ភ្នំពេញ៖ ជនសង្ស័យម្នាក់ចូលទៅប្លន់នារីរងគ្រោះ តែមិនសម្រេច ក៏អស់លក្ខណ៍ ត្រូវប្រជាពលរដ្ឋឃាត់ខ្លួនឲ្យកម្លាំងនគរបាល បង្កឲ្យភ្ញាក់ផ្អើលឡើង កាលវេលាពីម៉ោង៤ និង៣០នាទីរសៀល ថ្ងៃទី៤ ខេតុលា ឆ្នាំ២០១៧ នៅក្នុងបន្ទប់ជួល ស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ។
មន្ត្រីនគរបាលមូលដ្ឋាន បានឲ្យដឹងថា ជនសង្ស័យដែលប្រជាពលរដ្ឋឃាត់ខ្លួនប្រគល់ឲ្យសមត្ថកិច្ចនោះ ឈ្មោះ ដាង ឈុនណារ៉ាត់ ភេទប្រុស អាយុ២០ឆ្នាំ មុខរបរធើ្វការសំណង់ ស្នាក់នៅផ្ទះជួល ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិថ្លក់ជ្រៅ ឃុំខ្ចៅ ស្រុកកងមាស ខេត្តកំពង់ចាម។ រីឯជនរងគ្រោះ ឈ្មោះ ហាក់ គឹមភី ភេទស្រី អាយុ២៤ឆ្នាំ មុខរបរកម្មការិនីរោងចក្រ ស្នាក់នៅភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិបាក់ស្រី ឃុំកូល ស្រុកប្រាសាទសំបូរ ខេត្តកំពង់ធំ។
ជនរងគ្រោះ បានឲ្យដឹងថា មុនពេលកើតហេតុ នាងនៅក្នុងបន្ទប់ជាន់ទី៤ តែម្នាក់ឯង ស្របពេលនោះនាងឃើញជនសង្ស័យដើរគ្រវែលចុះឡើង និងពួននៅក្បែរមាត់ទ្វារ។ ឃើញបែបនេះ នាងក៏បានដើរទៅបិទទ្វារ ស្រាប់តែជនសង្ស័យចូលមកចាប់នាងជិះពីលើ ហើយចងដៃនាងជាប់ ដោយយកខ្យែចងស្បែកជើងមកចងដៃនាងទៅមុខ ធ្វើឲ្យនាងភ័យក៏ស្រែកហៅអ្នកជិតខាងឲ្យជួយ។ នៅពេលនោះ ជនសង្ស័យបានយកកាំបិតចំពុះទង់ មកភ្ជង់កនាង ដោយស្រែកគំរាមថា នៅឲ្យស្ងៀម! កុំស្រែក! ប្រយ័ត្ន អញអារកសម្លាប់ចោល។
ជនរងគ្រោះ បានបន្តថា ស្ថិតក្នុងសភាពប្រកបដោយគ្រោះថ្នាក់បែបនេះ នាងក៏សួរទៅជនសង័្សយថា តើឯងចង់បានអី? ជនសង្ស័យឆ្លើយថា ចង់បានអីតិចតួចទេ! ប៉ុន្តែជនសង័្សយនិយាយមិនទាន់ចប់ ស្រាប់តែប្អូនជីដូនមួយរបស់នាងឡើងមកទាន់ ធ្វើឲ្យជនសង្ស័យភ័យរត់ចុះមកដីភ្លាមៗ។
ប្រភពព័ត៌មានពីនារីម្នាក់ ឈ្មោះ អ៊ឹម គន្ធា អាយុ២៣ឆ្នាំ មុខរបរជាកម្មការិនីរោងចក្រ ត្រូវជាបប្អូនជីដូនមួយ ស្នាក់នៅបន្ទប់ជួលជាន់ក្រោម ក្នុងភូមិកើតហេតុខាងលើ បានឲ្យដឹងថា កាលពីវេលាខាងលើ នាងបានឮសំឡេងបងស្រីជីដូនមួយរបស់នាងស្រែកថា ជួយផង !ចោរចាប់ខ្ញុំ ហើយក៏បាត់ស្ងាត់ទៅវិញ។ ដោយមានការសង័្សយ នាងក៏បានឡើងទៅមើល ក៏ដឹងថា ចោរនៅក្នុងបន្ទប់បងស្រី ហើយនាងបានចុះទៅហៅអ្នកជិតខាងឲ្យមកជួយ ស្រាប់តែឃើញជនសង្ស័យដើរចុះមកដីថែមទាំងនិយាយថា មានអ្នកខ្យល់គរនៅខាងលើ ហើយពេលនាងឡើងមកដល់បន្ទប់បង ឃើញជនរងគ្រោះជាប់ចំណងចងមកខាងមុខ។ ចំណែកជនសង្ស័យវិញបានចុះទៅដី ហើយរត់រត់គេចខ្លួន ទើបប្រជាពលរដ្ឋនាំគ្នាពព័ទ្ធចាប់ខ្លួនប្រគល់ឲ្យនគរបាល។
មន្ត្រីនគរបាលដដែល បានបន្តថា បន្ទាប់ពីឃាត់ខ្លួនបានភ្លាម ជនសង័្សយបានសារភាពប្រាប់សមត្ថកិច្ចថា រូបគេពិតជាបានឡើងទៅប្លន់នារីរងគ្រោះប្រាកដមែន ប៉ុន្ទែយកទ្រព្យរបស់មិនទាន់បានផង ក៏ដឹងថាបែកការដល់អ្នកដទៃ ទើបរូបគេចុះមកវិញ។ ការធ្វើបែបនេះ ក៏ដោយសារតែរូបគេគ្មានលុយទិញថ្នាំញៀនជក់។
ក្រោយពេលកើតហេតុ ជនសង្ស័យត្រូវកម្លាំងនគរបាលប៉ុស្តិ៍ចោមចៅ កសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌពោធិ៍សែន ជ័យដើម្បីចាត់ការតាមនីតិវិធី៕