តារាចម្រៀង ស៊ូ ស៊ីរីកា បានបញ្ចេញសំណេរមួយយ៉ាងកម្រនៅលើបណ្តាញសង្គមដោយលើកឡើងថាជីវិតលើលោកគ្មានអ្នកណាដែលល្អឥតខ្ចោះ ល្អគ្រប់១០នោះទេ ដូច្នេះកុំសូវសើចចំអកគេពេលមានបញ្ហាអ្វីមួយ។ លើសពីនេះ ស៊ីរីកា បានជំរុញចិត្តឱ្យអ្នកគាំទ្រថែរក្សាផ្លូវចិត្តឱ្យល្អ។
រយៈពេលចុងក្រោយនេះ ស៊ូ ស៊ីរីកា បានធ្វើឱ្យទស្សនិកជនមានការចាប់អារម្មណ៍តាមរយៈសកម្មភាពវីដេអូកំប្លែងៗ រួមទាំងការឡើងឆាកតន្រ្តីមួយចំនួន និងការច្រៀងបទ « Why not Me» ឡើងវិញជាមួយនឹងឈុតប្រពៃណីខ្មែរ។ នៅថ្ងៃទី១៩ ខែសីហា ស៊ូ ស៊ីរីកា ស្រាប់តែធ្វើឱ្យអ្នកគាំទ្រចាប់អារម្មណ៍ក្រោយពីបង្ហោះសំណេរមួយ។
ស៊ីរីកា បានបង្ហោះថា «ជីវិតលើលោកនេះគ្មានអ្នកណាល្អ Perfect គ្រប់ដប់ មិនធ្លាប់ខុសទេ ហើយវាក៏អាស្រ័យទៅលើផលបុណ្យផលកម្មរៀងៗខ្លួន ចឹងកុំសូវសើចចំអកគេពេលគេមានបញ្ហាអីមួយរបស់អ្នកដទៃពេក គ្រប់យ៉ាងមិនថាខុសរឺត្រូវទេ វាតែងតែមានហេតុនិងផល បាបនិងបុណ្យរបស់រឿងនីមួយៗទៅតាមកម្លាំងបុណ្យនិងកម្ម»។ 
តារាចម្រៀងរូបនេះបន្តទៀតថា «រឿងរ៉ាវទាំងអស់របស់មនុស្សលោកគ្មានអ្នកណាដឹងទេថានឹងជួបអ្វីខ្លះ ម្តងយើងជួបម្តងគេជួប តែក៏មិនមែនសុខៗដែរវាតែងតែមានហេតុនិងផលជានិច្ច អ៊ីចឹងកុំសើចយំគេអីក្រែងបានជួបខ្លួនឯងនឹងយល់ពីអារម្មណ៍នោះច្បាស់រក្សាផ្លូវចិត្តឱ្យល្អណាគ្រប់គ្នា»។ 
គួរបញ្ជាក់ផងដែរថាបច្ចុប្បន្ន ស៊ូ ស៊ីរីកា ស្ថិតនៅក្នុងក្រុមហ៊ុនតន្រ្តី TM records បន្ទាប់ពីចាកចេញពីផលិតកម្មថោន។ នៅក្នុងផលិតកម្មចាស់ ស៊ូ ស៊ីរីកា បានសាងប្រជាប្រិយភាពតាមរយៈបទចម្រៀងថ្មីៗនេះជាច្រើនដូចជា « ទៅយូរពេកហើយ » «ទាសករស្នេហ៍» «ស្រលាញ់បងលើសហើយ» «មនុស្សអាត្មានិយម» និង បទ «គ្មានអ្នកណាចាប់អារម្មណ៍ខ្ញុំទេ» ជាដើម៕
