ខេត្តបន្ទាយមានជ័យ៖ សមត្ថកិច្ចចម្រុះបានចុះត្រួតពិនិត្យទំនិញខូចគុណភាព និងហួសការបរិច្ឆេទ នៅផ្សារអូរស្ងួតចាស់ និងផ្សារបន្ទាយនាង ស្ថិតក្នុងឃុំបន្ទាយនាង ស្រុកមង្គលបុរី កាលពីព្រឹកថ្ងៃទី០៩ ខែតុលា ឆ្នាំ២០១៧។
លោក ហុង លៀង អនុប្រធានទទួលបន្ទុកទីផ្សារសាខាកាំកុងត្រូលខេត្តបន្ទាយមានជ័យ បានឲ្យដឹងថា តាមការណែនាំពីលោករដ្ឋមន្ត្រីក្រសួងពាណិជ្ជកម្ម និងអគ្គនាយកដ្ឋានកាំកុងត្រូល ទើបមន្ត្រីសាខាកាំកុងត្រូលសហការជាមួយមន្ត្រី នៃមន្ទីរពាណិជ្ជកម្មខេត្ត និងកម្លាំងនគរបាលប្រឆាំងបទល្មើសសេដ្ឋកិច្ចខេត្ត ចុះពិនិត្យទំនិញខូចគុណភាព និងហួសកាលបរិច្ឆេទ នៅផ្សាអូរស្ងួតចាស់ និងផ្សារបន្ទាយនាង ស្ថិតក្នុងឃុំបន្ទាយនាង ស្រុកមង្គលបុរី។
លោកបានបញ្ជាក់ថា នៅពេលសមត្ថកិច្ចចម្រុះចុះពិនិត្យ ឃើញថាអាជីវករលក់ដូរ និងប្រជាពលរដ្ឋទិញទំនិញ មានការយល់ដឹងច្រើន ហើយការចុះពិនិត្យ រកមិនឃើញមានទំនិញខូចគុណភាព និងហួសការបរិច្ឆេទនោះទេ។ ទោះជាយ៉ាងនេះក្ដី មន្រ្ដីជំនាញនៅតែបន្តណែនាំដល់អាជីវករដែលលក់ដូរ និងប្រជាពលរដ្ឋត្រូវបញ្ឈប់សកម្មភាពលក់ និងទិញទំនិញខូចគុណភាណនិងហួសការបរិច្ឆេទ។
លោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យ បានបញ្ជាក់ថា ការចុះពិនិត្យ និងផ្សព្វផ្សាយដល់អាជីវករ ពីទំនិញខូចគុណភាព និងហួសការបរិច្ឆេទនេះ គឺត្រូវធ្វើជាប្រចាំនៅតាមទីផ្សារ ស្តង់ និងសាលារៀន ដោយផ្សព្វផ្សាយ និងអប់រំដល់សិស្ស ឲ្យមានការដឹងកាន់តែស៊ីជម្រៅ ពីគ្រោះថ្នា់ក់នៃទំនិញទាំងនោះ។
ជាមួយគ្នានេះ លោកប្រធានក៏បានសុំណូមពរដល់អាជីវករ ត្រូវចូលរួមសហការជាមួយមន្ត្រីជំនាញ និងស្ថាប័នពាក់ព័ន្ធ ដើម្បីទប់ស្កាត់នូវការលួចនាំចូលទំនិញខូចគុណភាព និងហួសការបរិច្ឆេទ ពីប្រទេសជិតខាង ចូលមកក្នុងកម្ពុជា ដែលធ្វើឲ្យប៉ះពាល់ដល់សុខុមាលភាពរបស់បងប្អូនប្រជាពលរដ្ឋយើង៕
