តារាចម្រៀង ណុប បាយ៉ារិទ្ធ បញ្ជាក់ថាមិនមែនជា AI លើប្លង់មួយរបស់ស្នាដៃថ្មីលោក

តារាចម្រៀងជើងចាស់លោក ណុប បាយ៉ារិទ្ធ បានចេញមកបញ្ជាក់ត្រង់ឈុតឆាកមួយនៃវីដេអូចម្រៀងថ្មីរបស់លោកដោយបង្ហាញថាមិនបានប្រើប្រាស់បច្ចេកវិទ្យា AI ឬថត Green Screen ឡើយប៉ុន្តែជាការថតដោយផ្ទាល់និងរៀបចំដោយក្រុមការងាររបស់ផលិតកម្មរស្មីហង្សមាស។

អស់រយៈពេលជាយូរមកហើយដែលតារាចម្រៀង ណុប បាយ៉ារិទ្ធ ខកខានក្នុងការទម្លាក់បទថ្មីរបស់ខ្លួននៅលើទីផ្សារឬការសម្តែងនៅក្នុងវីដេអូចម្រៀងជាដើម។ យ៉ាងណាមិញ នាពេលថ្មីៗនេះរូបលោកលេងឈុតធំដោយរៀបចំកម្មវិធីប្រមូលផ្តុំដោយសិល្បករជាច្រើនរូបចូលរួមសម្ពាធស្នាដៃថ្មីរបស់លោកដែលឆ្លុះបញ្ចាំងពីរឿងរ៉ាវស្នេហានិងបច្ចេកវិទ្យាទំនើបក្នុងឆ្នាំ២១៣០ ដែលអាចលុបបំបាត់ការចងចាំ និងរបបគំហើញអាចស្តារការចងចាំឡើងវិញទោះបីកន្លងផុតជាច្រើនឆ្នាំក៏ដោយពោលគឺសាច់រឿងឆ្លងអតីតកាល បច្ចុប្បន្ន និងអនាគត។

ចំណាប់អារម្មណ៍របស់ទស្សនិកជនដំបូងនៅពេលបានទស្សនា MV «យើងស្រលាញ់គ្នាត្រឹមនេះបានហើយ» មានការប៉ាន់ស្មានជាច្រើនថាវីដេអូចម្រៀងនេះអាចមានការប្រើប្រាស់ AI ស្របពេលបច្ចុប្បន្នបច្ចេកវិទ្យាមួយនេះកំពុងពេញនិយម។ ទោះយ៉ាងណា លោក ណុប បាយ៉ារិទ្ធ បានបញ្ជាក់ថាឈុតឆាកដែលទស្សនិកជនសរសើរថាឡូយ អស្ចារ្យ មិនបានប្រើ AI ឬសូម្បីតែ Green Screen ឡើយ។

តារាចម្រៀង ណុប បាយ៉ារិទ្ធ បានចែករំលែករូបភាពវីដេអូក្រៅឆាកពីក្រុមការងារជាមួយនឹងការបញ្ជាក់យ៉ាងដូច្នេះថា «មានបងប្អូនជាច្រើនបានសួរខ្ញុំថា តើប្លង់ដែលខ្ញុំចាស់គេងលើគ្រែពិសោធន៍ថត green screen មែនទេ? ប្លង់ត្រង់ហ្នឹងផលិតដោយ AI មែនទេ? ចម្លើយគឺអត់ទេ គ្រប់យ៉ាងគឺថតផ្ទាល់ៗជាមួយការរៀបចំដេគ័រតែម្តងដែលផលិតឡើងដោយ HM-team work»។

ជាមួយនឹងការបញ្ជាក់ខាងលើនេះបានជំរុញឱ្យអ្នកក្នុងចង្កោមសិល្បៈ និងទស្សនិកជនដទៃទៀតបង្ហាញការភ្ញាក់ផ្អើលនិងសរសើរថាអស្ចារ្យពីព្រោះពួកគេគិតថាប្លង់ថតនោះអាចប្រើ AI ឬសុំការអនុញ្ញាតនៅមន្ទីរពេទ្យណាមួយដើម្បីថតវីដេអូចម្រៀងនេះ ប៉ុន្តែផលិតកម្មបានចាយលុយខ្លួនឯងសម្រាប់ការផលិត៕