ខេត្តព្រះវិហារៈ បុគ្គលិកធនាគាហត្ថាកសិករ២នាក់ បានរងរបួសធ្ងន់ និងស្រាល ដោយសារបើករថយន្តបុកដើមអាកាស្យា កាលពីល្ងាច ថ្ងៃទី៤ ខែតុលា ឆ្នាំ២០១៧ នៅតាមផ្លូវជាតិលេខ៦២ ត្រង់ចំណុចកូនភ្នំ ស្ថិតក្នុងភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ។
មន្ត្រីនគរបាលចរាចរក្រុងព្រះវិហារ បានឲ្យដឹងថា រថយន្តបង្ក ម៉ាកកាមរីបាឡែន ពណ៌ស្ករ ពាក់ស្លាកលេខ អាមេរិក L79_648 បើកបរតាមបណ្ដោយផ្លូវជាតិលេខ៦២ បោះពួយយ៉ាងលឿន ក្នុងទិសដៅពីជើងទៅត្បូង។ លុះពេលបើកមកដល់ចំណុចកើតហេតុ ដោយសាររថយន្តនោះមានល្បឿនលឿនពេក ធ្វើឲ្យអ្នកបើកបរបួងចង្កូតបត់មិនទាន់ ក៏ធ្លាក់ពីលើថ្នល់ ជ្រុលទៅបុកដើមអាកាស្យា បណ្តាលឲ្យរថយន្តខូចខាតមួយកំណាត់មុខ និងអ្នកបើកបររថយន្តរងរបួសធ្ងន់ ហើយអ្នករួមដំណើរម្នាក់រងរបួសស្រាល។
មន្រ្ដីនគរបាលដដែល បានបន្តទៀតថា ជនរងគ្រោះ នៅក្នុងហេតុការណ៍ខាងលើនេះ ទី១-ឈ្មោះ ស្រី ហុកសេង ភេទប្រុស អាយុ២៧ឆ្នាំ (អ្នកបើកបររងរបួសធ្ងន់) រស់នៅភូមិឡឥដ្ឋ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ និងទី២-ឈ្មោះ ដាំ ឧត្តម ភេទប្រុស អាយុ២៧ឆ្នាំ រស់នៅខេត្តកណ្តាល រងរបួសស្រាល។ ពួកគេទាំងពីរ ជាបុគ្គលិកធនាគារហត្ថាកសិករប្រចាំសាខាខេត្តព្រះវិហារ។
ក្រោយពេលកើតហេតុ សមត្ថកិច្ចបានចុះទៅពិនិត្យ និងបញ្ជូនជនរងគ្រោះទាំងពីរទៅសង្គ្រោះបន្ទាន់ នៅក្នុងមន្ទីរពេទ្យបង្អែក១៦មករា ខេត្តព្រះវិហារ។ ដោយសារករណីនេះ មិនបានបង្កឲ្យរងគ្រោះថ្នាក់ដល់អ្នកដទៃ និងទ្រព្យសម្បត្តិរបស់ប្រជាពលរដ្ឋ ទើបសមត្ថកិច្ចអនុញ្ញាតិឲ្យម្ចាស់ទាក់ទងហៅរថយន្តស្ទូច មកស្ទូចរថយន្តបង្កយកទៅជួសជុលដោយខ្លួនឯង៕