ឃើញបវរកញ្ញា តាណាវ៉ាត់ លេងបទខ្មែរ ហ្វីយ៉ាតា ថាកុំឱ្យគេបោកម្តងទៀត

ហ្វីយ៉ាតា បានព្រមានដល់អ្នកគាំទ្រខ្មែរមួយចំនួនកុំឆាប់បង្ហាញការស្រលាញ់ និងការគាំទ្រចំពោះតារា ឬបវរកញ្ញាថៃ ដែលយកបទចម្រៀងខ្មែរមកប្រើប្រាស់នៅលើបណ្តាញសង្គម TikTok ។ បវរកញ្ញាចក្រវាលកម្ពុជា២០២៥ ថាមិនបាច់ជេរគេនោះទេតែក៏ទុកចោលទៅហើយកុំចាញ់បោកគេម្តងទៀតព្រោះអាចមានបំណងអ្វីមួយ។ ហ្វីយ៉ាតា ក៏បានដាក់ការសង្ស័យថាទង្វើនោះប្រហែលចង់ឱ្យកម្ពុជាទិញការប្រកួតបវរកញ្ញា តាណាវ៉ាត់ ចូលវិញ។

ក្នុងរយៈពេលចុងក្រោយនេះគេសង្កេតឃើញថាអ្នកលេងបណ្តាញសង្គមទិកតុកថៃរួមទាំងបវរកញ្ញាថៃដែលស្ថិតក្រោមការគ្រប់គ្រងរបស់តាណាវ៉ាត់មួយចំនួនដូចជា Miss Grand Thailand 2026 រួមទាំងនាង Engfa បានលេងបទចម្រៀងខ្មែរមួយបទដែលមានការលាយបញ្ជូលចង្វាក់ថ្មីពីបទដើមមានចំណងជើងថា «មិនទ្រ បែកគ្នា» ពីតារាចម្រៀង រ៉េត ស៊ូហ្សាណា Ft. STEP។ ស្របពេលបវរកញ្ញារបស់តាណាវ៉ាត់ លេងបទខ្មែរ ហ្វីយ៉ាតា បានបញ្ចេញសំណេរមួយដោយជំរុញកុំឱ្យខ្មែរចាញ់បោកគេម្តងទៀត។

ហ្វីយ៉ាតា បានលើកឡើងនៅយប់ថ្ងៃទី១៤ ខែតុលា ថា នៅពេលឃើញតារា ឬបវរកញ្ញាថៃប្រើប្រាស់បទចម្រៀងខ្មែរ អ្នកគាំទ្រខ្មែរមិនគួរប្រញាប់ចូលទៅបញ្ចេញមតិបែបស្និទ្ធស្នាល ដូចជា «Thank you» ឬ «Love you, idol» ភ្លាមៗនោះទេ។ ទោះជាយ៉ាងណា ហ្វីយ៉ាតា បានសង្កត់ធ្ងន់ថា មិនចាំបាច់ប្រើពាក្យប្រមាថ ឬបញ្ចេញការស្អប់ខ្ពើមចំពោះបុគ្គលទាំងនោះដែរ ដោយអាចជ្រើសរើសមិនប្រតិកម្មចំពោះសកម្មភាពបែបនេះ។

ហ្វីយ៉ាតា បានភ្ជាប់ទស្សនៈរបស់ខ្លួនទៅនឹងការចងចាំអំពីការលះបង់របស់វីរកងទ័ពដោយរំឭកពីវីរយុទ្ធជនដែលបានចាកចេញពីគ្រួសារ និងការសិក្សា ដើម្បីបំពេញភារកិច្ចការពារប្រទេសជាតិ ព្រមទាំងអ្នកដែលបានពលីដើម្បីជាតិមាតុភូមិ។

ហ្វីយ៉ាតា ក៏បានចោទជាសំណួរថា តើការប្រើប្រាស់បទចម្រៀងខ្មែរតែមួយបទនៅលើ TikTok គួរត្រូវបានចាត់ទុកជាហេតុផលគ្រប់គ្រាន់សម្រាប់ការបង្ហាញការគាំទ្រយ៉ាងស្និទ្ធស្នាលដែរឬទេ ខណៈដែលនាងយល់ថា ប្រជាជនខ្មែរគួរចងចាំពីការឈឺចាប់ និងបញ្ហាដែលខ្លួនជឿថាបានកើតឡើងក្នុងទំនាក់ទំនងរវាងប្រទេសទាំងពីរ។

បន្ថែមពីនេះ ហ្វីយ៉ាតា បានលើកឡើងពីអ្វីដែលនាងយល់ថា អាចជាការប្រើប្រាស់ឥទ្ធិពលវប្បធម៌ ឬ «Soft Power» ដើម្បីទាក់ទាញចំណាប់អារម្មណ៍ និងការគាំទ្រពីប្រជាជនខ្មែរ។ បវរកញ្ញាចក្រវាលកម្ពុជាឆ្នាំ២០២៥ក៏បានបញ្ចេញការសង្ស័យថា សកម្មភាពប្រើបទចម្រៀងខ្មែរនេះអាចមានគោលបំណងទាក់ទាញអ្នកគាំទ្រឱ្យត្រឡប់ទៅគាំទ្រផលិតផល ឬកម្មវិធីប្រកួតបវរកញ្ញារបស់ថៃឡើងវិញផងដែរ។

ហ្វីយ៉ាតាថា «កុំភ្លេចឱ្យសោះណាបងប្អូនខ្មែរយើង គេធ្វើចឹងព្រោះសេដ្ឋកិច្ចគេមួយផ្នែកកំពុងដាច់ខ្យល់.. ម្យ៉ាងប្រហែលចង់ឱ្យយើងទិញការប្រកួតបវរកញ្ញារបស់តាកៃចូលវិញមិនដឹង.. »។ បវរកញ្ញាកម្ពុជារូបនេះក៏បានប្រៀបធៀបស្ថានការណ៍នេះទៅនឹងទំនាក់ទំនងស្នេហាដែលធ្លាប់ជួបការខកចិត្ត ដោយលើកឡើងថា «ពួកសៀមដូចជា ex របស់យើងអ៊ីចឹង…ធ្លាប់បោកយើងម្ដងហើយនឹងត្រឡប់មកធ្វើល្អម្ដងទៀត.. ដើម្បីដឹងថាយើងនៅល្ងង់ ឱ្យគេបោកឬអត់»៕