បវរកញ្ញា អ៊ិន លក្ខិណា បានធ្វើឱ្យទស្សនិកជនសរសើរនាងថាជាមនុស្សវៃឆ្លាតក្នុងការជូនកាដូជាវត្ថុអនុស្សាវរីយ៍អំពីអត្តសញ្ញាណជាតិខ្មែរទៅកាន់លោក Trần Việt Bảo Hoàng ហៅ Henry ដែលជានាយកប្រតិបត្តិក្នុងកម្មវិធី Miss Cosmo ។ CEO រូបនេះបានបង្ហាញការសប្បាយចិត្តនិងទទួលយកកាដូពី លក្ខិណា ដោយអំណរ។
អ្នកតាមដានវិស័យបវរកញ្ញាអាចនឹងស្គាល់លោក Henry មិនខានទោះបីជាលោកទើបតែកាន់កាប់កម្មវិធីបវរកញ្ញាក្តីប៉ុន្តែប្រជាប្រិយភាពរបស់លោកទទួលបាននូវការចាប់អារម្មណ៍គួរឱ្យកត់សម្គាល់។ ការចាប់អារម្មណ៍នេះដោយសារតែលោក Henry មានរូបរាងសង្ហា មានមន្តស្នេហ៍ ខណៈដែលកម្មវិធី Miss Cosmo កំពុងដំណើរការបានយ៉ាងល្អទោះបីជាទើបចាប់ផ្តើមបានតិចឆ្នាំក្តី។ បើនិយាយពី CEO រូបនេះវិញធ្លាប់មកប្រទេសកម្ពុជាយើងជាច្រើនដងមកហើយនិងមានទំនាក់ទំនងល្អជាមួយនឹងបវរកញ្ញា អ៊ិន លក្ខិណា។
Miss Cosmo Cambodia 2024 តែងតែចាត់ទុកលោក Henry ជាមេដែលល្អនិងមើលថែយកចិត្តទុកដាក់ចំពោះនាងចំណែកឯទស្សនិកជនក៏មើលឃើញថាលោកពេញចិត្តនិងចូលចិត្តលក្ខិណាដូចគ្នា។ ក្នុងពេលលោក Henry មកបំពេញការងារនៅប្រទេសកម្ពុជានាពេលថ្មីៗនេះ លក្ខិណា បានបង្ហាញពីសារឆ្លើយឆ្លងដែលលោកសួរនាំនាងថាចូលរួមកម្មវិធីដែរឬអត់ ខណៈអ្នកទាំងពីរក៏បានជួបគ្នានៅក្នុងកម្មវិធីផងដែរ។
ក្នុងពេលជួបជាមួយនឹងលោក Henry លើកនេះ អ៊ិន លក្ខិណា មានភាពវៃឆ្លាតយ៉ាងខ្លាំងនៅក្នុងការជូនកាដូទៅកាន់ CEO រូបនេះ។ កាដូដែល លក្ខិណា ជូនលោក Henry គឺជាវត្ថុអនុស្សាវរីយ៍ដែលឆ្លុះបញ្ចាំងពីអត្តសញ្ញាណជាតិខ្មែរមានទាំងទង់ជាតិសាសនា ព្រះមហាក្សត្រ រូបប្រាសាទនានា ដូចជាប្រាសាទតាក្របី ព្រះវិហារ ប្រាសាទអង្គរវត្ត របាំអប្សរា ចាប៉ីដងវែង និងរូបតំណាងខេត្តជាដើម។
ភាពវៃឆ្លាតរបស់ លក្ខិណា បានជំរុញឱ្យអ្នកលេងបណ្តាញសង្គមសរសើរនាងយ៉ាងខ្លាំងនិងថា លក្ខិណា ជាធនធានល្អនៅក្នុងសង្គម។ គួរបញ្ជាក់ផងដែរថា អ៊ិន លក្ខិណា គ្រោងនឹងទៅចូលរួមកម្មវិធី Fashion Show នៅឯប្រទេសវៀតណាមនាថ្ងៃទី១២ ខែឧសភា នេះ៕
