ភ្នំពេញៈ យុវជនមួយក្រុមទើបនឹងចេញពីផឹកស្រវឹង បានបើករថយន្តដឹកគ្នាបោះពួយយ៉ាងលឿន ក៏ជ្រុលចង្កូតទៅបុកបង្គោលភ្លើងពេញទំហឹង បណ្ដាលឲ្យរថយន្តស្រុញក្បាល កាលពីវេលាម៉ោង១ និង៤០នាទីរំលងអធ្រាត្រ ឈានចូលថ្ងៃទី៥ ខែតុលា ឆ្នាំ២០១៧ នៅមុខវិទ្យាស្ថានជាតិ ផ្លូវលេខ៩៦ កែងនឹងមហាវិថីព្រះមុនីវង្ស ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញក្មេងទំនើងមួយក្រុមទើបនឹងចេញពីផឹកស៊ី បានបើករថយន្តកាមរីបាឡែនមួយគ្រឿង ពណ៌ស ពាក់ស្លាកលេខ ភ្នំពេញ 2AB-3120 បោះពួយយ៉ាងលឿន តាមបណ្ដោយមហាវិថីព្រះមុនីវង្ស រួចបត់មកតាមផ្លូវលេខ៩៦ ក៏ជ្រុលទៅបុកបង្គោលភ្លើងបំភ្លឺផ្លូវ និងបង្គោលភ្លើងស្តុប បាក់រាបដល់ដី។ ភ្លាមៗនោះ ទាំងអ្នកបើកបរ និងអ្នករួមដំណើរជាមួយមានគ្នា៣នាក់ បានឡើងជិះម៉ូតូគេចខ្លួនបាត់អស់ ដោយបន្សល់ទុករថយន្តនៅកន្លែងកើតហេតុ។
ក្រោយពេលកើតហេតុ សមត្ថកិច្ចបានចុះទៅពិនិត្យ និងស្ទូចយករថយន្តបង្កទៅរក្សាទុក នៅក្នុងការិយាល័យនគរបាលចរាចណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីទុកឲ្យម្ចាស់រថយន្ត ចូលខ្លួនមកដោះស្រាយតាមច្បាប់៕