Lu Yang Yang កំពុងប្រឈមនឹងពាក្យចចាមអារ៉ាមស្នេហាជាមួយ Xing Zhaolin និងរស់នៅជាមួយគ្នា

តារាសម្ដែង Lu Yang Yang g និង Xing Zhaolin កំពុងទទួលបានការចាប់អារម្មណ៍ពីអ្នកគាំទ្រ បន្ទាប់ពីមានព័ត៌មានចចាមអារ៉ាមថាអ្នកទាំងពីរអាចមានទំនាក់ទំនងស្នេហានឹងគ្នា ហើយថែមទាំងត្រូវបានគេអះអាងថាកំពុងរស់នៅជាមួយគ្នាទៀតផង។

យោងតាមការចុះផ្សាយរបស់ប្រព័ន្ធផ្សព្វផ្សាយចិនបានធ្វើឱ្យអ្នកគាំទ្រចាប់អារម្មណ៍ជាថ្មីចំពោះទំនាក់ទំនងរបស់តារាទាំងពីរ ខណៈដែលមានការលើកឡើងអំពីសកម្មភាពដែលពួកគេត្រូវបានគេប្រទះឃើញនៅជាមួយគ្នាកន្លងមក។ តាមរបាយការណ៍ដែលត្រូវបានចែករំលែក Lu Yang Yang ឬ Hanna Lu និង Xing Zhaolin ត្រូវបានគេរាយការណ៍ថាបានធ្វើដំណើរទៅផ្ទះលេខ២ជាមួយគ្នាក្នុងឆ្នាំ២០២៤។

នៅខែកក្កដា ឆ្នាំ២០២៥ តារាសម្តែងទាំងពីររូបត្រូវបានគេប្រទះឃើញទៅមន្ទីរពេទ្យជាមួយគ្នា។ នៅពេលនោះ អ្នកមួយចំនួនបានសង្ស័យថា Lu Yangyang អាចនឹងកំពុងមានផ្ទៃពោះកូនរបស់ Xing Zhaolin។ ទោះជាយ៉ាងណាក៏ដោយអ្នកលេងអ៊ីនធឺណិតភាគច្រើនជឿថា ម្នាក់ក្នុងចំណោមពួកគេប្រហែលជាមានបញ្ហាសុខភាពទើបនាំគ្នាទៅមន្ទីរពេទ្យដើម្បីពិនិត្យសុខភាព។ យូរៗទៅ ពាក្យចចាមអារ៉ាមដែលថា Lu Yangyang កំពុងមានផ្ទៃពោះកូនដំបូងនោះក៏បានស្ងប់ស្ងាត់ទៅវិញ។

ការបង្ហាញខ្លួននៅកន្លែងតែមួយរបស់ទាំងពីររូបនេះបង្កឱ្យមានការសង្ស័យពីអ្នកតាមដានវិស័យកម្សាន្តថាទំនាក់ទំនងរបស់ពួកគេអាចលើសពីមិត្តរួមអាជីព។

ថ្មីៗនេះ ព័ត៌មានដែលបានចុះផ្សាយក៏បានលើកឡើងពីការអះអាងថាអ្នកទាំងពីរត្រូវបានគេប្រទះឃើញធ្វើសកម្មភាពប្រចាំថ្ងៃនៅកន្លែងស្នាក់នៅដូចគ្នា។ គួរឱ្យដឹងថា Xing Zhaolin គឺជាតារាសម្ដែងចិនដែលអ្នកគាំទ្រស្គាល់តាមរយៈការសម្ដែងជាតួ Yuwen Yue ក្នុងរឿងភាគប្រវត្តិសាស្ត្រ «Princess Agents»។ ក្រោយមកលោកក៏បានសាងស្នាដៃផ្សេងទៀតដ៏គួរឱ្យចាប់អារម្មណ៍។ ចំណែក Lu Yangyang ក៏ជាតារាសម្ដែងចិនមួយរូបដែលមានអ្នកគាំទ្រតាមដានស្នាដៃសម្ដែងរបស់នាងជាច្រើនផងដែរ។ អ្នកទាំងពីរធ្លាប់សម្តែងជាតួឯកនៅក្នុងរឿង « The Quirky and the Charming»។

ទោះបីជាព័ត៌មាននេះកំពុងទទួលបានការចាប់អារម្មណ៍ក៏ដោយប៉ុន្តែមិនទាន់មានការបញ្ជាក់ជាផ្លូវការពី Lu Yangyang និង Xing Zhaolin ជុំវិញទំនាក់ទំនងស្នេហា ឬការរស់នៅជាមួយគ្នាឡើយ៕