ថមមី រងការវែកញែកក្រោយនិយាយថា K01 គ្មានចេតនាប្រើហិ.ង្សានិងស្នើឱ្យមហាជនកុំមើលតែមួយជ្រុលតូច

លោក ថមមី ដែលជាស្វាមីរបស់តារាចម្រៀង សួស វីសា បានធ្វើឱ្យមានមតិប្រតិកម្មចម្រុះក្រោយពីលើកឡើងពី K01 ទាក់ទងនឹងការប្រើប្រាស់ហិង្សាលើយុវជនម្នាក់។ ក្នុងនាមជាមនុស្សដែលរាប់អានគ្នារាប់ឆ្នាំលោកបានបញ្ជាក់ថា K01 ពុំមានចេតនានោះទេនិងសូមកុំឱ្យសាធារណជនមើលតែជ្រុងម្ខាង អធ្យាស្រ័យឱ្យ K01 ខណៈកន្លងមកគាត់ធ្លាប់ជួយសង្គមច្រើននិងបានប្រៀនប្រដៅយុវជនដែលពុំស្តាប់បង្គាប់ឪពុកម្តាយ។

បន្ទាប់ពីមានវីដេអូ K01 ប្រើប្រាស់អំពើហិង្សាបានជំរុញឱ្យអ្នកលេងបណ្តាញសង្គមបញ្ចេញមតិរិះគន់ខឹងសម្បារយ៉ាងខ្លាំងរហូតដល់សមត្ថកិច្ចបានសម្រេចឃាត់ខ្លួនលោក ឃឿន សុឡា ហៅ K01 ជាបណ្តោះអាសន្ន ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមនីតិវិធីច្បាប់ជាធរមាន។

ជុំវិញហេតុការដ៏ក្តៅគគុកនេះលោក ថមមី បាននិយាយស្នើសុំជាសាធារណៈនិងចង់ឱ្យមហាជនយោគយល់អធ្យាស្រ័យមកកាន់ K01 ពីព្រោះលោកគ្មានចេតនាប្រើហិង្សានោះទេ។ ថមមី បានបញ្ជាក់ថាលោកនិង K01 រាប់អានគ្នាជាយូរមកហើយដោយដឹងថា K01 មិនមែនជាមនុស្សចូលចិត្តប្រើអំពើហិង្សានោះទេដោយសារតែទប់ចិត្តមិនពីព្រោះឃើញទង្វើននឹងអាកប្បកិរិយាមិនសមរម្យរបស់យុវជនម្នាក់ជាមួយម្តាយបង្កើតរបស់ខ្លួនហេតុដូច្នេះហើយ K01 គ្មានចេតនាទៅប្រើអំពើហិង្សារនោះទេ។

ស្វាមីតារាចម្រៀង សួស វីសា បានជំរុញកុំឱ្យសាធារណជនកុំមើលតែមួយជ្រុងតូច ហើយ K01 បានជួយសង្គមច្រើនណាស់សូម្បីពេលនៅទីនោះ K01 ចង់យំអាណិតម្តាយយុវជននោះ ហើយយុវជននោះក៏បានសូមទោសម្តាយ និងមិនបានយកទោសពី K01 ដែរ ខណៈគាត់ក៏បានសូមទោសយុវជននោះដូចគ្នាដែលគាត់ជ្រុលបន្តិច ហើយយុវជននោះបានដឹងខ្លួនខុសនិងបានកែខ្លួន។ ថមមី សង្ឃឹមថា ថ្នាក់ដឹកនាំនិងសាធារណជនមេត្តាអធ្យាស្រ័យ និង លើកលែងឱ្យ K01 ដោយសារកន្លងមកគាត់បានជួយសង្គមច្រើនណាស់ ជាពិសេសអប់រំក្មេងៗដែលមិនស្តាប់ឪពុកម្តាយដោយបានប្រែពួកគេមកជាមនុស្សល្អបានច្រើន។

ការលើកឡើងរបស់ ថមមី បានធ្វើឱ្យមហាជនចាប់អារម្មណ៍យ៉ាងច្រើនប៉ុន្តែក៏ទទួលរងនូវមតិប្រតិកម្មយ៉ាងច្រើនដូចគ្នា។ មានមនុស្សជាច្រើនលើកឡើងថាច្បាប់គឺច្បាប់ ហិង្សាគឺហិង្សាមិនអាចយកគុណមកលាងទោសបានទេ។ មតិខ្លះទៀតថាទង្វើរបស់ K01 គឺហួសព្រំដែន៕