ភ្នំពេញ៖ នារីម្នាក់សង្ស័យឈ្លោះប្រកែកគ្នា ត្រូវបុរសជាសង្សារ ចាប់អារក កាប់ដៃ កាប់ជើង បណ្តាលអោយរងរបួសធ្ងន់ បង្ករអោយមានការភ្ញាក់ផ្អើលឡើង កាលពីវេលាម៉ោង ១រំលងអាធ្រាត្រ ឈានចូលថ្ងៃទី១០ ខែតុលា ឆ្នាំ២០១៧ នៅបន្ទប់ជួលអក្សរ C ជាន់ទី១ ផ្លូវបេតុង ភូមិទ្រា៤ ក្រុម៤ សង្កាត់ស្ទឹងមានជ័យ ខណ្ឌមានជ័យ ។
នារីរងគ្រោះ មានឈ្មោះកែវ ស្រីណាក់ អាយុ២០ឆ្នាំ មុខរបរនៅផ្ទះ ស្នាក់នៅផ្ទះជួល ភូមិទ្រា៤ សង្កាត់ស្ទឹងមានជ័យ ខណ្ឌមានជ័យ មានស្រុកកំណើត ឃុំភ្ញៀស ស្រុកព្រៃកប្បាស ខេត្តតាកែវ ។ ចំនែកបុរសជាជនដៃដល់ ត្រូវជាសង្សារ មានឈ្មោះ សៀវ ហ្វូង អាយុ២៥ឆ្នាំ មុខរបរបញ្ចូលបទចំរៀង នៅផ្សារត្រពាំងឈូក ស្នាក់នៅជាមួយគ្នា មានស្រុកកំណើត នៅខេត្តកំពង់ចាម។
តាមប្រភពព័ត៌មាន ពីអ្នកជិតខាង ដែលជួលបន្ទប់ក្បែរនោះ និងសុំមិនបញ្ចេញឈ្មោះ បានអោយដឹងថា មុនពេលកើតហេតុ នៅវេលាម៉ោង១១យប់ ពួកគាត់បានលឺសំលេង ប្រត្រាយប្រតប់គ្នា និងមានសំលេង នារីរងគ្រោះស្រែកថា ជួយផង “មានគេកាប់ខ្ញុំ និងអារក” ពេលឮដូចនេះ អ្នកជិតខាងម្នាក់ បានដើរទៅគោះទ្វារ សួរថា មានរឿងអ្វី ស្រាប់តែពេលនោះ បុរសជាជនដៃដល់ បានឆ្លើយតបមកវិញថា កុំចេះដឹងរឿងគ្រួសារគេ បន្ទាប់ពីនិយាយរួច ក៏ស្រាប់តែស្ងាត់មាត់ បាត់អស់មួយសន្ទុះទៅ ។
ប្រភពដដែល បានបន្តទៀតថា លុះដល់ពេលកើតហេតុ ពួកគាត់បានលឺសំលេង ស្រែកអោយគេជួយម្តងទៀត ក៏ពួកគាត់បានបើកទ្វារផ្ទះ ចេញមកមើល ស្រាប់តែឃើញ បុរសជាសង្សារ បានរត់ចុះទៅក្រោម រត់គេចខ្លួនបាត់ស្រមោល ចំនែកនារីរូបនោះ ដើរចេញមកក្រៅ ទាំងសភាព ហូរឈាមពេញខ្លួន មានទាំងស្នាម អាបំពង់ក និងរយះដៃរយះជើង ឃើញដូចនេះពួកគាត់ បានស្រែក ផ្អើលឆោឡោឡើង រួចហើយបានជួយ ដឹកនារីរូបនោះតាមម៉ូតូ យកទៅសង្គ្រោះ នៅមន្ទីពេទ្យព្រះកុសុមះ និងបានផ្តល់ដំណឹងនេះ ទៅប្រាប់សមត្ថកិច្ចមូលដ្ឋាន អោយចុះមកមើល កន្លែងកើតហេតុផងដែរ ។
លុះសមត្ថកិច្ច បានចុះទៅកន្លែងកើតហេតុ ឃើញសុទ្ធតែឈាម ក្រហមច្រាលពេញបន្ទប់ជួល និងបានរកឃើញ កាំបិតបុ័ងតោចំនួន២ មានប្រឡាក់ឈាមផងដែរ។ បន្ទាប់ពីចុះទៅពិនិត្យ កន្លែងកើតហេតុរួច សមត្ថកិច្ចបានចុះ ទៅមើលជនរងគ្រោះ នៅមន្ទីរពេទ្យ ដើម្បីសាកសួរ ពីនិងធ្វើកំណត់ហេតុដំណើររឿង តែជនរងគ្រោះ មិនទាន់និយាយបាន នៅឡើយនោះទេ ទើបមិនដឹងថា រឿងនេះផ្តើមចេញ ពីរឿងអ្វីអោយប្រាកដ។
នៅក្នុងករណីនេះ សមត្ថកិច្ចមិនទាន់ អាចបង្ហើបប្រាប់ថា ជាករណីអ្វី អោយប្រាកដនោះទេ គឺពួកគាត់រងចាំ ជនរងគ្រោះចេញពីបន្ទប់ស ង្គ្រោះបន្ទាន់សិន ទើបធ្វើការសាកសួរ និងស្វែងរកជនសង្ស័យផងដែរ ៕
សហការី KBN
