ខេត្តព្រះសីហនុ៖ បុរសម្នាក់ស្លាប់ និងម្នាក់ទៀតរងរបួសធ្ងន់ ដោយសារថយន្ត៣គ្រឿងបើកបុកគ្នា ក្រឡាប់សង្កត់ពីលើ កាលពីវេលាម៉ោង៨ និង១០នាទីយប់ នៅថ្ងៃទី៩ ខែតុលា ឆ្នាំ២០១៧ នៅលើផ្លូវជាតិលេខ៤ ត្រង់ចន្លោះគីឡូម៉ែត្រ២០២-២០៣ ខាងកើតស្ពានអូរកំបុត ស្ថិតក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍ដ៏រន្ធត់នោះ គេឃើញរថយន្តមួយគ្រឿងសណ្ដោងរ៉ឺម៉កដឹកខ្សាច់ ម៉ាកហ៊ីយ៉ាន់ដាយ (HYUNDAI) ពណ៌ខៀវ ពាក់ស្លាកលេខ ព្រះសីហនុ 3A-1651 តាមបណ្ដោយផ្លូវជាតិលេខ៤ ក្នុងទិសដៅពីភ្នំពេញឆ្ពោះទៅកាន់ខេត្តព្រះសីហនុ ស្របទិសគ្នាជាមួយនឹងរថយន្ត១គ្រឿង ម៉ាកមីតស៊ុយប៊ីហ្ស៊ី ពណ៌ខ្មៅ ពាក់ស្លាកលេខ ភ្នំពេញ 2AO-3143 (ជិះគ្នា២នាក់)។
លុះពេលរថយន្តដឹកខ្សាច់បើកមកដល់ចំណុចកើតហេតុ ក៏ឡើងវ៉ារថយន្តមីតស៊ុយប៊ីហ្ស៊ី(Mitsubishi) តែដោយសារផ្លូវកោង និងមានស្ពានផង ព្រមទាំងមានរថយន្តកុងតឺន័រ មួយគ្រឿង ម៉ាកហ៊ីណូ ពណ៌ស ពាក់ស្លាកលេខ ភ្នំពេញ 3C-6132 បេីកបញ្រ្ចាសទិសគ្នាមកដល់ ធ្វើឲ្យអ្នកបើកបររថយន្តដឹកដីខ្សាច់ បួងចង្កូតគេច តែគេចមិនផុតក៏ជ្រុលទៅបុករថយន្តដឹកកុងតឺន័រ ហើយបន្តកៀររថយន្តមីតស៊ុយប៊ីហ្ស៊ី អូសប្រហែលជា ៣០ម៉ែត្រ បណ្ដោយឲ្យក្រឡាប់ កៀបសង្កត់មនុស្សក្នុងរថយន្តស្លាប់យ៉ាងអណោចអធ័មម្នាក់ និងរបួសធ្ងន់ម្នាក់។
ប្រភពព័ត៌មានដដែល បានបន្តថា អ្នកដែលជិះនៅក្នុងរថយន្តមីតស៊ុយប៊ីហ្ស៊ីនោះ ទី១-ឈ្មោះ ឃូ ស៊ីមន ភេទប្រុស អាយុ៤២ឆ្នាំ (អ្នកបើកបរ ស្លាប់) មានលំនៅក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ និងទី២-ឈ្មោះ អាត សិលា ភេទប្រុស អាយុ២៦ឆ្នាំ មុខរបរជានិស្សិត(រងរបួសធ្ងន់) មានលំនៅក្នុងសង្កាត់ព្រែកប្រា ខណ្ឌច្បារអំពៅ ភ្នំពេញ។ ដោយឡែកអ្នកបើកបរថយន្តធំទាំង២គ្រឿង បានរត់គេចខ្លួនបាត់អស់។
ក្រោយពេលកើតហេតុ សមត្ថកិច្ចបានចុះទៅពិនិត្យ និងបញ្ជូនអ្នករងរបួសធ្ងន់ទៅកាន់មន្ទីរពេទ្យ ហើយធ្វើកំណត់ហេតុប្រគល់សាកសពរបស់ជនរងគ្រោះទៅឲ្យក្រុមគ្រួសារដឹកទៅធ្វើបុណ្យតាមប្រពៃណី។ ដោយឡែករថយន្តទាំង៣គ្រឿង ត្រូវសមត្ថកិច្ចវាស់វែង និងយកទៅរក្សាទុក នៅក្នុងអធិការដ្ឋាននគរបាល ដើម្បីរង់ចាំចាត់ការតាមច្បាប់៕
