Winter បង្កឱ្យអ្នកគាំទ្រព្រួយបារម្ភក្រោយឃើញឆ្អឹងជំនីអណ្តែតច្បាស់ៗខ្លាំង

រូបរាងរបស់ Winter សមាជិកក្រុម aespa កំពុងទទួលបានការចាប់អារម្មណ៍ពីសំណាក់អ្នកគាំទ្រ បន្ទាប់ពីមានការចែករំលែករូបភាពថ្មីៗដែលអ្នកមួយចំនួនសង្កេតឃើញថានាងមើលទៅស្គមជាងមុនយ៉ាងខ្លាំង។ ក្នុងរូបភាពដែលចែកចាយនោះគេបានឃើញឆ្អឹងជំនីរបស់សមាជិករូបនេះអណ្តែតឡើងច្បាស់ជាហេតុធ្វើឱ្យអ្នកគាំទ្របង្ហាញការព្រួយបារម្ភ។

នៅក្នុងឧស្សាហកម្ម K-pop សម្ពាធក្នុងការរក្សារូបភាពដ៏ល្អឥតខ្ចោះនៅចំពោះមុខសាធារណជន ជារឿយៗតម្រូវឱ្យតារា (idols) រក្សារាងកាយឱ្យស្គមខ្លាំង ដើម្បីឆ្លើយតបទៅនឹងស្តង់ដារសម្រស់ដ៏តឹងរ៉ឹង។ មិនថាពេលកំពុងសម្តែងនៅលើឆាក ដើរលើកម្រាលព្រំក្រហម ឬបង្ហាញខ្លួនក្នុងជីវភាពប្រចាំថ្ងៃនោះទេសិល្បករតែងតែត្រូវបានគេរំពឹងថាត្រូវមានរូបរាងដ៏ល្អឥតខ្ចោះ ជាមួយនឹងរាងកាយស្លីម និងសមាមាត្រដែលត្រូវនឹងអ្វីដែលគេហៅថា «ស្តង់ដារតារា K-pop»។

ទោះយ៉ាងណា អ្នកគាំទ្រមួយចំនួនបានបង្ហាញការព្រួយបារម្ភចំពោះរូបរាងរបស់ Winter ក្នុងការបង្ហាញខ្លួនជាសាធារណៈរបស់នាងនាពេលថ្មីៗនេះ។ នៅក្នុងរូបភាពថតជិតៗរបស់ Winter មើលទៅស្គមខ្លាំងដោយគេអាចមើលឃើញឆ្អឹងជំនីររបស់នាងយ៉ាងច្បាស់នៅផ្នែកសងខាងនៃដងខ្លួន។ ចង្កេះតូច ផ្ទៃពោះរាបស្មើ និងត្រគាកតូចចង្អៀតរបស់សមាជិករូបនេះ កាន់តែបញ្ជាក់ឱ្យឃើញច្បាស់អំពីភាពស្លីមនៃរាងកាយរបស់នាង។ នៅពេល Winter លើកដៃឡើង ឆ្អឹងជំនីររបស់នាងកាន់តែលេចធ្លោឡើង ដែលធ្វើឱ្យអ្នកគាំទ្រមួយចំនួនបង្ហាញពីក្តីបារម្ភ។ អ្នកខ្លះថែមទាំងបានបញ្ចេញមតិថា នាងចាំបាច់ត្រូវ «ញ៉ាំអាហារឱ្យបានត្រឹមត្រូវ”»ដោយលើកឡើងថានាងមើលទៅស្គមពេក។
នៅក្នុងការចែករំលែកដ៏កម្រមួយអំពីការថែរក្សារាងកាយសមាជិកក្រុម aespa រូបនេះបានបង្ហើបថា នាងអនុវត្តកាលវិភាគហាត់ប្រាណយ៉ាងខ្លាំងក្លា ដោយរួមបញ្ចូលការហាត់នៅកន្លែងហាត់ប្រាណ (gym) ប្រហែល ៤ ដង និងការហាត់ Pilates ចំនួន ៣ ដងក្នុងមួយសប្តាហ៍ បន្ថែមពីលើការហាត់រាំជាប្រចាំ និងសកម្មភាពរាងកាយផ្សេងៗទៀត។

Winter បានពន្យល់ថាការហាត់ប្រាណរបស់នាងគឺផ្តោតសំខាន់ទៅលើការបង្កើនភាពធន់នៃរាងកាយ និងការរក្សាសាច់ដុំជាជាងការហាត់ដើម្បីសម្រកទម្ងន់។ គួរឱ្យកត់សម្គាល់ថា ទោះបីជានាងមានរូបរាងស្លីមស្អាតក៏ដោយ ក៏ Winter បាននិយាយថា នាងមិនបានអនុវត្តរបបអាហារតឹងរ៉ឹងដូចដែលតារាស្រីល្បីៗ (idols) ភាគច្រើនតែងតែធ្វើនោះទេ។

តាមពិតទៅ Winter ធ្លាប់បាននិយាយដោយបើកចំហថានាងចូលចិត្តញ៉ាំអាហារដែលមានរសជាតិឆ្ងាញ់ និងមានកាឡូរីខ្ពស់ រួមទាំងម្ហូបហឹរដូចជា «Hot Pot» និងបែបឆាជាដើម។ កាលវិភាគការងារដ៏មមាញឹក និងការហាត់ប្រាណយ៉ាងសកម្មជាប្រចាំរបស់នាង អាចជាកត្តាមួយដែលជួយរក្សារូបរាងដ៏ស្លីមរបស់ Winter តាមបែបធម្មជាតិ ដោយមិនចាំបាច់តមអាហារយ៉ាងតឹងរ៉ឹងឡើយ៕