4T5 បង្ហាញដំរួយត្រឡប់មកវិញក្រោយពីជាប់ទោ.ស

ប្រិយមិត្តមួយចំនួនជ្រាបមកហើយថាកន្លងមកនេះមានវីដេអូជាសំឡេងរបស់តារាចម្រៀង 4T5 កំពុងជាប់ពន្ធនាគារឆ្លើយឆ្លងជាមួយនឹងប្អូនស្រីបង្កឱ្យមហាជនមានការភ្ញាក់ផ្អើលយ៉ាងខ្លាំង។ ក្រោយពីបាត់មុខបាត់មាត់អស់រយៈពេលជាច្រើនខែថ្មីៗនេះ 4T5 បានបង្ហាញដំរួយវិលត្រឡប់មកវិញ ខណៈនៅតែមានការស្វាគមន៍ពីអ្នកគាំទ្រ។

នៅលើបណ្តាញសង្គមហ្វេកប៊ុក 4T5 បានបង្ហាញខ្លួនបន្តិចម្តងៗដោយនៅថ្ងៃទី៦ ខែឧសភា ឆ្នាំ២០២៦ សិល្បកររូបនេះបានបង្ហោះសំណេរមួយថា « បើគេសួរបង បាត់បងទៅណាប្រាប់គេចុះថាបងជាប់គុក!»។ សំណេរនេះ 4T5 ហាក់ចង់បញ្ជាក់និងទទួលស្គាល់ថាការបាត់ខ្លួនរបស់លោកកន្លងមកគឺពិតជាមានទោសជាប់ពន្ធនាគារពិតប្រាកដមែន ប៉ុន្តែទៅលើករណីអ្វីទស្សនិកជនពុំបានដឹងឡើយ តែមានពាក្យគេលើកឡើងថាទាក់ទងនឹងការប្រើប្រាស់អំពើហិង្សា។

ក្រោយរងនូវរឿងអាស្រូវបែបនេះថ្មីៗនេះគេស្រាប់តែបានឃើញ 4T5 បង្ហាញដំរួយវិលចូលអាជីពសិល្បៈវិញដោយប្រកាសត្រៀមចេញបទចម្រៀងថ្មី។ អ្វីដែលសំខាន់មិនមែនចេញតែមួយបទនោះទេប៉ុន្តែ 4T5 បានចេញចម្រៀងជាអាល់ប៊ុមតែម្តងព្រមទាំងមានការសហការជាមួយនឹង MC Sey ថែមទៀត។

ការប្រកាសរបស់ 4T5 ទៅលើអាល់ប៊ុម 4life5back ទាក់ទងនឹងការរក្សាកម្មសិទ្ធិបញ្ញាបានធ្វើឱ្យអ្នកគាំទ្រជាច្រើនបង្ហាញការស្វាគមន៍សិល្បកររ៉េបរូបនេះវិលមកកាន់អាជីពសិល្បៈវិញនិងចាប់ផ្តើមជីវិតសាជាថ្មីបន្ទាប់ពីជាប់ពន្ធនាគារ។

គួរបញ្ជាក់ថា 4T5 គឺជាតារារ៉េបមួយរូបដែលជាអតីតសិល្បករក្នុងផលិតកម្ម CG ។ បទរបស់លោកនៅលើឆាណែលយូធូបផ្ទាល់ដែលមានការចូលស្តាប់ច្រើនជាងគេមានចំណងជើងថា «ជីវិតវាគ្រាន់ជារឿងព្រេង» មានការទស្សនាជាង១៤លានដង។ នៅក្នុងផលិតកម្ម CG មានបទដូចជា «នាងកុហក» មានការស្តាប់ជាង២៨លានដង និងបទ «កូនជ្រូកទាំងបី» Feat ជាមួយ Kingchi មានការស្តាប់ជាង២៨លានដង៕