ស្របពេលផលិតផលក្លែងក្លាយរីកដុះដាលដូចផ្សិតមិនលើកលែងសូម្បីតែអាហារបំប៉ន សុខភាពក៏ក្លែងក្លាយដែរនោះ ហេង វិសាល ដែលជា Influencer ល្បីឈ្មោះមួយរូបបានបង្ហាញថាពិភពលោកកំពុងធ្លាក់ចុះគុណធម៌ គ្មានភាពស្មោះត្រង់នឹងគ្នា។
ថ្មីៗនេះនៅលើបណ្តាញសង្គមកំពុងមានការពិភាក្សាយ៉ាងច្រើនបន្ទាប់ពីអជ្ញាធរវៀតណាម បានបង្ក្រាបនិងសម្រេចចោទប្រកាន់មនុស្សចំនួន ២៦ នាក់ ពីបទឧក្រិដ្ឋ «ផលិត និងជួញដូរផលិតផលអាហារក្លែងក្លាយ» និង «ផលិត និងជួញដូរថ្នាំក្លែងក្លាយ» កាលពីខែកុម្ភៈ កន្លងមក។ បន្ទាប់ពីដំណឹងនេះបានរីកសាយភាយអ្នកដែលកំពុងតែប្រើប្រាស់ផលិតផលអាហារបំប៉នសម្រាប់ជំនួយសុខភាពបានបង្ហាញការខកចិត្តយ៉ាងខ្លាំងដោយសារតែអ្នកប្រើប្រាស់មួយចំនួនបាននិងកំពុងប្រើប្រាស់ផលិតផលក្លែងក្លាយដែលនាំឱ្យប៉ះពាល់ដល់សុខភាព។
ដំណឹងដ៏រសើបនេះបានជំរុញឱ្យ ហេង វិសាល ដែលជាម្ចាស់ក្រុមហ៊ុនមួយរូបក៏ដូចជាបុគ្គលមានឥទ្ធិពលលើបណ្តាញសង្គមបានលើកឡើងនៅថ្ងៃទី៨ ខែកក្កដា ថា «នៅពេលសង្គម ឬពិភពលោកធ្លាក់ចុះនៅគុណធម៌ មនុស្សទាំងអស់ដែលរស់នៅក្នុងសង្គមនិងពិភពលោកនោះ នឹងចលាចល ហើយពិបាករស់នៅ ព្រោះមនុស្សរស់នៅអាស្រ័យគ្នា ហើយការបោកប្រាស់ កុហកនឹងធ្វើឱ្យការទុកចិត្តធ្លាក់ចុះ»។
ស្វាមី ជា ស្រីនា បន្ថែមទៀតថាបើមនុស្សលែងទុកចិត្តគ្នាហើយមិនអាចរស់នៅស្រួលនោះទេ ប្រសិនជាចង់រស់ស្រួលមានតែគ្រប់ៗគ្នាខំចម្រើនគុណធម៌ហើយរក្សាភាពស្មោះត្រង់ បើមិនដូច្នេះទេពិបាករស់ហើយ។
ពាក្យសម្តីរបស់ ហេង វិសាល ត្រូវបានមនុស្សជាច្រើនបង្ហាញការគាំទ្រពីព្រោះមនុស្សខ្លះដោយសារតែសេចក្តីលោភលន់ខ្វះគុណធម៌ ដើម្បីតែប្រាក់ចំណេញរបស់ខ្លួនមិនខ្វល់សុខទុក្ខអ្នកដទៃឡើយ នោះហេតុជាមូលហេតុធ្វើឱ្យមនុស្សនៅក្នុងសង្គមលែងទុកចិត្តគ្នាទៅវិញទៅមក៕
