ម៉ានិត បង្ហើបថាលក់ប្រលោមលោកចាក់បទ BLACKPINK ត្រូវគេលាបពណ៌ថាពង្វក់យុវជននិងចាក់បទសៀ.ម

តារាចម្រៀងនិងជាអ្នកនិពន្ធ ម៉ុង ម៉ានិត បានបង្ហាញពីការខកចិត្តនឹងជាតិសាសន៍ខ្លួនឯងលាបពណ៌មកលើលោកដោយចោទថាការលក់ប្រលោមលោកគឺជាការពង្វក់យុវជន ហើយគ្រាន់តែចាក់បទ BLACKPINK ដែលជាក្រុមកូរ៉េត្រូវគេលាបពណ៌ថាចាក់បទសៀម រួមទាំងមានការគំរាមហៅក្រសួងចុះមកចាត់ការ។

ថ្មីៗនេះ ម៉ានិត បានរៀបចំកម្មវិធីមួយទាក់ទងនឹងការលក់សៀវភៅប្រលោមលោកដោយមានការចូលរួមពីអ្នកនិយមអានសៀវភៅជាច្រើនចូលរួម។ ទោះយ៉ាងណា ទន្ទឹមនឹងទទួលបានការគាំទ្រស្ថាបនិកស្រលាញ់សៀវភៅស្រាប់តែបានបង្ហើបពីបញ្ហាមួយចំនួនដែលលោកអះអាងថាមានការរិះគន់ពាក់ព័ន្ធនឹងការលក់ប្រលោមលោក និងការចាក់បទចម្រៀងរបស់ក្រុម BLACKPINK នៅក្នុងទីតាំង។

ម៉ុង ម៉ានិត បានរៀបរាប់នៅលើបណ្តាញសង្គមទិកតុកនាពេលថ្មីៗនេះជាមួយនឹងការរៀបរាប់ថា «ទន្ទឹមនឹងសន្ទុះការគាំទ្រ តែបញ្ហាមិនចេះចប់ “ដោះស្រាយណាស់ ព្យាយាមណាស់ តែបញ្ហាមិនចេះចប់ពីតូចដល់ធំ មានតាំងពីតាចាស់មកគំរាមបុគ្គលិកថា លក់ប្រលោមលោកពង្វក់ក្មេង គំរាមហៅក្រសួងចុះមកចាប់ ចាក់បទ Blackpink គេលាបពណ៌ថាចាក់បទសៀម។ ខំហើយ ខំអស់ហើយ រឿងអីរឿងតិចតួចមិនចេះយោគយល់មុនបញ្ចេញមតិ ពិចារណាផង ខ្ញុំខ្មាស់ណាស់ អន់ចិត្ត ឮខ្មែរសាច់ឯងនិយាយបែបនេះសបញ្ជាក់ពីគំនិតតូចចង្អៀត មិនស្វែងយល់ មិនថ្លឹងថ្លែងសខ្មៅ អ្នកក៏ស្រលាញ់ជាតិ គេចេះស្រលាញ់គ្រប់គ្នា លក់ប្រលោមលោកក៏ខុស ចាក់បទកូរ៉េក៏ខុស»។

ម៉ានិតថា «អ្នកធ្វើចាំតែខុស ខ្ញុំហត់ចិត្តមែន ខ្ញុំបង្ហាញតែរឿងល្អ មិនមែនអត់រឿងអាក្រក់ឡើយ តែពេលខ្លះហត់ ហត់រកនិយាយមិនចេញ ព្រោះរឿងខ្លះហួសហេតុ ខ្ញុំខុសអី? ទើបធ្វើយ៉ាងណាក៏មិនពេញចិត្ត មតិត្រូវ ខ្ញុំអាចទទួលបាន តែបើហួសហេតុ ខ្ញុំមិនអាចទទួលទេ

បន្ទាប់ពី ម៉ានិត បង្ហាញពីការខកចិត្តទៅនឹងការរិះគន់ដែលមិនសមហេតុផល លាបពណ៌មកកាន់លោកខាងលើនេះមានអ្នកគាំទ្រជាច្រើនបានលើកទឹកចិត្តមកកាន់អ្នកនិពន្ធរូបនេះ។ អ្នកខ្លះក៏បានពន្យល់ថាអ្នកដែលមានគំនិតចង្អៀតលើសៀវភៅប្រលោមគឺដោយសារតែអ្នកទាំងនោះមិនយល់ពីសៀវភៅដោយសៀវភៅគ្រប់ប្រភេទសុទ្ធតែមានការអប់រំ និងមេរៀនដែលអាចរៀនសូត្របានទោះជាប្រលោមលោកបែបស្នេហាក៏ដោយ៕