ភ្នំពេញ ៖ បុរសម្នាក់រួម និងនារីម្នាក់ កំពុងតែជិះម៉ូតូ ២គ្រឿងធ្វើដំណើរតាមផ្លូវ ទន្ទឹមគ្នា ក៍ស្រាប់តែមានបុរសម្នាក់ ស្រវឹងស្រាជោកជាំ បានបើករថយន្តហាយឡែនឌឺ បុកពីក្រោយទាំងកំរោល បណ្ដាលឱ្យបុរសម្នាក់ បោកក្បាលហូរឈាមបាក់កស្លាប់ ហើយនារីម្នាក់ទៀត រងរបួសស្រាល ដែលហេតុការណ៍នេះ កើតឡើងនៅវេលាម៉ោង១០និង១០នាទីយប់ ថ្ងៃទី១១ ខែ មិថុនា ឆ្នាំ២០១៧ ជិតកន្លែងលក់រថយន្តម៉ាស៊ឺដេស ផ្លូវ៦០ម៉ែត្រ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
សពជនរងគ្រោះមានឈ្មោះ ហង់ វិសាល ភេទប្រុស អាយុ ២៧ឆ្នាំ មុខរបរបើកបររថយន្ត ស្នាក់នៅផ្ទះជួលសង្កាត់ទឹកថ្លា ខណ្ឌសែនសុខ មានស្រុកកំនើតនៅភូមិប្រោះស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ជិះម៉ូតូម៉ាកស្កុបពីផ្កាឈូកលាយខ្មៅ ពាក់ស្លាកលេខ ភ្នំពេញ 1CH-9856 និងម្នាក់ទៀត រងរបួសស្រាល មានឈ្មោះ ពៅ ស៊ីឡា ភេទស្រី អាយុ ២៦ឆ្នាំ មុខរបរកម្មកររោងចក្រ ស្នាក់នៅ សង្កាត់ចាក់អង្រែក្រោម ខណ្ឌមានជ័យ ជិះម៉ូតូម៉ាកស្កុបពី ពណ៌ស ពាក់ស្លាកលេខ ភ្នំពេញ 1FV-3113 ។
ដោយឡែក អ្នកបើកបររថយន្តបង្ករវិញមានឈ្មោះ សៀង អេងហ៊ុយ ភេទប្រុស អាយុ ២១ឆ្នាំ មុខរបរនិស្សិតឆ្នាំទី២ ស្នាក់នៅផ្ទះលេខ៤៥ ភូមិព្រែកឬស្សី សង្កាត់ព្រែកឬស្សី ក្រុងតាខ្មៅ ខេត្តកណ្កាល បើករថយន្តបង្កម៉ាក ហាយឡែនឌឺ ពណ៌ស ពាក់ស្លាកលេខ ភ្នំពេញ 2V-0997 ។
តាមសម្តីស្រ្តីដែលរងរបួសស្រាល បានឱ្យដឹងថា មុនពេលកើតហេតុ ពួកគេទាំង ២នាក់ គឺជាមិត្តភក្តិ ទើបតែចេញពីហូបអាហារ នៅម្តុំបឹងត្របែក សង្កាត់បឹងត្របែក ខណ្ឌ ចំការមន ហើយគោលបំណងត្រឡប់ទៅផ្ទះវិញ នៅចាក់អង្រែក្រោម ដែលរូបនាង បានពឹងបុរសរងគ្រោះជូនទៅផ្ទះ ដោយបានជិះម៉ូតូម្នាក់មួយគ្រឿង ទន្ទឹមគ្នា ធ្វើដំនើរតាមផ្លូវ ៦០ម៉ែត្រ ក្នុងទិសដៅពីជើងទៅត្បូង ។
ខណៈមកដល់ចំនុចកើតហេតុ ក៏ស្រាប់តែមានបុរសអ្នកបើករថយន្តបង្កម៉ាកហាយឡែនឌឺ ពណ៌ស បានធ្វើដំនើរតាមផ្លូវ ក្នុងទិសដៅស្របគ្នា ក្នុងល្បឿនលឿន ព្រមទាំងស្រវឹងជោកជាំផងនោះ ក៍ជ្រុលទៅបុកម៉ូតូពួកគេទាំងពីរនាក់ ពីក្រោយពេញទំហឹង បណ្តាលឱ្យបុរសបើកម៉ូតូស្កុបពី ពណ៌ខ្មៅ លាយផ្កាឈូក ហោះផ្លោងជិត ៥០ម៉ែត្រ រងរបួសបែកក្បាលហូរឈាមបាក់កស្លាប់ រីឯម៉ូតូខ្ទាតចេញពីកន្លែងកើត ប្រហែល ១០០ម៉ែត្រ រងកាខូចខាត ខ្ទេចមួយកំណាត់ខាងក្រោយ ចំនែកស្រ្តីរងរបួសរលាត់ដៃជើងស្រាល រីឯម៉ូតូរងកាខូចខាត ក្រឡិតថ្នាំមួយចំហៀងខាងស្ដាំ ។
ដោយឡែករថយន្តបង្ កបានរេចង្កូតបត់ក្បាលត្រលប់ក្រោយវិញ រងកាខូចខាតខ្ទេច និង
ក្រពិតផ្នែកខាងមុខ ហើយភ្លាមៗនោះ អ្នកបើកបររថយន្ត បានចុះពីលើរថយន្តរត់គេចខ្លួនបានជិត១០០ម៉ែត្រ ត្រូវបានប្រជាពលរដ្ឋពលរដ្ឋដេញចាប់ស្វាគមន៍ម្នាក់មួយដៃមួយជើង បានសមត្ថកិច្ចខាងអន្តរាគមន៍ទៅជួយឃាត់ទាន់ រួចហើយនាំបានគ្នាអ្នកបើករថយន្តបង្កររូបនោះ ទៅធ្វើសាកសួរនៅអធិការដ្ឋាននគរបាលខណ្ឌមានជ័យ ។
ក្រោយពេលកើតហេតុ សមត្ថកិច្ចជំនាញបានចុះមកពិនិត្យ និងធ្វើកំណត់ហេតុរួចបានប្រគល់សពជនរងគ្រោះ ទៅក្រុមគ្រួសារយកទៅរៀបចំធ្វើបុណ្យនៅស្រុកកំណើត ដោយរថយន្តបង្ក និងម៉ូតូ២គ្រឿង ព្រមទាំងអ្នកបើកបររថយន្តបង្ក ត្រូវបានសមត្ថកិច្ចធ្វើការវាស់វែង រួចយកទៅរក្សាទុកនៅការិយាល័យចរាចរណ៍ផ្លូវគោ ករាជធានីភ្នំពេញ ដើម្បីរង់ចាំធ្វើការដោះស្រាយ ៕ សហការី KBN-LIVE.com
