តារាចម្រៀង វ៉ាន់ នីឡា បានបង្ហាញការហួសចិត្តយ៉ាងខ្លាំងក្នុងពេលដែលគ្មានសាច់ប្រាក់ជាប់ខ្លួនចាយលុយលើកាតស្រាប់តែមានបុគ្គលម្នាក់ដែលជាមនុស្សប្រុសដើរនិយាយពីនាងនិងចោទនាងថាជំពាក់លុយគេជាច្រើននាក់។ មិនត្រឹមតែប៉ុណ្ណោះបុគ្គលនោះថែមទាំងនិយាយដាក់ វ៉ាន់ នីឡា ថាមានរឿងអាស្រូវច្រើនពេកទើបកើតរោគចិត្ត។
នៅថ្ងៃទី២០ ខែសីហា វ៉ាន់ នីឡា បានបង្ហោះរូបភាព Screenshot ពីឆាតមួយព្រមទាំងរៀបរាប់ថា «នេះបញ្ហាកើតមកពីការដែលខ្ញុំអត់បានដូរលុយ ហើយចាយកាតរបស់ខ្ញុំ កើតចេញពីការដែលខ្ញុំអត់បានដើរលេងជាមួយវា ខ្ញុំជ្រើសរើសដើរជាមួយមនុស្សផ្សេងដោយសារចង់គេចអត់ចង់ពាក់ពន្ធ័ព្រោះឮថាម្នាក់ហ្នឹងពិនចាប់កំហុសគេណាស់ ក៏ជ្រើសរើសនៅរៀងឆ្ងាយៗទៅជៀសវាងពីបញ្ហា ខ្ញុំគ្រាន់តែចង់មានសេរីភាពដើរលេងហូបអី ជ្រើសរើសការជិះ taxi ដោយមិនចង់ដើរឆ្ងាយ ទាំងអស់នេះខ្ញុំខុស? »។
តារាចម្រៀងរូបនេះបញ្ជាក់ទៀតថា «ប្រុសនេះវានៅតែដើរនិយាយពីខ្ញុំ – បញ្ជាក់ ខ្ញុំអត់ដែលស្គាល់វាទេ .. វាថែមទាំងលើកបញ្ហាពីមុនខ្ញុំមកនិយាយក្នុងន័យជាន់យើង និងប្រើពាក្យពេចន៍ប្រមាថធ្ងន់ៗមកលើរូបខ្ញុំទាំងដែលខ្ញុំជាស្រីវាជាប្រុសពាក្យដែលវាសរសេរនេះអាចរាប់ជាបទបរិហារកេរ្តិ៍ឬអត់? វាថាខ្ញុំដើរខ្ចីលុយគេ ទាំងដែលខ្ញុំអត់ដែលជំពាក់ពីណាទេ មានតែគេជំពាក់ខ្ញុំ ហើយនៅមានការតិះដៀលផ្សេងៗទៀត»។
នៅក្នុងសារឆ្លើយឆ្លងនោះមានការសសេរថា «ជួយប្រាប់កាកតារារោគចិត្តនោះផង មិនមែនខ្ញុំអ្នកនិយាយថាកាតវាគ្មានលុយទេតែគេផ្សេងៗដែលវាទៅខ្ចីលុយគេ គេអ្នកនិយាយចឹង។ សួរទៅដើរខ្ចីលុយអ្នកណាខ្លះ»។ សំណេរមួយទៀតលើកឡើងថា «រឿងអាស្រូវពេក ឡើងរោគចិត្ត»។
ត្រូវបានគេចោទប្រកាន់និងប្រើពាក្យសម្តីប៉ះពាល់អារម្មណ៍បែបនេះមានអ្នកលេងអ៊ីនធឺណិតមួយចំនួនបានជំរុញឱ្យ វ៉ាន់ នីឡា ដាក់ពាក្យបណ្តឹងទៅកាន់អ្នកនិយាយខាងលើនេះ ខណៈដែលតារាចម្រៀងរូបនេះបានអរគុណចំពោះមតិយោបល់របស់អ្នកគាំទ្រ៕
