ដ្រូន បំភ្លឺពេញទីក្រុងសេអ៊ូលក្នុងរូបភាព BTS សម្រាប់ស្វាគមន៍វិលត្រឡប់មកវិញ

យន្តហោះគ្មានមនុស្សបើកឬដ្រូន ត្រូវបានបំភ្លឺពេញទីក្រុងសេអ៊ូលក្នុងរូបភាពសមាជិកទាំង៧នាក់រួមមាន RM, Jin, Suga, J-Hope, Jimin, Jungkook និង V សម្រាប់ការស្វាគមន៍ពួកគេក្នុងឱកាសវិលត្រឡប់មកកាន់វិថីសិល្បៈវិញបន្ទាប់ពីឈប់ផ្អាកសកម្មភាពរបស់ខ្លួនរយៈពេលជិត៤ឆ្នាំ។

នៅយប់ថ្ងៃទី២០ ខែមីនា ដើម្បីអបអរសាទរការវិលត្រឡប់មកវិញរបស់ BTS បន្ទាប់ពីរយៈពេល ៣ ឆ្នាំ និង ៩ ខែ យន្តហោះគ្មានមនុស្សបើកត្រូវបានធ្វើឡើងនៅឧទ្យាន Ttukseom Hangang ក្នុងទីក្រុងសេអ៊ូល។ ក្នុងអំឡុងពេលព្រឹត្តិការណ៍ប្រហែល ១៥ នាទី យន្តហោះគ្មានមនុស្សបើកបានគូរទង់ជាតិកូរ៉េ ឡូហ្គោអាល់ប៊ុមថ្មីរបស់ BTS «ARIRANG» និងពាក្យ «ARIRANG» ជាភាសាហាន់ហ្គុល។ ដ្រូនជាង ២,០០០ គ្រឿងបានបញ្ចាំងមុខរបស់សមាជិក BTS គឺ RM, Jin, Suga, J-Hope, Jimin, Jungkook និង V ជាបន្តបន្ទាប់ទៅលើមេឃ។ រាល់ពេលដែលមុខរបស់សមាជិក BTS ទាំងប្រាំពីរនាក់បង្ហាញខ្លួន អ្នកគាំទ្របានស្រែកហ៊ោកញ្ជ្រៀវយ៉ាងខ្លាំង។

មិនត្រឹមតែស្វាគមន៍ជាមួយនឹងដ្រូនជាង២០០០នៃក្រុម BTS ប៉ុណ្ណោះទេ ប៉ុន្តែកន្លែងជាច្រើនទៀតក្នុងទីក្រុងសេអ៊ូល ត្រូវបានតុបតែងឡើងយ៉ាងពិសេសផ្សារភ្ជាប់ទាំងវប្បធម៌កូរ៉រួមទាំងនិមិត្តសញ្ញារបស់ក្រុមចម្រៀងនេះសម្រាប់ព្រឹត្តិការណ៍ «BTS comeback live: Arirang» ដែលបានធ្វើឡើងនៅទីលាន Gwanghwamun កាលពីយប់ថ្ងៃទី២១ ខែមីនា។

បន្ទាប់ពីការប្រគំតន្ត្រីខាងលើនេះ BTS នឹងចាប់ផ្តើមដំណើរទេសចរណ៍ពិភពលោក «ARIRANG» របស់ពួកគេនៅក្នុងខែមេសា ដោយចាប់ផ្តើមជាមួយនឹងការសម្តែងនៅទីក្រុង Goyang កូរ៉េខាងត្បូង មុនពេលធ្វើដំណើរទៅកាន់ទីតាំងផ្សេងៗនៅទូទាំងអាស៊ី អឺរ៉ុប និងអាម៉េរិក៕