កាលពីពេលថ្មីៗនេះ កាសែតក្នុងស្រុករបស់ឥណ្ឌាមួយ បានចុះផ្សាយវីដេអូឃ្លីប ក្រុមគ្រូពេទ្យឥណ្ឌា១ក្រុម បានយកពស់ថ្លាន់យក្ស មួយក្បាលប្រវែងប្រហែល ២,៤៣ម៉ែត្រ បញ្ចូលក្នុងម៉ាស៊ីនស្កេន ដោយសារតែពស់នោះ មានរបួសត្រង់ចំណុចក្បាល និងដងខ្លួនរបស់វា ។
ពស់ថ្លាន់ខាងលើ ត្រូវបានគេយកមកធ្វើការស្កេន នៅក្នុងមន្ទីរពេទ្យមួយ ស្ថិតនៅក្នុងរដ្ឋអូរីហ្សា ប្រទេសឥណ្ឌា ហើយក្រុមគ្រូពេទ្យបានយកស្កុត មកបិទតាមដងខ្លួនរបស់វា ដើម្បីកុំឲ្យវារើបំរះរួច ព្រមទាំងដើម្បីងាយស្រួល ក្នុងការវិនិច្ឆ័យឲ្យកាន់តែច្បាស់ ថាវារបួសត្រង់កន្លែងណាខ្លះ ។
បើតាមការបញ្ជាក់ ពីក្រុមគ្រូពេទ្យ បាននិយាយថា ពស់ថ្លាន់នេះ ត្រូវតែរក្សាទុកក្នុងមន្ទីរពេទ្យ ប្រហែល១ខែដើម្បីឲ្យគ្រូពេទ្យ ធ្វើការព្យាបាលរបួសរបស់វា មុនពេលយកទៅព្រលែងនៅក្នុងព្រៃវិញ ៕
