ស្រ្តីជនជាតិចិនលើកដៃសូមទោស ល្អហួស ខណៈនាងថា ខ្មែរមានសន្តានចិត្តល្អលើកលែងអ្នកដឹងខ្លួនខុស

កាលពីយប់មិញនេះ(២៣ កញ្ញា) ល្អហួស បានធ្វើឱ្យអ្នកគាំទ្រព្រួយបារម្ភយ៉ាងខ្លាំងបន្ទាប់ពីបានដឹងដំណឹងថាមានស្រ្តីជាជនជាតិចិនម្នាក់បានច្រាននាងពេញទំហឹងទាំងស្ថិតនៅក្នុងឈុតអប្សរា។ ហេតុការណ៍នេះបានទាក់ទាញទស្សនិកជនភ្លាមៗនិងចង់ដឹងពីមុខមាត់របស់ស្រ្តីជនជាតិចិនរូបនោះ។ យ៉ាងណាក្រោយមករឿងរ៉ាវនេះបានឈានដល់ការបញ្ចប់ដោយការសម្របសម្រួលដោយស្រ្តីនោះបានលើកដៃសូមទោស ល្អហួស និងបញ្ជាក់ថាគាត់គ្មានចេតនា ខណៈ ល្អហួស ក៏ព្រមអធ្យាស្រ័យ។

តាមការបង្ហោះរបស់ ល្អហួស នាងបានបញ្ជាក់ថាបន្ទាប់ពីមានការសម្របសម្រួលពីអ្នករៀបចំកម្មវិធីនាងបានជួបនិងទទួលការសូមទោសពីស្ត្រីជនជាតិចិនរូបនេះដោយផ្ទាល់។ ភាគីខាងស្ត្រីនោះក៏បានពន្យល់ពីហេតុផលដែលនាំឱ្យមានហេតុការណ៍ច្រាននាងក្នុងកម្មវិធី ហើយបានទទួលស្គាល់ថាទង្វើដែលបានកើតឡើងគឺជាកំហុសអចេតនា។ ល្អហួស ក៏បានថ្លែងអំណរគុណដល់អ្នករៀបចំកម្មវិធី ដែលបានចូលរួមជួយសម្របសម្រួល និងបកស្រាយពីស្ថានការណ៍ ដើម្បីឱ្យភាគីទាំងពីរបានយល់ពីមូលហេតុ និងអារម្មណ៍របស់គ្នាទៅវិញទៅមក។

អ្វីដែលគួរឱ្យចាប់អារម្មណ៍នោះ គឺជំនួសឱ្យការបន្តភាពតានតឹង Miss Teen Cambodia 2025បានជ្រើសរើសការយោគយល់ និងអភ័យទោស ដោយទទួលយកការសូមទោសពីភាគីស្រ្តីជនជាតិចិន បន្ទាប់ពីបានទទួលស្គាល់កំហុសនិងពន្យល់ពីហេតុផលរបស់ខ្លួន។
តាមសារដែលបានបង្ហោះ ល្អហួស បានលើកឡើងពីការយោគយល់ និងការផ្តល់ឱកាសឱ្យអ្នកដែលបានធ្វើខុសអាចកែប្រែខ្លួន។ នាងបានបង្ហាញថា ការសន្ទនា ការពន្យល់ និងការទទួលស្គាល់កំហុស អាចជួយបញ្ចប់ការយល់ច្រឡំ និងរក្សាទំនាក់ទំនងល្អរវាងភាគីទាំងពីរ។

ល្អហួស បានសង្កត់ធ្ងន់ថា «បេះដូងខ្មែរតែងតែមានមនោសញ្ចេតនា និងភាពស្មោះត្រង់ និងការលើកលែងទោសកំហុស និងផ្ដល់ឱកាសឱ្យអ្នកដែលធ្វើខុសបានកែប្រែ»។

គួរបញ្ជាក់ផងដែរថាហេតុការណ៍ដែលស្រ្តីជនជាតិចិននេះបានច្រាន ល្អហួស មួយទំហឹងទាំងនាងគ្រោងឈុតអប្សរា គឺនៅក្នុងកម្មវិធីសែនព្រះខែ នៅកោះពេជ្រ អាគារ D ៕