ខេត្តបន្ទាយមានជ័យ៖ ផ្ទះរបស់សមាជិកក្រុមប្រឹក្សាឃុំរហាលម្នាក់ បានឆ្លងចរន្តអគ្គិសនី បង្កឲ្យកើតអគ្គិភ័យឆាបឆេះអស់ស្ទើរទាំងស្រុង កាលពីវេលាម៉ោង៣ និង៣០នាទីរសៀល ថ្ងៃទី០៨ ខែតុលា ឆ្នាំ២០១៧ ស្នៅក្នុងភូមិសាលាឆេះ ឃុំរហាល ស្រុកព្រះនេត្រព្រះ។
សមត្ថកិច្ច បានឲ្យដឹងថា ម្ចាស់ផ្ទះដែលត្រូវភ្លើងឆាបឆេះនោះ ឈ្មោះ យុន ឌី ភេទប្រុស អាយុ៣៥ឆ្នាំ (ជាងផ្សារដែក) មាន ប្រពន្ធ ឈ្មោះ ផុន ម៉ាលី អាយុ៣៥ឆ្នាំ មុខតួនាទីជាសមាជិកក្រុមប្រឹក្សាឃុំរហាល រស់នៅភូមិកើតហេតុខាងលើ។ ក្នុងប្រតិបត្តិការជួយសង្គ្រោះ សមត្ថកិច្ចជំនាញពន្លត់អគ្គិភ័យបានប្រើប្រាស់ទឹកចំនួន២ស៊ីទែន ប៉ុន្តែទំហំនៃការខូចខាត គឺសមត្ថកិច្ចនៅមិនទាន់ដឹងនៅឡើយ។
បើតាមសម្តីម្ចាស់ផ្ទះ បានឲ្យដឹងថា កាលពីវេលាខាងលើ ភ្លើងបានឆាបឆេះផ្ទះរបស់គាត់ ហើយគាត់បានស្រែកហៅអ្នកជិតខាងឲ្យជួយពន្លត់ដែរ តែអណ្តាតភ្លើងឆាបឆេះពេញទំហឹងទៅហើយ។ ភ្លាមៗនោះ សមត្ថកិច្ចក៏បានបើករថយន្តពន្លត់អគ្គិភ័យ១គ្រឿងមកជួយបាញ់ទឹកពន្លត់ តែផ្ទះត្រូវភ្លើងឆាបឆេះអស់ ហើយសមត្ថកិច្ចបានបាញ់ការពារ មិនឲ្យឆាបឆេះរាលដាលដល់អ្នកជិតខាង។
ម្ចាស់ផ្ទះបានបញ្ជាក់ថា អគ្គីិភ័យនេះបានឆាបឆេះផ្ទះឈើ លើថ្មក្រោម ប្រក់ស៊ីប្រូ មានបណ្តោយ១៤ម៉ែត្រ នឹងងទទឹង១៣ម៉ែត្រ និងទ្រព្យសម្បត្តិអស់ស្ទើរទាំងស្រុង៕
