សិង្ហបុរីជាប់ចំណាត់ថ្នាក់ទី២ លើពិភពលោកក្នុងការប្រើប្រាស់ AI ច្រើនបំផុតនៅកន្លែងធ្វើការ

តើដឹងទេថា បុគ្គលិកតាមស្ថាប័នជាច្រើនក្នុងប្រទេសសិង្ហបុរី កំពុងតែប្រើប្រាស់បច្ចេកវិទ្យាសិប្បនិម្មិត (AI) ជួយធ្វើការរាល់ថ្ងៃ? របាយការណ៍ថ្មីបំផុតបង្ហាញថា ពេលនេះ កម្លាំងពលកម្មសិង្ហបុរីបាននាំមុខគេក្នុងការប្រើប្រាស់ AI ដើម្បីជំរុញលទ្ធផលការងារឱ្យមានប្រសិទ្ធភាពខ្ពស់ ដែលធ្វើឱ្យសិង្ហបុរីឈានទៅជាប់ចំណាត់ថ្នាក់ទី២ លើពិភពលោក ដែលបានកែប្រែប្រព័ន្ធការងារជំនាន់ថ្មីជាមួយ AI។

បើតាមរបាយការណ៍សន្ទស្សន៍ការងារឆ្នាំ២០២៦ (2026 Work Trend Index) របស់ក្រុមហ៊ុន Microsoft ត្រូវបានផ្សព្វផ្សាយកាលពីថ្ងៃទី១៦ ខែមិថុនា ឆ្នាំ២០២៦ គឺប្រទេសសិង្ហបុរីបានជាប់ចំណាត់ថ្នាក់ទី២ លើពិភពលោក ដែលបុគ្គលិកសកម្ម និងមានទំនួលខុសត្រូវក្នុងការប្រើប្រាស់បច្ចេកវិទ្យា AI ច្រើនបំផុតនៅកន្លែងធ្វើការ រីឯប្រទេសអារ៉ាប់រួម (UAE) ជាប់ចំណាត់ថ្នាក់ទី១។

របាយការណ៍បញ្ជាក់ថា ការប្រើប្រាស់ AI ក្នុងប្រទេសនេះ មិនមែនគ្រាន់តែជាការសាកល្បងទេ គឺវាបានក្លាយជាឧបករណ៍ស្នូលក្នុងការបង្កើតលទ្ធផលការងារ។ មូលហេតុធ្វើឱ្យការប្រើប្រាស់ AI នៅសិង្ហបុរី រីកចម្រើនខ្លាំងជាងសហរដ្ឋអាមេរិក រួមទាំងបណ្តាប្រទេសអឺរ៉ុប ដោយសាររដ្ឋាភិបាលសិង្ហបុរីបានចំណាយថវិកាជាង១ពាន់លានដុល្លារ សម្រាប់អភិវឌ្ឍន៍បច្ចេកវិទ្យា និងបណ្តុះបណ្តាលធនធានមនុស្ស ដោយអប់រំពី AI ដោយឥតគិតថ្លៃដល់ពលរដ្ឋ ដើម្បីធានាថា គ្មាននរណាម្នាក់មិនចេះប្រើបច្ចេកវិទ្យាទំនើប។ ក្រៅពីនេះ សិង្ហបុរី ជាមជ្ឈមណ្ឌលផ្ទុកទិន្នន័យ (Data Centers) និងជាទីតាំងរបស់ក្រុមហ៊ុនបច្ចេកវិទ្យាធំៗជាច្រើន។

អ្នកប្រើប្រាស់ AI ក្នុងការងារ ស្មើ៦៦% អាចបង្កើតលទ្ធផលការងារយ៉ាងល្អប្រសើរនាពេលនេះ ខណៈកាលពីឆ្នាំ២០២៥ ពួកគេមិនធ្លាប់ទទួលបានលទ្ធផលការងារល្អបែបនេះឡើយ។ ទោះយ៉ាងណា បុគ្គលិកខ្លះទៀតប្រាប់ថា មិនពឹងផ្អែកលើ AI ទាំងស្រុងទេ បើទោះជាវាជួយសម្រួលដល់ការងារច្រើនយ៉ាងណាក៏ដោយ។

នាយកក្រុមហ៊ុន Microsoft ប្រចាំប្រទេសសិង្ហបុរីឱ្យដឹងថា បុគ្គលិកសិង្ហបុរីស្ថិតក្នុងចំណោមក្រុមមនុស្សដែលត្រៀមខ្លួនរៀនសូត្រពីចំណេះដឹងបច្ចេកវិទ្យាថ្មីៗខ្លាំងបំផុត បើប្រៀបធៀបនឹងប្រទេសផ្សេងៗ ដោយពួកគេបាននិងកំពុងប្រើប្រាស់ AI ដើម្បីធ្វើការតាមវិធីថ្មី។ ទោះយ៉ាងណា ការងារទាំងនោះនៅតែត្រូវការការសម្រេចចិត្តពីមនុស្សនៅដំណាក់កាលចុងក្រោយ៕