ភ្នំពេញ៖ បវរកញ្ញាមកពីបណ្ដាប្រទេសនានា ចំនួន៦៥ប្រទេស មកពីជុំវិញពិភពលោក កំពុងស្នាក់នៅក្នុងរាជធានីភ្នំពេញ ដើម្បីត្រៀមចូលរួមប្រឡងបវរកញ្ញាពិភពលោក Miss Global International ឆ្នាំ២០១៧ នៅក្នុុងកម្ពុជា។
នៅក្នុងពេលប្រទេសកម្ពុជាធ្វើជាម្ចាស់ផ្ទះជាលើកដំបូងនោះ កញ្ញា យន់ ផូលីណា កូនខ្មែរកើតនៅលើទឹកដីសហរដ្ឋអាមេរិក នឹងធ្វើជាអ្នកតំណាងឲ្យប្រទេសកម្ពុជា សម្រាប់ការប្រកួតបវរកញ្ញាពិភពលោក ដែលសហការរៀបចំឡើង ដោយក្រសួងទេសចរណ៍ និងក្រសួងបរិស្ថាននៃប្រទេសកម្ពុជា។
ការរៀបចំការប្រកួតបវរកញ្ញាពិភពលោកឬ Miss Global International នារដូវកាលទី៥ ឆ្នាំ២០១៧នេះ Miss Global បង្កើតឡើង ដោយសហរដ្ឋអាមេរិក នៅឆ្នាំ២០១៣ ហើយកម្ពុជា គឺជាប្រទេសទី៣ ដែលទទួលរៀបចំការប្រកួតនេះ បន្ទាប់ពីលើកទី១ និងលើកទី២រៀបចំ នៅលើទឹកដីសហរដ្ឋអាមេរិក និងលើកទី៣ និងទី៤ រៀបចំធ្វើឡើង នៅក្នុងប្រទេសហ្វីលីពីន។
មុនការប្រកួតចាប់ផ្ដើមនោះ ក្រសួងបរិស្ថានដែលអ្នកចូលរួមរៀបចំការប្រកួតប្រឡងបវរកញ្ញានេះ បានរៀបចំដំណើរទស្សនកិច្ចរបស់បវរកញ្ញាពិភពលោកទាំង៦៥ប្រទេស ទៅកាន់ខេត្តត្បូងឃ្មុំ។ នៅទីនោះ បវរកញ្ញាទាំង៦៥ប្រទេស បានចូលរួមពិធីដាំដើមឈើ ប្រមាណជា១ម៉ឺនដើម ដើម្បីទុកជាការចង់ចាំ និង ដើម្បីបង្ហាញថា កម្ពុជាគឺជាប្រទេសដែលមានឈ្មោះល្អ ក្នុងវិស័យទេសចរណ៍វប្បធម៌ និងធម្មជាតិ ដោយមានជីវចម្រុះសម្បូរបែប។
កញ្ញា យន់ ផូលីណា មានអាយុ២៥ឆ្នាំ គឺជាបេក្ខនារីតំណាងឲ្យប្រទេសកម្ពុជា ក្នុងការចូលរួមប្រកួតប្រជែងជាមួយបវរកញ្ញាមកពីប្រទេសផ្សេងទៀតចំនួន៦៤ ហើយនាងជាកូនខ្មែរ កើត និងរស់នៅក្នុងទីក្រុងសាន់ហ្វ្រាន់ស៊ីស្កូ សហរដ្ឋអាមេរិក។ នាងត្រូវបាន គេកត់សម្គាល់ថា មានលក្ខណៈសម្បត្តិគ្រប់គ្រាន់ទាំងចំណេះដឹងភាសាបរទេស បូករួមទាំងរូបសម្បត្តិគ្រប់គ្រាន់ សម្រាប់ការប្រកួតប្រជែងបវរកញ្ញា Miss Global International នាឆ្នាំ២០១៧នេះ។
លោក ខៀវ កាញារីទ្ធិ រដ្ឋមន្រ្តីក្រសួងព័ត៌មាន នៃប្រទេសកម្ពុជា បានលើកឡើងថា តាមរយៈកម្មវិធីនេះ កម្ពុជារំពឹងថា នឹងទទួលបាននូវការចាប់អារម្មណ៍កាន់តែខ្លាំងទាំងវប្បធម៌ និងអរិយធម៌របស់ប្រទេសកម្ពុជា។
គួរជម្រាបថា ថ្មីៗនេះ កម្ពុជាបានបញ្ជូនបេក្ខភាពទៅចូលរួមកម្មវិធីធំៗចំនួន៤ រួមមាន បវរកញ្ញាចក្រ វាឡ បវរកញ្ញាអន្តរជាតិ បវរកញ្ញាផែនដី និងបវរកញ្ញាពិភពលោកតែម្ដង ហើយការប្រកួតផ្តាច់ព្រ័ត្រ នឹងធ្វើឡើងនៅរាត្រី ថ្ងៃទី១៧វិច្ឆិកា នៅឯមជ្ឈមណ្ឌលកោះពេជ្រ ដោយមានការផ្សាយបន្តផ្ទាល់ តាមកញ្ចក់ទូរទស្សន៍ ក្នុងស្រុកទៀតផង៕