មានសទ្ធាណាស់! ជី ដេវីត ទោះមមាញឹកការងារយ៉ាងណានៅតែចូលរួមក្នុងពិធីរាប់បាត្រ

ទោះបីជាមមាញឹកនឹងការងារសិល្បៈនិងមុខរបររកស៊ីយ៉ាងណា តារាចម្រៀង ជី ដេវីត ក៏មិនភ្លេចឆ្លៀតពេកធ្វើបុណ្យក្នុងនាមជាអ្នកគោរពព្រះពុទ្ធសាសនា និងធ្លាប់ជាអ្នកបួសមួយរូប។ សកម្មភាពថ្មីៗនេះរបស់ ជី ដេវីត ទទួលបានមតិសរសើរជាច្រើនពីអ្នកលេងបណ្តាញសង្គមក្នុងការចូលរួមទៅរាប់បាត្រនៅវត្តមួយនៅក្នុងរាជធានីភ្នំពេញ។

នៅថ្ងៃទី១៨ ខែមិថុនា ឆ្នាំ២០២៦ តាមរយៈការចែករំលែកនៅលើបណ្តាញសង្គមទិកតុកបានបង្ហាញសកម្មភាពរបស់តារាចម្រៀង ជី ដេវីត តុបតែងខ្លួនសាមញ្ញជាមួយនឹងអាវដៃវែងពណ៌ស និងខោពណ៌ខ្មៅ ជាមួយនឹងការដោះស្បែកជើងគោរពព្រះសង្ឃដែលគង់នៅទីនោះ។ តាមការចែករំលែក វត្តដែល ជី ដេវីត ទៅចូលរួមរាប់បាត្រគឺវត្តវាលស្បូវក្នុងពិធីបុណ្យចម្រើនព្រះជន្មលោកយាយ ទេព បូព្រឹក្ស ខណៈការរាប់បាត្រនេះមានព្រះសង្ឃចំនួន១៣៩អង្គ។

នៅក្នុងពិធីបុណ្យចម្រើនព្រះជន្មនេះ តារាចម្រៀង ជី ដេវីត បានធ្វើឱ្យអ្នកលេងបណ្តាញសង្គមចាប់អារម្មណ៍ថាលោករៀបចំខ្លួនយ៉ាងសាមញ្ញនិងបានថតរូបជាមួយនឹងព្រះសង្ឃ ខណៈកាយវិការរបស់តារាចម្រៀងរូបនេះពោរពេញដោយការគោរពប្រតិបត្តិបានល្អ មានទាំងការដោះស្បែកជើងទៅតាមទំនៀមទម្លាប់ប្រពៃណីព្រះពុទ្ធសាសនា។

គួរឱ្យដឹងថាកន្លងមក ជី ដេវីត ធ្លាប់សាងផ្នូសបួសជាសង្ឃនៅវត្តល្អាងកង្កែប ឯស្រុកបាណន់ ខេត្តបាត់ដំបង កាលពីខែកក្កដា ឆ្នាំ២០២០ ដោយបានបួសមួយរយៈពេលខ្លីដើម្បីស្វែងយល់ពីព្រះពុទ្ធសាសនា និងជម្រះភាពម៉ងសៅរឿងស្មុគស្មាញនៅក្នុងជីវិត។ ក្រោយមកតារាចម្រៀងរូបនេះក៏ធ្លាប់រៀនភាសាបាលី-សំស្ក្រឹតផងដែរ។ ជារឿយៗ ជី ដេវីត និង ទេព បូព្រឹក្ស តែងតែធ្វើទានទៅកាន់អ្នកខ្សត់ ខណៈកន្លងមកថ្មីៗនេះក្នុងអំឡុងពេលទៅខេត្តសៀមរាប ជី ដេវីត បានជូនថវិកាទៅកាន់ក្មេងៗមួយចំនួនផងដែរ៕