យន្តហោះទម្លាក់គ្រាប់បែក នុយក្លេអ៊ែរអាមេរិកចំនួន ២គ្រឿងម៉ាក B-1B ពេលនេះត្រូវបាន រាយការណ៍មកថា កំពុងហោះហើរទៅកាន់ដែនអាកាស កូរ៉េខាងត្បូង ក្នុងគោលបំណងធ្វើប្រតិបត្តិការសមយុទ្ធទម្លាក់គ្រាប់ ចំពេលដែលកើនកម្ដៅជាមួយកូរ៉េខាងជើង។ នេះបើយោងតាមទីភ្នាក់ងារព័ត៌មាន yonhapnews ចុះផ្សាយនៅថ្ងៃទី២០ ខែមិថុនា ឆ្នាំ២០១៧ មុននេះបន្តិច។
យោងតាមសេចក្ដីរាយការណ៍ពីទ័ពអាកាសកូរ៉េខាងត្បូងបានឲ្យដឹងថា កងកម្លាំងរបស់ពួកគេនឹងចូលរួមធ្វើសមយុទ្ធជាមួយយន្តហោះទម្លាក់គ្រាប់បែកអាមេរិក ដែលកំពុងហោះហើរនៅដែនអាកាសនៃឧបទ្វីបកូរ៉េ។ ប្រភពដដែលបានបន្ថែមទៀតថា ក្នុងសមយុទ្ធលើកនេះ អាមេរិកមានគម្រោងប្រើយន្តហោះចម្បាំងម៉ាក F-15k មួយគ្រឿងថែមទៀត ដើម្បីជាការឆ្លើយតបដោយកំហឹងមួយទៅកាន់រដ្ឋាភិបាលទីក្រុងព្យុងយ៉ាង ចំពោះពលរដ្ឋរបស់ខ្លួនម្នាក់ដែលបានស្លាប់ក្រោយបញ្ជូនត្រឡប់ពីកូរ៉េខាងជើង។
គួរបញ្ជាក់ផងដែរថា សកម្មភាពយោធារបស់សហរដ្ឋអាមេរិក នៅឧបទ្វីបកូរ៉េលើកនេះ ត្រូវបានកើតឡើងភ្លាមៗ ខណៈដែលនិស្សិតជនជាតិអាមេរិកម្នាក់ឈ្មោះ Otto Warmbier បាត់បង់ជីវិត បន្ទាប់ពីរដ្ឋាភិបាលទីក្រុងព្យុងយ៉ាងដោះលែងវិញកាលពីសប្ដាហ៍មុន ក្រោយឃុំខ្លួនក្នុងពន្ធនាគារអស់រយៈពេលជាង ១ឆ្នាំ៕
ផ្តល់សិទ្ធដោយ៖ kqube.net