ក្នុងវ័យ៦៧ឆ្នាំ ម្តាយរបស់ Liu Yifei ធ្វើឱ្យមហាជនភ្ញាក់ផ្អើលយ៉ាងខ្លាំង

ម្តាយរបស់តារាម្តែង Liu Yifei គឺអ្នកស្រី Liu Xiaoli ថ្មីៗនេះបានធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំងបន្ទាប់ពីរូបភាពរបស់អ្នកស្រីនៅភោជនីយដ្ឋានមួយក្នុងទីក្រុងប៉េកាំងត្រូវបានចែករំលែកតាមអ៊ីនធឺណិត។ ទោះមានវ័យ ៦៧ឆ្នាំ ហើយក៏ដោយម្តាយរបស់ Liu Yifei រក្សាបាននូវរូបរាងស្លីម ខ្នងត្រង់ និងកាយវិការសុភាពឆើតឆាយ។ អ្នកលេងអ៊ីនធឺណិតមួយចំនួនបានសរសើរថាអ្នកស្រីមើលទៅក្មេងជាងវ័យ ហើយមានភាពស្រស់ស្អាតបែបធម្មជាតិដែលទាក់ទាញភ្នែក។

ក្នុងរូបភាពដែលថតដោយអ្នកដើរកាត់ អ្នកស្រី Liu Xiaoli បានស្លៀកអាវពណ៌សដៃខ្លី ផ្គូផ្គងជាមួយសំពត់ និងស្បែកជើងកែងខ្ពស់។ ទោះជាការស្លៀកពាក់មើលទៅមិនស្មុគស្មាញក៏ដោយ ប៉ុន្តែឥរិយាបថរបស់អ្នកស្រីបានធ្វើឱ្យរូបរាងទាំងមូលមើលទៅមានភាពថ្លៃថ្នូរ។
ចំណុចដែលមហាជនចាប់អារម្មណ៍ជាពិសេស គឺសូម្បីតែពេលអង្គុយញ៉ាំអាហារ ឬកំពុងប្រើទូរសព្ទអ្នកស្រីក៏នៅតែរក្សាខ្នងត្រង់ និងកាយវិការបានយ៉ាងល្អ។ មនុស្សជាច្រើនយល់ថា ភាពជាប់លាប់នៃឥរិយាបថនេះ អាចពាក់ព័ន្ធនឹងប្រវត្តិរបស់អ្នកស្រីដែលធ្លាប់ជាអ្នករាំអាជីព។

អ្នកស្រី Liu Xiaoli ធ្លាប់សិក្សាផ្នែករបាំនៅទីក្រុងវូហាន ហើយជាអ្នករាំកម្រិតជាតិ ដែលមានជំនាញខាងរបាំប្រជាប្រិយ របាំបុរាណ និងរបាំបាឡេ។ បន្ទាប់ពីបញ្ចប់ការសិក្សាអ្នកស្រីបានប្រកបអាជីពជាអ្នករាំ និងធ្លាប់ចូលរួមសម្តែងក្នុងស្នាដៃជាច្រើន។ បទពិសោធន៍ក្នុងការហ្វឹកហាត់ និងសម្តែងរបាំអស់រយៈពេលជាច្រើនឆ្នាំ ត្រូវបានគេចាត់ទុកថាជាផ្នែកមួយដែលជួយឱ្យម្តាយរបស់ Liu Yifei មានកាយវិការស្រស់ស្អាត និងរក្សាឥរិយាបថបានល្អ ទោះបីអាយុកាន់តែច្រើនក៏ដោយ។

ក្រៅពីភាពស្រស់ស្អាតអ្នកស្រី Liu Xiaoli ក៏ត្រូវបានគេស្គាល់ថាជាម្តាយដែលមានទំនាក់ទំនងជិតស្និទ្ធជាមួយកូនស្រី។ ចាប់តាំងពី Liu Yifei ចាប់ផ្តើមចូលប្រឡូកក្នុងវិស័យសិល្បៈតាំងពីវ័យក្មេង ម្តាយរបស់នាងបាននៅក្បែរជួយគាំទ្រ និងមើលថែយ៉ាងជិតស្និទ្ធ។ អ្នកស្រីបានចូលរួមជួយកូនស្រីក្នុងជីវិតប្រចាំថ្ងៃ ក៏ដូចជាផ្នែកការងារ និងការអភិវឌ្ឍទេពកោសល្យ។ ជាពិសេសដោយសារអ្នកស្រីមានបទពិសោធន៍ផ្នែករបាំ អ្នកស្រីក៏អាចជួយណែនាំ Liu Yifei ក្នុងការហ្វឹកហាត់កាយវិការ និងការសម្តែងផងដែរ។ Liu Yifei ធ្លាប់បង្ហាញថា ម្តាយរបស់នាងមិនត្រឹមតែជាសមាជិកគ្រួសារប៉ុណ្ណោះទេ ប៉ុន្តែថែមទាំងជាមនុស្សដែលនាងអាចពិភាក្សា និងពឹងពាក់បានដូចមិត្តជិតស្និទ្ធម្នាក់។

ក្រោយរូបភាពរបស់អ្នកស្រី Liu Xiaoli ត្រូវបានផ្សព្វផ្សាយអ្នកលេងបណ្តាញសង្គមមួយចំនួនបាននឹកឃើញដល់សម្រស់របស់ Liu Yifei និងយល់ថា តារាស្រីរូបនេះពិតជាបានទទួលមរតកលក្ខណៈស្រស់ស្អាតពីម្តាយរបស់នាង៕