Jay X លើកពាន ម៉ៃ សុគន្ធ ផ្លែផ្កាឱ្យ អូជី ហ្គូលឌិន

ប្រិយមិត្តមួយចំនួនជ្រាបមកហើយថា អូជី ហ្គូលឌិន មានបញ្ហាចម្រូងចម្រាសជាមួយគ្នាកាលពីកន្លងមកនេះរហូតដល់អ្នកចម្រៀងរ៉េបវ័យក្មេងរូបនេះចេញបទ Diss Track ទៅកាន់ ម៉ៃ សុគន្ធ ទៀតផង។ ស្ងប់ស្ងាត់មួយរយៈស្រាប់តែនៅពេល Jay X លើកពាន ម៉ៃ សុគន្ធ ផ្លែផ្កាឱ្យ អូជី ម្តងទៀត។

កាលពីរាត្រីថ្ងៃទី១ ខែឧសភា បេក្ខជន ខុម យ៉ុងជេ ហៅ Jay X បានក្លាយជាម្ចាស់ពាន The Next Level: RapStar ប្រកបដោយការអបអរសាទរយ៉ាងខ្លាំងក្លាពីសំណាកទស្សនិកជនស្របពេលមានមនុស្សជាច្រើនបានព្យាករណ៍តាំងពីដំបូងថារូបគេគឺជាម្ចាស់ពាន។ ទន្ទឹមនឹងការអបអរសាទរទៅកាន់ Jay X ស្រាប់តែគេបានឃើញ ម៉ៃ សុគន្ធ បានបង្ហោះផ្លែផ្កាទៅកាន់ម្ចាស់ពានមួយរូបទៀតដែលមនុស្សជាច្រើនជឿថាគឺជា អូជី ហ្គូលឌិន។

នៅថ្ងៃទី២ ខែឧសភា ម៉ៃ សុគន្ធ បានចែករំលែកការបង្ហោះពីជ័យជម្នះរបស់ Jay X អមដោយពាក្យសម្តីថា «សំណាងល្អបាន ធ្លាក់មកដល់ដៃហើយ ជាពិសេសជាប់ដោយគ្មានការរិះគន់ Perfect 100% ល្អអើយសែនល្អ តែសុំម៉្យាងទេពេលមានអ្នកគាំទ្រច្រើនកុំផ្តាស់ប្តូរចរិត…… ដូចម្នាក់ជាប់ដោយសារគ្រូ ត្អូញត្អែរ ជម្លើយក្អេងក្អាងគ្មានស្គាល់ចាស់គ្មានស្គាល់ទុំ ដ្រាម៉ាពេញហ្វេសបុក….គ្រប់ពេលណា (ត្រកួនភ្លេចបឹង) idolតូច ប្រុសម៉ៅ ស៊ូៗ សូមជោគជ័យ និង មាន ហ្វេនគាំទ្រកាន់តែច្រើនទៀតណា»។

ពាក្យសម្តីរបស់ ម៉ៃ សុគន្ធ បានជំរុញឱ្យមានមតិវែកញែកជាច្រើនដោយពួកគេជឿថាលោកចង់ផ្លែផ្កាទៅកាន់ម្ចាស់ពានមួយរូបទៀតនោះគឺជា អូជី ហ្គូលឌិន។

កន្លងមកនេះ អូជី និង ម៉ៃ សុគន្ធ តែងតែប៉ះទង្គិចពាក្យសម្តីទៅវិញទៅមកនៅលើបណ្តាញសង្គមរហូតម្ចាស់ពាន Rapper Fighter រដូវកាលទី១ ចេញចម្រៀង Diss Track ទៅកាន់ ម៉ៃ សុគន្ធ ទៀតផង។

គួរបញ្ជាក់ផងដែរថា ថ្មីៗនេះ អូជី ហ្គូលឌិន ទើបប្រកាសថាលោកជាសិល្បករឯករាជ្យមិនស្ថិតក្រោយការគ្រប់គ្រងរបស់ក្រុមហ៊ុនណាមួយឡើយ។ ក្រៅពីអាជីពជាអ្នកចម្រៀងរ៉េប អូជី បានបង្ហាញខ្លួនជាតួឯកនៅក្នុងខ្សែភាពយន្តខ្នាតធំមួយផងដែរ៕