ខេត្តឧត្តរមានជ័យ៖ សត្វដំរីមួយក្បាល រស់នៅក្នុងតំបន់អភិរក្ស បរិស្ថានគូលែន-ព្រហ្មទេព ស្ថិតក្នុងភូមិអូតាម៉ែង ស្រុកអន្លង់វែង ខេត្តឧត្តរមានជ័យ បានងាប់ដោយសារតែវា មានអាយុកាលវ័យចំណាស់ ក្នុងចំណោមសត្វដំរីបួនក្បាលផ្សេងទៀត ដែលកំពុងអភិរក្ស នៅក្នុងតំបន់នោះ។
លោក ដាយរីច ថូមសាន់ (Darrick Thomson) ជនជាតិអូស្ត្រាលី ជាម្ចាស់អភិរក្សដំរី បានឲ្យដឹងថា ដំរីញី ឈ្មោះ ខាំលីន បានងាប់ កាលពីល្ងាចម៉ោង៥ ថ្ងៃទី៧ ខែតុលា ឆ្នាំ២០១៧ ដោយសារវាមានអាយុជាង ៨០ឆ្នាំទៅហើយ។
លោក ដាយរីច ថូមសាន់ បានបន្តថា ខាំលីន រួមនឹងដំរីញីចំនួន៣ក្បាលទៀត ដែលគាត់បានទិញ មកពីខេត្តមណ្ឌលគីរី ចំនួន ២ក្បាល និងខេត្តរតនគិរី ចំនួន២ក្បាល កាលពីអំឡុងឆ្នាំ២០១២ ដើម្បីនាំមកអភិរក្ស និងសិក្សាពីរបៀបរស់នៅរបស់សត្វដំរី ក្នុងប្រទេសកម្ពុជា ក្រោយពីរាជរដ្ឋាភិបាលកម្ពុជា បានអនុញ្ញាតឲ្យលោករៀបចំ នៅទីតាំងតំបន់បរិស្ថាន ដែនគូលែន-ព្រហ្មទេព ស្ថិតនៅប៉ែកឧត្តរ(ខាងជើង) នៃប្រទេសកម្ពុជា។
លោក ដាយរីច ថូមសាន់ បន្តថា ដោយសារជំងឺចាស់ជរា ធ្វើឲ្យខាំលីន មានអាការធ្ងន់ ដើរមិនរួចអស់រយៈពេល ជាងមួយអាទិត្យមកហើយ បើទោះជាក្រុមជំនាញពេទ្យសត្វ មកពីប្រទេសថៃ ប្រចាំការនៅតំបន់អភិរក្ស បានខិតខំព្យាយាម ព្យាបាលយ៉ាងណាក្តី តែក៏មិនអាចជួយបានដែរ។
លោក ដាយរីច ថូមសាន់ (Darrick Thomson) បានបន្ថែមថា លោកមានការសោកស្តាយ ចំពោះដំរីខាំលីន ដែលលោកអស់សមត្ថភាព ក្នុងការជួយសង្គ្រោះវា។ នេះក៏ដោយសារតែវាមានវ័យចាស់ជរាពេក ហើយសាកសពដំរីនេះ គឺលោកបានរៀបចំកប់ទុក នៅក្បែរស្នាក់ការអភិរក្ស និងនិមន្តព្រះសង្ឃ មកសូត្រមន្តបង្សុកុល ទៅតាមប្រពៃណីខ្មែរទៀតផង៕