ក្រុមច្បាប់អន្តរជាតិ កំពុងរៀបចំដាក់ពាក្យបណ្ដឹង ប្រឆាំងនឹងអង្គការណាតូ (NATO) ពីបទប្រើគ្រាប់បែក អ៊ុយរ៉ាញ៉ូម របស់ខ្លួនវាយប្រហារទៅលើរដ្ឋយូហ្គោស្លាវី ដែលស្ថិតនៅភាគអាគ្នេយ៍ នៃអឺរ៉ុប ក្នុងឆ្នាំ១៩៩៩ បណ្ដាលឲ្យមានជំងឺទាក់ទងនឹងមហារីកកើតឡើងអស់រយៈពេលជាច្រើនឆ្នាំ។
មេធាវីដឹកនាំក្រុមច្បាប់អន្តរជាតិ លោក Srdjan Aleksic រួមទាំងមេធាវីមកពី រុស្ស៊ី សហព័ន្ធអឺរ៉ុប ឥណ្ឌា និង ចិន បានរាប់រៀបឲ្យដឹងពីដំណើរសង្គ្រាមថា ក្នុងអំឡុងឆ្នាំ ១៩៩៩ ណាតូបានដឹកនាំកងកម្លាំងវាយប្រហារទម្លាក់គ្រាប់បែកគីមីប្រភេទ អ៊ុយរ៉ាញ៉ូម ចន្លោះពី ១០ ទៅ១៥តោនទៅលើប្រទេស ស៊ែប៊ី ដែលបង្កឲ្យមានគ្រោះថ្នាក់ដល់បរិស្ថានយ៉ាងធ្ងន់ធ្ងរ។
ក្រុមមេធាវីខាងលើបានបន្ថែមទៀតថា ប្រជាជនស៊ែប៊ី ចំនួន ៣៣.០០០នាក់ធ្លាក់ខ្លួនឈឺដោយសារតែសារធាតុគីមី ដែលកើតចេញពីគ្រាប់បែកអ៊ុយរ៉ាញ៉ូម ក្រោយពេលផ្ទុះ។ ជុំវិញបញ្ហានេះ ប្រទេសស៊ែប៊ីបានសម្រេចប្ដឹងអង្គការអន្តរជាតិមួយនេះ ក្រោយការវាយប្រហារ ១៩ឆ្នាំ ដោយមេធាវីលើកឡើងថា វាមិនយឺតពេលនោះទេ ចំពោះការកាត់ទោសភាគីណាមួយដែលប្រើអាវុធនុយក្លេអ៊ែរមកលើបង្កមហន្តរាយដល់បរិស្ថានរបស់ខ្លួន។
ជាចុងក្រោយលោក Srdjan Aleksic សង្កត់ធ្ងន់ថា សមាជិក ១៩ប្រទេសរបស់អង្គការណាតូ ពេលនេះត្រូវសងថ្លៃខូចខាតទាំងអស់មកវិញ។ យ៉ាងណាមិញ អង្គការអន្តរជាតិមួយនេះមិនទាន់ឆ្លើយតបនោះឡើយ៕
ប្រភព៖ TR
ផ្តល់សិទ្ធដោយ៖ kqube.net