថា ដោយសារលោកទាំង៣នាក់បើកផ្លូវឲ្យគជប អនុវត្តនូវការបែងចែកអាសនៈ នៃរដ្ឋសភាអាណត្តិទី៥ និងអាសនៈក្រុមប្រឹក្សាឃុំ-សង្កាត់អាណត្តិទី៤ ឡើងវិញ។ អាសនៈក្រុមប្រឹក្សាឃុំ-សង្កាត់របស់គណបក្សសង្គ្រោះជាតិទាំងនោះ ត្រូវបែងចែកទៅឲ្យគណបក្សនយោបាយផ្សេងៗ ដែលពលរដ្ឋមិនបានបោះឆ្នោតជូន។
ដោយឡែកមតិសាធារណជាតិ និងអន្តរជាតិ បានចាត់ទុកថា ការរំលាយបក្សប្រឆាំងដ៏ល្បីល្បាញរបស់ប្រទេសកម្ពុជា មួយនេះ គឺជាការរំលោភរដ្ឋធម្មនុញ្ញ ច្បាប់បោះឆ្នោត បទបញ្ជា និងនីតិវិធី នៃការបោះឆ្នោត នៅក្នុងអាណត្តិនីមួយៗ ជាពិសេស ការរំលោភឆន្ទៈរបស់ប្រជាពលរដ្ឋ ដែលបានបោះឆ្នោតជូនគណបក្ស ដែលពលរដ្ឋពេញចិត្ត។
ជាមួយគ្នានេះ សមាជិកគជបទាំង៣រូបខាងលើ បានហៅការដាក់កំហិតឲ្យគជប បែងចែកអាសនៈឡើងវិញនេះថា ជាការជះឥទ្ធិពល ដោយផ្ទាល់ដល់ដំណើរការ នៃការរៀបចំការបោះឆ្នោតជ្រើសតាំងតំណាងរាស្ត្រ ឆ្នាំ២០១៨ ដោយមិនអាចធានាបាននូវការបោះឆ្នោតមួយ ប្រកបដោយលក្ខណៈសេរី ត្រឹមត្រូវ និងយុត្តិធម៌បានឡើយ។ រីឯលទ្ធផលនៃការបោះឆ្នោត ក៏មិនអាចទទួលស្គាល់ពីពលរដ្ឋជាម្ចាស់ឆ្នោត ក៏៏ដូចជាភាគីពាក់ព័ន្ធ និងសហគមន៍អន្តរជាតិបានដែរ។
ផ្ទុយពីការលើកឡើងខាងលើនេះ អ្នកនាំពាក្យគណបក្សប្រជាជនកម្ពុជា និងសម្ដេចនាយករដ្ឋមន្ត្រី ហ៊ុន សែន ធ្លាប់ធានាថា ក្រោយពេលរំលាយបក្សប្រឆាំងរួចហើយ សមាជិកគជបទាំងអស់ដែលមកពីកូតាគណបក្សប្រឆាំង នឹងមិនត្រូវបាត់បង់តំណែងឡើយ។ មន្រ្ដីទាំងនោះ គឺជាអាជ្ញាកណ្ដាល គ្មានជាប់ពាក់ព័ន្ធនឹងគណបក្សនយោបាយណាមួយទេ ពីព្រោះពួកគាត់បានប្រកាសលាលែងពីគណបក្សរួចរាល់អស់ហើយដែរ។
នៅក្នុងពាក្យស្នើសុំលាលែងពីតំណែងធ្វើរួមគ្នានោះ គឺមានទាំងស្នាមមេដៃរបស់លោកអនុប្រធានម្នាក់ និងសមាជិកគជប២រូបផ្សេងទៀត បានអះអាងថា ក្នុងនាមជាអាជ្ញាកណ្ដាល សម្រាប់ការរៀបចំការបោះឆ្នោត មិនអាចនៅបន្តធ្វើការងារ ក្នុងស្ថាប័នគជប បានតទៅទៀតឡើយ ពីព្រោះវាក្បត់ទៅនឹងឧត្តមគតិ និងមនសិការរបស់ខ្លួន និងក្បត់ឆន្ទៈពិតប្រាកដរបស់ប្រជាពលរដ្ឋជាម្ចាស់ឆ្នោត ហើយបញ្ហានេះនឹងនាំឲ្យជាប់ឈ្មោះអាក្រក់ នៅក្នុងប្រវត្តិសាស្ត្រទៀតផង។
នៅពេលឃើញមន្រ្ដីជាន់ខ្ពស់គជប បានលាលែងពីតំណែងរបស់ខ្លួន បន្ទាប់ពេលតុុលាការកំពូលសម្រេចសាលដីកាប្រកាសរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ និងដាក់បម្រាមដល់មន្ត្រីជាប់ខ្ពស់របស់គណបក្សប្រឆាំងចំនួន១១៨រូប មិនឲ្យធ្វើសកម្មភាពនយោបាយនោះមក ធ្វើឲ្យគេគិតថា មន្ត្រីគជបដែលលាលែងពីតំណែងរបស់ខ្លួននោះ អាចនឹងទៅបង្កើតគណបក្សប្រឆាំងឡើងវិញ។
មតិខ្លះបានលើកឡើងថា ថ្វីបើតុលាការសម្រេចរំលាយគណបក្សសង្គ្រោះជាតិ ទាំងមានភាពចម្រូងចម្រាស ដោយមានទាំងការរិះគន់ពីមជ្ឈដ្ឋានជាតិ និងអន្តរជាតិ ជាពិសេសសហរដ្ឋអាមេរិក បានគំរាមដាក់ទណ្ឌកម្មសេដ្ឋកិច្ចទៀតផង ហើយករណីនេះ ធ្វើឲ្យមតិមួយចំនួនលើកឡើងថា នេះមិនខុសគ្នាពីចកនៅក្នុងស្រះនោះទេ បើទោះជាបំបែកឲ្យបែកខ្ញាក់យ៉ាងណាក្ដី ក៏សារធាតុរបស់វានឹងរត់ចូលគ្នាវិញដដែល។ យ៉ាងណាមិញ សម្រាប់គណបក្សប្រឆាំងមួយនេះ ក្រោយពេលតុលាការរំលាយគណបក្សសង្គ្រោះជាតិរួចហើយក្ដី ក៏សមាជិករបស់បក្សនេះ អាចនឹងបង្កើតថ្មីឡើងវិញ ហើយនៅតែទទួលបានការគាំទ្រពីប្រជាពលរដ្ឋដដែល។ ប៉ុុន្តែវាគ្រាន់តែបង្កឲ្យផលវិបាកយ៉ាងខ្លាំង សម្រាប់គណបក្សប្រឆាំងមួយនេះតែប៉ុណ្ណោះ។
ទោះជាយ៉ាងណា គេមិនទាន់ដឹងច្បាស់ថា មន្ត្រីជាន់ខ្ពស់របស់គជបទាំង៣រូបនេះ បន្ទាប់ពីចាកចេញពីតំណែងគជប នោះ ពួកគាត់អាចនឹងទៅបង្កើតបក្សនយោបាយថ្មី ឬយ៉ាងណានោះទេ ពីព្រោះ KBN មិនអាចទាក់ទងសុំការបំភ្លឺបាន នៅរសៀល ថ្ងៃទី២១ ខែវិច្ឆិកា ឆ្នាំ២០១៧នេះ៕
