លោក Putin ថា សង្គ្រា.មជាមួយអ៊ុយក្រែនជិតដល់ទីបញ្ចប់ហើយ

ប្រធានាធិបតីរុស្ស៊ី លោក Vladimir Putin បានលើកឡើងកាលពីថ្ងៃទី៩ ខែឧសភា ឆ្នាំ២០២៦ ថា សង្គ្រា.មជាមួយអ៊ុយក្រែនជិតដល់ទីបញ្ចប់ហើយ ដែលការលើកឡើងនេះបន្ទាប់លោកទើបតែប្រកាសរុស្ស៊ីត្រូវតែឈ្នះសង្គ្រា.មនៅអ៊ុយក្រែន ខណៈប្រធានាធិបតីអ៊ុយក្រែន លោក Volodymyr Zelenskyy ថា រុស្ស៊ីបង្ហាញសញ្ញាត្រៀមចរចា ហើយអ៊ុយក្រែនក៏ត្រៀមខ្លួនចរចាដែរ ។

ក្នុងអំឡុងពេលប្រារព្ធពិធីនៅទីក្រុងមូស្គូ កាលពីថ្ងៃទី៩ ខែឧសភា ស្តីពី «ជ័យជម្នះរបស់សហភាពសូវៀតលើអាល្លឺម៉ង់កាលពីសង្គ្រាមលោក លើកទី២» ហើយការប្រារព្ធពិធីនេះដើម្បីរំលឹកដល់ពលរដ្ឋសូវៀតចំនួន២៧លាននាក់ស្លាប់ក្នុងសង្គ្រាមពេលនោះ ប្រធានាធិបតីរុស្ស៊ី លោក Putin និយាយថា រុស្ស៊ីត្រូវតែឈ្នះសង្គ្រាមនៅអ៊ុយក្រែន ហើយប៉ុន្មានម៉ោងក្រោយមកទៀត លោកក៏និយាយថា សង្គ្រាមជាមួយអ៊ុយក្រែនជិតដល់ទីបញ្ចប់ ។

នៅចំពោះមុខអ្នកសារព័តមាន លោក Putin បាននិយាយពីស្ថានការណ៍សង្គ្រាមរវាងប្រទេសទាំងពីរកំពុងតែថមថយ ដោយបញ្ជាក់ពីការត្រៀមខ្លួនជាស្រេចដើម្បីចរចាកិច្ចព្រមព្រៀងសន្តិសុខជាថ្មីនៅអឺរ៉ុប ហើយលោកបានសម្លឹងឃើញអតីតនាយករដ្ឋមន្ត្រីអាល្លឺម៉ង់ លោក Gerhard Schroder គឺជាបុគ្គលគួរឱ្យទុកចិត្ត ជាជាងថ្នាក់ដឹកនាំអឺរ៉ុបបច្ចុប្បន្ន ។ ប៉ុន្តែអ្នកវិភាគចាត់ទុកសង្គ្រាមរវាងរុស្ស៊ី និងអ៊ុយក្រែន គឺជាសង្គ្រាមអូសបន្លាយពេលយូរ និងធ្ងន់ធ្ងរបំផុតនៅតំបន់អឺរ៉ុប បើគិតតាំងពីសង្គ្រាមលោកលើកទី២ ។

បើតាមមន្ត្រីវិមានក្រឹមឡាំង គឺការចរចាសន្តិភាពកន្លងមកដែលមានរដ្ឋាភិបាលអាមេរិកក្រោមការដឹកនាំរបស់ប្រធានាធិបតី Donald Trump ធ្វើជាអ្នកសម្របសម្រួលនោះ បានជាប់គាំង ។ បន្ទាប់មក លោក Putin ក៏បញ្ជាក់ម្តងហើយម្តងទៀត គឺរុស្ស៊ីនឹងបញ្ជាឱ្យកងទ័ពបើកប្រតិបត្តិការជាបន្តបន្ទាប់រហូតដល់សម្រេចគោលដៅទាំងអស់តាមអ្វីដែលរុស្ស៊ីចង់បាន ហើយលោកថែមទាំងស្តីបន្ទោសមេដឹកនាំបណ្តាប្រទេសលោកខាងលិចព្យាយាមអូសទាញអ៊ុយក្រែនឱ្យធ្លាក់ក្រោមឥទ្ធិពលរបស់សហភាពអឺរ៉ុប ។



ចំណែកប្រធានាធិបតីអ៊ុយក្រែន លោក Volodymyr Zelenskyy បានអះអាងពីលោក Putin ផ្តល់សញ្ញាត្រៀមខ្លួនសម្រាប់ការចរចាដោយផ្ទាល់ ហើយអ៊ុយក្រែនក៏ត្រៀមខ្លួនចរចាជាមួយរុស្ស៊ីដែរ យើងនឹងស្វែងរកការចរចាជាមួយគ្នាឱ្យបាន ។

គួរបញ្ជាក់ថា រុស្ស៊ីបានឈ្លានពានអ៊ុយក្រែនកាលពីឆ្នាំ២០២២ ធ្វើឱ្យប៉ះពាល់ដល់ទំនាក់ទំនងរវាងរុស្ស៊ីជាមួយបណ្តាប្រទេសលោកខាងលិចខ្លាំងបំផុត និងការប៉ះពាល់ទំនាក់ទំនងនេះ គឺខ្លាំងជាងវិបត្តិមីស៊ីលនៅប្រទេសគុយបាកាលពីឆ្នាំ១៩៦២ ទៅទៀត ដែលពេលនោះ ពិភពលោកប្រឈមនឹងហានិភ័យដោយសារសង្គ្រាមនុយក្លេអ៊ែរ ។

ទោះជាលោក Putin អះអាងសង្គ្រាមជិតបញ្ចប់ក៏ដោយ ប៉ុន្តែលោកនៅតែបញ្ជាក់ច្បាស់ពីការចរចាជាមួយប្រធានាធិបតីអ៊ុយក្រែននឹងកើតឡើង លុះត្រាតែអ៊ុយក្រែនយល់ព្រមតាមលក្ខខណ្ឌរបស់រុស្ស៊ីជាមុនសិន ។ បើតាមអ្នកវិភាគ នេះអាចជាយុទ្ធសាស្ត្រនយោបាយរបស់លោក Putin ដើម្បីកាត់បន្ថយសម្ពាធសេដ្ឋកិច្ច និងសង្គមនៅប្រទេសរុស្ស៊ី បន្ទាប់ពីសង្គ្រាមបានអូសបន្លាយអស់រយៈពេលជាង៤ឆ្នាំ ៕