ល្បីមិនធម្មតា! តារាចិន Jiloon ច្រៀងបទ Tiki Tiki របស់ រ៉េត ស៊ូហ្សាណា និង វណ្ណដា

មិនត្រឹមតែទទួលបានការចាប់អារម្មណ៍ពីអ្នកគាំទ្រក្នុងស្រុកប៉ុណ្ណោះទេប៉ុន្តែបទ «Tiki Tiki »របស់ រ៉េត ស៊ូហ្សាណា និង វណ្ណដា ក៏បានឆាបឆក់ដួងចិត្តរបស់តារាសម្តែងចិន Jiloon ដែលមកថតរឿងក្នុងប្រទេសកម្ពុជានាកន្លងមកនេះផងដែរ។

នៅយប់ថ្ងៃទី៦ ខែកញ្ញា តារាប្រុស Jiloon បាន Live នៅលើបណ្តាញសង្គមហ្វេកប៊ុកដើម្បីជជែកកម្សាន្តជាមួយនឹងអ្នកគាំទ្រខណៈលោកកំពុងតែស្ថិតនៅលើរថយន្ត។ ក្នុងពេលជាមួយគ្នានេះ Jiloon កំពុងតែរាំនិងច្រៀងផ្នែកខ្លះនៃបទ «Tiki Tiki »របស់ រ៉េត ស៊ូហ្សាណា និង វណ្ណដា ប្រកបដោយភាពសប្បាយចិត្តនិងចរិតរួសរាយរបស់ខ្លួន។ តួឯកក្នុងរឿងខ្លីរូបនេះបានស្តាប់ Tiki Tiki ជាច្រើនដង។ ក្រៅពីស្តាប់បទរបស់ វណ្ណដា និង រ៉េត ស៊ូហ្សាណា Jiloon ក៏បានស្តាប់បទរបស់ក្រុមចម្រៀង ឡាស៊ីម៉ា ផងដែរ។

ចេញផ្សាយនៅថ្ងៃទី២១ ខែសីហា ឆ្នាំ២០២៦ មកទល់នឹងពេលនេះបទ Tiki Tiki មានការស្តាប់២.៧លានដងគិតត្រឹមល្ងាចថ្ងៃទី៨ ខែកញ្ញា ឆ្នាំ២០២៦។ នេះគឺជាបទដែលមានការស្តាប់ច្រើនជាងគេរបស់ ហ្សាណា ចាប់តាំងពីចូលក្នុងទ្រនំបារមីរយៈពេល២ឆ្នាំមកនេះ។

គួរឱ្យដឹងថារយៈពេលចុងក្រោយនេះ Jiloon ទទួលបាននូវការចាប់អារម្មណ៍យ៉ាងច្រើនពីអ្នកគាំទ្រកម្ពុជាបន្ទាប់ពីលោកបានមកថតរឿងនៅលើទឹកដីកម្ពុជាមានចំណងជើងថា «ល្បិចកលចុងក្រោយ» ក្នុងប្រភេទរឿងចិនខ្លីៗដែលប្រជាជនមួយចំនួនធំចូលចិត្តតាមដាន។រឿងនេះក៏មានការចូលរួមសម្តែងដោយតារាខ្មែរ សាន្ត កុសុមៈ ផងដែរ។ Jiloon ត្រូវបានអ្នកគាំទ្រហៅថា Mr AI។

គូសបញ្ជាក់ថា Jiloon គឺជា Mister friendship Taiwan 2023 និងធ្លាប់តំណាងឱ្យតៃវ៉ាន់ប្រកួតនៅលើឆាកអន្តរជាតិនិងបានជាប់លំដាប់រងទី១ ក្នុងជំនាន់ជាមួយនឹង លាវ វេងហួរ ដែលជាម្ចាស់ជ័យលាភីឯក។ មុនពេលមកសម្តែងរឿងខ្លី Jiloon ក៏ធ្លាប់មកប្រទេសកម្ពុជានាពេល កន្លងមកផងដែរ។

Jiloon បានអភិវឌ្ឍអាជីពពីមួយដំណាក់កាលទៅមួយតំណាក់កាលជាមួយនឹងរូបរាងសង្ហារបស់លោកនិងការឈានចូលទៅក្នុងការសម្តែងភាពយន្តខ្លីៗរបស់ចិន។ យោងតាមរបាយការណ៍មួយចំនួន Jiloon បានសម្តែងរឿងខ្លីៗរបស់ចិនក្នុងឆ្នាំ២០២៥ និងត្រូវបានគេស្គាល់តាមរយៈរូបរាងសង្ហា និងការបង្ហាញខ្លួនក្នុងតួអង្គបុរសវ័យក្មេងជាពិសេសក្នុងរឿងបែបស្នេហា និងរឿងសម័យបុរាណ៕