លោក ជា វណ្ណារិទ្ធ បានប្រឈមនឹងមតិវែកញែកជាច្រើនក្នុងនាមជាពិធីករនៅក្នុងកម្មវិធីបវរកញ្ញាដោយមតិជាច្រើនសម្តែងការមិនពេញចិត្តឡើយ។ មិនត្រឹមតែប៉ុណ្ណោះអ្នកតាមដានវិស័យបវរកញ្ញាបានជំរុញឱ្យលោកសិក្សាពីកម្មវិធីបវរកញ្ញាដើម្បីអាចដំណើរការកម្មវិធីនេះឱ្យរលូន។
មិនថាធ្វើជាពិធីករកម្មវិធីផ្លូវការ ថ្នាក់ជាតិ កម្មវិធីកម្សាន្តតាមទូរទស្សន៍ កម្មវិធីអាពាហ៍ពិពាហ៍ ឬសូម្បីតែជាពិធីករក្នុងកម្មវិធីរ៉េប លោក ជា វណ្ណារិទ្ធ សុទ្ធតែទទួលបានមតិជាវិជ្ជមានដែលកម្រនឹងមានរឿងចម្រូងចម្រាសណាស់។ ទោះយ៉ាងណា ឈរលើអាជីពជាពិធីករអស់រយៈពេលជាច្រើនឆ្នាំមកនេះលោក ជា វណ្ណារិទ្ធ បានប្រឈមមុខនឹងការរិះគន់លើអាជីពក្នុងនាមជាពិធីករក្នុងកម្មវិធីបវរកញ្ញាចក្រវាលកម្ពុជាឆ្នាំ២០២៦។
តាមរយៈវីដេអូដែលបានចែករំលែកនៅលើបណ្តាញសង្គមទិកតុកអ្នកតាមដានវិស័យបវរកញ្ញាមិនពេញចិត្តចំពោះការសម្របសម្រួលដំណើរការកម្មវិធីរបស់លោក ជា វណ្ណារិទ្ធ ឡើយរហូតអ្នកគាំទ្របានបោះសម្តីដោយស្នើឱ្យពិធីការិនីនិយាយតែម្នាក់បានហើយ។ ក្នុងការប្រកួតបវរកញ្ញាចក្រវាលកម្ពុជាឆ្នាំ២០២៦ដែលមានប្រាសាទ ដាវីន គឺជានាយកជាតិ លោក ជា វណ្ណារិទ្ធ បានប្រឈមនឹងសម្តីរបស់មហាជនថា៖
«ប្រកាសបវរកញ្ញាដូចប្រកាសប្រលងបាក់ឌុបហើយឡើងសំអឿន, MC ប្រុសឃើញគាត់មានបទពិសោធន៍ក្នុងកម្មវិធីផ្លូវការច្រើនដែរតែមកម្តងទទេរម៉ង ដូចលេងកប្លែង ចាញ់ MCក្រោយៗដាច់, គាំង MC ណាស់ unprofessional»។ មតិខ្លះទៀតលើកឡើងថា «MCប្រុសហ្នឹងគេ complain រហូតឱ្យតែកម្មវិធីបវរកញ្ញា។ គាត់មានដែលមើលកម្មវិធីក្រៅប្រទេសអត់?MCគេមិនតាប៉ែចឹងទេ»។
គួរឱ្យដឹងថាជំវិញមតិវែកញែកនិងការរិះគន់ពីអ្នកគាំទ្រវិស័យបវរកញ្ញាក្នុងនាមធ្វើជាពិធីករកម្មវិធីបវរកញ្ញចក្រវាលកម្ពុជាឆ្នាំ២០២៦មកទល់ពេលនេះលោក ជា វណ្ណារិទ្ធ ពុំបានបង្ហាញសញ្ញាតបតឬនិយាយអ្វីឡើយ៕
