អន្តរជាតិមើលឃើញថា ថៃបរាជ័យយ៉ាងអាម៉ាសក្នុងការដាក់សម្ពាធសេដ្ឋកិច្ចលើកម្ពុជា

ចង់ច្រានគេទម្លាក់តែចុងក្រោយជ្រុលជើងធ្លាក់ចូលជ្រោះខ្លួនឯង! យុទ្ធសាស្ត្រគាបសង្កត់សេដ្ឋកិច្ចកម្ពុជាពីសំណាក់ភាគីថៃ ត្រូវបានសារព័ត៌មានអូស្ត្រាលី New Mandala លាតត្រដាងថាជា “ការបរាជ័យដ៏អាម៉ាស” និងកំពុងហុចផលអាក្រ.ក់វាយបកទៅរកសេដ្ឋកិច្ចថៃវិញយ៉ាងដំណំ ស្របពេលដែលសេដ្ឋកិច្ចកម្ពុជានៅតែបន្តឈរជើងយ៉ាងរឹងមាំ។
 
យោងតាមអត្ថបទវិភាគស៊ីជម្រៅរបស់លោក Richard Yarrow ដែលត្រូវបានចុះផ្សាយនៅលើសារព័ត៌មានអូស្ត្រាលីដ៏ល្បីឈ្មោះ New Mandala កាលពីថ្ងៃទី១២ ខែមិថុនា ឆ្នាំ២០២៦ បានបង្ហាញថា កម្ពុជាទទួលបានជោគជ័យយ៉ាងធំធេងក្នុងការបំបែកគំនាបសេដ្ឋកិច្ច តាមរយៈការធ្វើពិពិធកម្មសេដ្ឋកិច្ច និងបង្វែរការនាំចូលទៅកាន់ដៃគូពាណិជ្ជកម្មថ្មីៗ។ របាយការណ៍របស់លោកនេះ បានឆ្លុះបញ្ចាំងថា ទោះបីជាថៃបានព្យាយាមប្រើប្រាស់គំនាបសេដ្ឋកិច្ចភូមិសាស្ត្រតាមរយៈការរឹតបន្តឹងលើការផ្គត់ផ្គង់ប្រេងឥន្ធនៈ និងកម្លាំងពលកម្មយ៉ាងណាក៏ដោយ ក៏មិនអាចធ្វើឱ្យសេដ្ឋកិច្ចកម្ពុជាដួលរលំ ឬបង្ខំឱ្យកម្ពុជាចុះចាញ់តាមការចង់បានរបស់ថៃនោះឡើយ។
 
ផ្ទុយទៅវិញ កម្ពុជានៅតែអាចរក្សាបាននូវកំណើនសេដ្ឋកិច្ចជាតិ (GDP) ក្នុងរង្វង់ប្រមាណ ៥% យ៉ាងរឹងមាំ។ គន្លឹះដែលធ្វើឱ្យកម្ពុជាអាចវាយបក និងរំដោះខ្លួនចេញពីសម្ពាធនេះបាន គឺដោយសារតែកម្ពុជាបានបង្វែរទិសដៅពាណិជ្ជកម្មភ្លាមៗ ទៅស្វែងរកដៃគូអន្តរជាតិថ្មីៗ និងកាត់បន្ថយការពឹងផ្អែកស្ទើរតែទាំងស្រុងលើការនាំចូលទំនិញពីប្រទេសថៃ។
 
អត្ថបទរបស់ New Mandala បានសង្កត់ធ្ងន់ពី «ភាពអាម៉ាស» ខាងននយោបាយ និងសេដ្ឋកិច្ចរបស់ថៃ ដោយសារតែវិធានការគាបសង្កត់ឯកតោភាគីនេះ បានបង្កើតជាដុំថ្មទម្លាក់ចំជើងខ្លួនឯង។ តាមរយៈការកាត់ផ្តាច់ និងការបិទច្រកព្រំដែន វាបានជំរុញឱ្យក្រុមហ៊ុនថៃ ព្រមទាំងអាជីវករថៃដែលធ្លាប់តែពឹងផ្អែកលើការនាំចេញទំនិញមកទីផ្សារកម្ពុជា ត្រូវបាត់បង់ចំណូលយ៉ាងមហាសាល។ ដូចគ្នានេះ សេដ្ឋកិច្ចនៅតាមបណ្តាខេត្តជាប់ព្រំដែនរបស់ថៃបានធ្លាក់ចុះយ៉ាងគំហុក និងជួបវិបត្តិយ៉ាងដំណំ ដោយសារតែគ្មានការដោះដូរពាណិជ្ជកម្ម និងកង្វះកម្លាំងពលកម្មក្រោយពេលពលករខ្មែររាប់សែននាក់បានធ្វើដំណើរត្រឡប់មកស្រុកវិញអស់។
 
ហេតុដូចនេះ របាយការណ៍ខាងលើបានសន្និដ្ឋានថា នៅក្នុងបរិបទនយោបាយអាស៊ីអាគ្នេយ៍បច្ចុប្បន្ន ការប្រើប្រាស់សម្ពាធសេដ្ឋកិច្ចដើម្បីគំរាមកំហែងប្រទេសជិតខាង លែងមានប្រសិទ្ធភាពដូចមុនទៀតហើយ។ ភាពធន់របស់កម្ពុជាបានក្លាយជាគំរូមួយដែលបង្ហាញថា ប្រទេសតូចៗនៅក្នុងតំបន់អាចការពារអធិបតេយ្យភាព និងផលប្រយោជន៍ជាតិរបស់ខ្លួនបាន តាមរយៈការបើកចំហរពាណិជ្ជកម្មពហុភាគី និងមិនពឹងផ្អែកលើប្រទេសណាមួយតែមួយគត់ឡើយ៕